30
Izipt Thawn Lungkimnak Tuah Lo Ding
1 Bawipa in, “Judah ram uktu pawl cu an cem a si. Ziangahtile keimah dodaltu ah an cang. Keimah ih’ khuakhannak a si lomi an thlun ih ka lungkimnak tel lo in lungkimnak cachuk an tuah; cuticun sualnak pakhat hnu pakhat an thuah vivo.
2 Keimah ron hmaisa lo in bomnak duh ah Izipt ram ah an feh. Izipt in, in hum seh ti an duh ih Izipt siangpahrang an rinsan a si.
3 Sikhalsehla an siangpahrang in a bawm thei hai lo ding; Izipt ih humhimnak cu hloralnak ah a net ding.
4 An ram palai pawl cu Izipt ram khuapi Zoan le Hanes an thleng zo nain,
5 bomnak an òulzet laifangih a bawm theilotu ram, rin tlak a si lomi ram an rak rinsan pang cu Judah mi pawl an siraw zetsal ding,” tiah a ti zo!
6 Thlanglam nelrawn ram ih ramsa pawl thu ah Pathian in hitiin a sim; “Ram palai pawl cu òihnunnak ram, kiosa le rulhrang pawl le a zam thei mi rulhreng pawl umnak ah khual an tlawng. Mi zianghman bomnak a pe theilotu ram hnenih laksawng pek dingah thilri mankhung zetzet cu an laak le an kalauk parah an suang ciamco.
7 Izipt ih bomnak cu thulolak a si. Curuangah Izipt cu, ‘Òihtlak lo Rulpi,’ tiah hmin ka pek zo,” tiah a ti.
Pathian Thungailo Mi Pawl
8 Ziangtluk miòha lo an si kha kumkhua ih hminsinnak dingah an thuhla cu cauk sungih ngan dingin Pathian in i fial.
9 Pathian dodaltu an si ringring, thuphanpertu an si ringring ih Pathian zirhnak kha an thlun duh hrimhrim lo.
10 Profet pawl hman cu, “Dai tein um uh, òong hlah uh! Hihi a hman ee, khakha a hmanlo ee, tiah in sim duh hlah uh! Kan theih duhmi a nuam mi lawnglawng in sim uh. Kanmah ih um tein um ve mai uh si!
11 In kian uh, kan lamzin in kham hlah uh! Nan ‘Israel ih Pathian thianghlim,’ thu cu a theih kan duh nawn lo,” an ti.
12 Sikhalsehla Israel ih Pathian Thianghlim cun, “Ka lo simmi cu zianghman ah nan siar lo ih mibumnak le thisen luannak sawn nan rinsan a si.
13 Mimawh hrimhrim nan si. Phar dawl a tlun ihsin a hnuailam tiang a khingkuai mi bangtuk nan si ih rinlopi ah nan tlu leh ding.
14 Tlak beel a kuai ih meivam laknak ah le tikuang ihsin tidai vun suahnak hman umlo ih a kuai thluh bangin nan kuai thluh leh ding,” tiah a ti.
15 Bawipa Israel ih Pathian Thianghlim in misenpi hnenah, “Rakirsal uhla dai tein keimah i rinsan uh. Dai ziarzi ih um cu nan cahnak a si ih nan him ding,” tiah a ti. Asinan cutiih um cu nan duh lo.
16 “Rang tlan cak zet pawl kan to dingih kan ral pawl ih hmuh lonak ah kan tlan ding,” nan ti. A si, nan hman; nan tlanhlo ngai ko ding. Kan rang pawl cu an cak zet a si, nan ti; asinain a lo dawitu pawl cu nannih hnakin an cak sawn ding;
17 Nan ral pakhat nan hmuh tikah nannih cu thawngkhat nan tlan ding; nan ral panga nan hmuh ahcun nan zate in nan tlan òheh ding. Nan ralkapbu sungin pakhat hman nan tanglo ding; a tangmi cu tlangzim parih amah lawng lungleng ih a dingmi nan thantar òhuam pakhat lawng a si ding!
