HAGGAI
Thuhmaihruai
Haggai cabu cu BC 520 lai ih profet Haggai hnenah Bawipa ih simmi thu tawite ngannak a si. Judah pawl kha an saltannak ihsin an kirsal ih tawkfang Jerusalem ah an umsal zo. Asinan Biakinn cu amah keel in a siat lai. Haggai hin Biakinn remsal dingah a forh ih Pathian in thluasuahnak le daihnak a lo pe ding a si, tiah a ti.
1
Biakinn Sak Dingah Bawipa Ih Thupeknak
1 Darias in Persia siangpahrang a òuan kum hnihnak, thla ruk thla, nikhat ni ah Bawipa ih òong cu profet Haggai hnenah a rung thleng. A rung thlengmi thu cu Judah ram uktu bawi, Shealtiel ih fapa Zerubbabel hrangah le Puithiam Sang Jehozadak ih fapa Joshua hrangah a si.Ref 1.1 Ezr 4:24-5:2; 6:14;
2 Cungnungbik Bawipa in Haggai hnenah, “Atu hi Biakinn sak salnak ding ahcun tikcu remcang a si lo tiah mipi in an ti ciamco,” a ti.
3 Curuangah profet Haggai hmangin misenpi hnenah Bawipa ih thu cu hitiin a si:
4 “Maw ka minung pawl, ka Biakinn hnawmpen vekih a um lai ah ziangahso nannih hmuah inn òhaòha ah nan um?
5 Nan parih thil a thlengmi hi nan hmu thiam lo maw si?
6 Rawl ci tampi nan tuh, asinain rawl malte lawng nan la. Rawl ei ding nan nei, asinain pum puar tlak nan nei lo. Sabit in ding nan nei, asinain rit tlak hman nan nei lo. Hnipuan hruh ding nan nei, asinain a lo hlumtertu hnipuan òha nan nei lo. Hnaòuantu khalin pumcawmnak tlak nan hlawh lo.
7 Ziangruangah hibangtuk hin nan parah a cang ti nan thei lo maw si?
8 Tlang parah va kai uh, thing va la uhla Biakinn saksal uh. Cutikah ka lung a awi dingih cutawkah ka sunlawinak ka langter ding.
9 Rawl kan paòha zet ding tin nan ruat, asinain nan lakmi ngaingai cu a malte a si. Nan rawl cu inn ih nan run tlun tikah keimah in ka semhlo òheh. Ziangahso ka semhlo nan thei maw? Nan zate in nanmah inn ciar nan sak ih manhlap zet ih nan um lai ah kei ih inn cu balsiat òhehmi hnawmpen vekih nan umter ruangah a si.
10 Curuangah sokhaw ruah tla a sur lo ih zianghman a khoh thei lo cu!
11 Ruah sur lo in leilung ka carter òheh: Tlangpar le lo sung le sabit hmuan pawl le olif hmuan pawl, leilung parih a khomi rawl kung parah le minung le òilva tlunah le milai in ciin an tummi thil hmuahhmuah parah ruah ka surter lo ih ka carter a si,” tiah a ti.
Misenpi In Bawipa Ih Thu An Thlun
12 Cutikah Zerubbabel le Joshua le Babilon saltannak ihsin a ra kirtu pawl hmuahhmuah in Bawipa an Pathian fialmi cu an tuah. An thin a phang ih Bawipa ih palai a simi profet Haggai ih thu cu an ngai.
13 Haggai cun Bawipa ih thu cu misenpi hnenah a sim: “Nan hnenah ka um ding, tiah thu ka lo kam a si,” a ti.
14 Bawipa in mi hmuahhmuah cu Biakinn òuan dingah an lung a thoter: Judah ram uktu bawi Zerubbabel, Puithiam Sang Joshua le saltannak ihsin a ra kirtu pawl an tel òheh. Cungnungbik Bawipa, an Pathian ih biakinn cu saksal an thok.
15 Darias in Persia siangpahrang a òuannak kum hnih kum, thla ruk thla, ni kul hluanli ni ah an thok a si.