JOHAN
(1 John)
Cakuat Pakhatnak
Thuhmaihruai
Johan cakuat pakhatnak hin hmuitinmi pahnih a nei. Pakhatnak cu ca siartu pawl kha Pathian le a Fapa Jesuh Khrih thawn pawlkomnak nei ih an nunnak dingah a forh. A pahnihnak cu cuih pawlkom awknak a siatter theitu zirhnak dik lo pawl a um ruangah ralrinnak a sim.
Cuih zirhnak dik lomi cu ziang a si tile: Hi leitlunih òhat lonak hi leilung thawn pehzom awk ruangih a ra thlengmi a si; curuangah Pathian Fapa Jesuh Khrih cu leilung thawn pehkaih awknak ngaingai a nei lo, minung bangin taksa ngaingai a nei lo a si, tiin an zirh. Rundamnak timi cu hi leilung nunnak thuhla helhkamnak kan neihmi ihsin luat khi a si, an ti. Rundamnak timi cu òhat le òhat lo ruangah a si lo; midang duhdawt le duhdawt lo ruang khalah a si cuang lo, an ti.
Hibangtuk thuzirhnak kalhkih in ca ngantu pa hin Jesuh Khrih cu milai taktak a si ih Jesuh a zumtu le Pathian a duhdawtu cun pakhat le pakhat an duhdaw aw ding a si, tihi thupi zet in a sim.
1
Nunnak Thu
1 A hramthok ihsin a rak um cia mi nunnak ih Thu nan hnenah ca in kan ngan. Cumi cu kan hna ih kan theihmi le kan mit in kan hmuhmi a si. Kan mit rori in kan rak hmu ih kan kut rori in kan rak thammi a si.Ref 1.1 Joh 1:1;
2 Cuih nunnak cu hmuh theihmi ih a rung can tikah kannih in kan hmu a si. Curuangah cuih Thu cu nan hnenah kan rel ih Pa thawn a ummi kumkhua nunnak, kan hnenih theihter a simi Thu kha nan hnenah kan sim a si.Ref 1.2 Joh 1:14;
3 Pa le a fapa Jesuh Khrih thawn pawlkomnak kan neihmi sungih nan tel venak dingah kan hmuhmi le kan theihmi cu nan hnenah kan phuang a si.
4 Kan lungawinaka 1:4 Kan lungawinak timi hi nan lungawinak ti tla-in a hrek kutngan cabu sungah a um. kim seh tiah hi ca hi nan hnenah kan ngan a si.
Pathian Cu Tleunak A Si
5 A Fapa hnen ihsin kan theihmi thu le nan hnenih kan phuanmi cu himi hi a si: Pathian cu tleunak a si ih a sungah thimnak zianghman a um lo.
6 Curuangah amah thawn pawlkomnak kan nei kan ti nain thimnak sungih kan um a si ahcun kan òong in siseh, kan òuannak in siseh, thuphan kan per a si.
7 Sikhalsehla amah cu tleunak sungih a um vekin kannih khal tleunak sungih kan um ahcun pakhat le pakhat pawlkom awknak kan nei ih a Fapa Jesuh ih thisen in kan sualnak hmuahhmuah a tlengfai a si.
8 Sualnak kan nei lo kan ti ahcun kanmah le kanmah kan bum aw ih kan sungah thutak a um lo.
9 Sikhalsehla Pathian hnenah kan sualnak kan phuan ahcun zum tlak le a dingmi a si ruangah kan sualnak in ngaidam dingih kan mawhnak hmuahhmuah a thiangfaiter ding.
10 Asinan sualnak kan tuah lo kan ti ahcun Pathian cu thuphanper ah kan canter ih a thu kan sungah a um lo a si.