33
Bomnak Hrangih Thlacamnak
1 Kan ral pawl an cem a si! Thil an ru, mi an zuarthlai; anmah cu zohman in an ram lo ih an zuarthlai hai lo! Sikhalsehla ruk an ruknak le mi an zuarthlainak tikcu cu a cem cing ding; ruknak le zuarthlainak a tuartu bik ah an cang thlang ding a si.
2 Maw Bawipa, in zangfah hram aw. Na hnen lawngah ruahsannak kan nei. Nikhat hnu nikhat in humhim awla harsatnak sungin in run hram aw.
3 Kan hnenah òangin na do tikah cun miphun dang pawl cu raldonak hmun ihsin an tlanhlo a si.
4 An thilri pawl cu an lon ih ralthil lon mi ah an canter.
5 Bawipa a nasat zia cu! Ziang hmuahhmuah tlunah uktu a si. Jerusalem cu dingnak le felnak in a khahter dingih,
6 ram pumpi cu hnangam zet le hngetzet in a umter ding. A minung pawl cu a hum ringring ih fimnak le thiamnak tla a pek. An ro òha bik cu Bawipa an òihzahnak hi a si.
7 Ralòha pawl in bomnak an dil ding. Daihnak um seh tiah khua a khang rerotu ram palai pawl cu nasa zet in an òap ding.
8 Ram sungih lamzin tum pipi cu òihnunnak a tam ruangah zohman khual an tlawng ngam lo. Lungkim thukamnak pawl an phiat òheh ih thukamnak an tuahmi pawl an balsiat òheh zo. Zohman upat mi an nei nawn lo.
9 An ram cu zohman ih thlawh lo in a lawng ih a òhing reprep. Lebanon ram ih tupi pawl cu an vuai òheh ih Sharon phairawn ramòha zet cu nelrawn vekah a cang; Bashan ram ah le Karmel Tlang ah thingkung pawl cu an hnah a òil òheh a si.
Bawipa In Ralrinnak A Pek
10 Bawipa in miphun pawl hnenah, “Atu cun ka thok thlang ding. Ka cah zia le ka huham neih zia ka langter dingih nan hmu ding.
11 Nan ngaihtuah mi pawl cu zianghman òhathnemnak an neilo ih nan tuahmi hmuahhmuah cu alak hlir an si. Nanmah le nanmah nan siatsuah aw a si!
12 Òhung tuahnak ih an ur mi lungto vekin a vut ah nan cangòheh dingih hling an ur ih vutcam ih a can vekin nan ciam òheh ding a si.
13 A hlat ih um mi siseh, a nai ih um mi siseh, zozo khalin ka thil tuahmi hi thei hai sehla huham ka neih zia hi thei thlang hai seh,” tiah a ti.
14 Zion ih a ummi misual pawl cu thinphang in an khur thlohthlo. “Pathian thuòhennak cu kumkhua alh mi meisa vek a si. Kannih lakah hin cuvek meisa sung ihsin a luat theitu kan um ding maw?” tiah an ti.
15 A hman mi lawng nan sim ih nan tuah a si ahcun nan luat thei ding. Nan thuneihnak cu mifarah bumnak ah hmang hlah uh; nawhthuh tla ei hlah uh! Laithah tumtu pawl hnenah tel hlah uh; thilòha lo an tuahnak khalah telve hlah uh!
16 Cutiih nan um asile nan hlawhtling dingih a hnget zetmi ralhruang bangin nan him ding. Ei ding rawl le in ding tidai nan ngah ding.
Hmailam Hrang Ruahsannak
17 Ram kaupi a uktu siangpahrang ih sunlawinak cu na mit in na hmusal ding.
18 Ramdangmi siahkhawltu le thlingthlatu nan rak òihzet mi pawl kha cu a ruah hman nan ruatsal nawn lo ding.
19 Mihngal zet ramdangmi, an òong hman a tican nan theih lomi pawl kha nan hmusal nawn lo ding.
20 Zion hi zoh hnik uh, biaknak lamih puai kan tuahnak khuapi hi! Jerusalem hi zoh hnik uh! Ziangtluk umnak òha le himnak khua so a si! Puanthlam-a òhuam an phawi dah lomi le a hri a cat dah lomi bangtuk a si ding.
21 Bawipa in a sunlawinak huham in hmuh ding. Tiva kau zet le tivate kiangkap ah kan um ding, asinain kan ral lawng pawl cu cunah an feh lo ding.
22-23 Lawng parih lawng fehternak thilri hmuahhmuah cu zianghman ah an òhahnem lo; lawng puan hman an pharh thei lo. Kan ral ralkap pawl ih thilri hmuahhmuah cu lon òheh a si ding. Cui thilri cu a tam zet dingih ke awl pawl khalin covo an ngah thei ding. Bawipa amah cu kan siangpahrang a si ding. Amah in, in uk dingih in hum ding a si.
24 Kan ram sungih a um mi hmuahhmuah in, “Ka dam lo e,” tiah an ti dah nawn lo dingih an sualnak phunkim cu ngaidam a si ding.