46
1 “Babilon ih khawvang pawl cu an cem a si!
Khuahlan ah Bel le Nebo an rak biak mi an si;
Atu ahcun laak parah an suang ih,
òilva baangtertu thilrit ah an cang zo.
2 Cubangtuk in an khawvang pawl cu an cem a si.
Milem pawl cu anmah le anmah
an run aw thei lo.
An kaih ih an phurh hlo a si.
3 “Maw Jakob tesinfa pawl, i ngai hnik uh;
Ka minung sung ihsin a tangsun pawl.
Nan sem ve tein ka kilkhawi mi nan si ih,
Nan suahthlak ve tein ka cangcawi mi nan si.
4 Nan Pathian ka si ih ka lo kil ringring ding,
Na òuakpar le na tarkun tiang
ka lo cangcawi ding a si.
Ka lo tuah ih ka lo kilveng ringring ding;
Bomnak ka lo pe dingih ka lo hum ding.
5 “Zo thawn so in òhim ding?
Keimah bangtu an um maw?
6 Mi in an paisa bawm an ongih
an sui an buur;
An ngun cu cuai in an thlai.
Sui sertu an saangih milem an tuahter;
Cui hmaiah an kuun ih an biak!
7 An liangah an hun khai ih an phur;
Hmun pakhat ah an retih cutawkah
a ding ringring.
A umnak ihsin hmundang ah a cer thei lo.
A hnenih thla an cam tikah a sawn thei lo,
Harsatnak sung khalin a hum theilo a si.
8 “Maw misual pawl, hihi ruat òha uh!
Ka thil tuah cia mi hi ngaihtuah òha hnik uh!
9 Thil a cangcia mi pawl kha
vun mangsal hnik uh!
Keimah lawng Pathian ka si kha thei uh;
Keimah bangtuk zohman an um lo.
10 A hramthok ihsin ziang a cang ding ti cu
ka rak sim cia zo;
Khuahlanlai ihsin a cang dingmi cu
ka relcia zo a si.
Ka tumtahmi cu a pelh dah lo ding, ka ti.
Tuah ka tum mi hmuahhmuah cu
ka tuah ding a si.
11 Nisuahnak lam ihsin mi pakhat ka ko lai;
Khaute bangin a rung zam dingih
Ka khuakhan cia mi pawl cu
a tisuak òheh ding.
Ka sim zo vekin tuahsuak a si ding.
12 “I ngai hnik uh, nannih mi lungruh pawl,
Nehnak cu a hlat zet hrih lai,
tiih a ruattu pawl.
13 Nehnak ni cu ka rak keng ih
a thlengzik thlang;
Hla nawn lo a si.
Ka mi nehnak cu zohman in
an tlaiter thei lo ding;
Jerusalem cu ka hum dingih,
Cutawkih Israel mi hnenah
hminthannak ka pe ding,” tiah a ti.