18 Cubangtuk asinain Bawipa cu nan parah zangfahnak a nei lai hrih. Amah cun thil hman lawnglawng a tuah ruangah nanmah zangfah dingah a lo hngak lai hrih. Lungawinak taktak cu Bawipa rinsannak ihsin a ra a si.
A Minung Pawl A Thluasuah Ding
19 Maw Jerusalem ih a ummi pawl, nan òap nawn lo ding. Bawipa cu lainatnak neitu a si ih bomnak dilin a hnenih nan au tikah a lo theih sak hai ding.
20 Bawipa cun harnak le tuarnak sungah a lo thlenter hai ding, asinain nan tuarnak hmunah cun a um ve dingih a lo zirhtu a si ding; cuticun amah nan hawl rero a òul lo ding.
21 Zin nan hlo ih vorhlam le kehlam ih zinpeng nan zawh tikah nan dunglam ihsin a aw cu, “Hitawkin feh uh; hinah lamzin a um,” tiah a ti nan thei ding.
22 Sui le ngun ih khuutmi nan milem pawl cu hnawmhne bangin nan hlonhlo dingih, “A hmuh ka lo duh nawn lo!” nan ti ding.
23 Rawl ci nan tuh tikah Bawipa in ruah a surter dingih rawl a òhanter ding, rawl nan paòha dingih nan òilva pawl tlannak khalah hramno a tam zet ding.
24 Nan lo leilettu cawcang le laak pawl in a òha bik le a thawbik òilva rawl an ei ding.
25 Cui ni a thlen ih nan ral pawl ih ralhruang nan lak ih an minung pawl nan thah tikah tlangsang le tlangniam hmunkip in tidai an luang ding.
26 Thlapi cu ni tluk in a tleu dingih ni cu a tleu keel ih let sarih in a tleu ding; ni sarih tleunak khi nikhat ah kom hai sehla a bang ding. A tlunih thil cang ding pawl cu Bawipa in a minung hnenih a thlenter mi hma pawl a tuamsak hai ih a damter tikcu caan ah a kim òheh ding a si.
Pathian In Assiria A Hrem Ding
27 Pathian ih huham le sunlawinak cu a hlatpi in hmuh thei a si. Meisa le meikhu in a thinhennak an langter. Thu a sim ih a òong cu meisa bangin a alh.
28 Ziang hmuahhmuah a fenhlo òhehtu tilian bangin a hmaiah thli a hranter. Cui thli cun ram tampi a siatsuah ih a òha lomi an tumtahnak tla a cemralter òheh.
29 Sikhalsehla nannih Pathian ih minung pawl cu nizarh ni puai tuah zan ih lungawi in hla nan sak bangin lungawi le hlasa in nan um ding a si. Israel a òantu Bawipa ih Biakinn an feh lai ah phirivau tum phahin lungawi zet ih a fehtu pawl bangtukin nan lung a awi ding.
30 Bawipa in a nasa zetmi a aw cu mi hmuahhmuah a theihter dingih a thinhennak hmual khal a tonter hai ding. Meisa hlio zet a um dingih khawdur a puak ciamco ding; rial a tla dingih ruah cu a thlet in a thle aw ding.
31 Assiria mi pawl cu Bawipa ih aw an theih tikah le a hremnak hmual an ton tikah an tuk a suum ding.
32 Pathian in Assiria mi pawl a hrem bet vivo tikah amai minung pawl cun khuang le òingòang aw thawng an thlun ding. Pathian amah rori in Assiria mi pawl cu a do ding.
33 Meisa rum zet sungih Assiria siangpahrang urnak ah tiah khuahlan lai ihsin hmun pakhat cu timlam cia in a um zo. Cui hmun cu a thuuk ih a kau zet; zanthing tla sang zet in an peng zo! Kaat meisa bangtuk a simi Bawipa ih thaw in a ur ding a si.