35
Sabbath Ulhdan Ding Pawl
1 Moses in Israel mi hmuahhmuah cu hmunkhat ah a khawm òheh ih an hnenah, “ Bawipa ih thupekmi nan tuah ding pawl cu hibangtuk in a si pei:
2 Niruk sung hna nan òuan pei; asinain ni sarih ni cu nan hrangah ni thianghlim a si ih, ni sunglawi, nan hnaòuannak ihsin nan colh ni, Bawipa ih hrangah thianhlimtermi ni a si pei. Cuih ni ah zozo khal hna a òuan asile thah a si pei.Ref 35:2 Suah 20:8-11; 23:12; 31:15; 34:21; Pui 23:3; Daan 5:12-14;
3 Hi sabbath ni ah nan umnak pohpoh ah meisa nan muah lo pei,” tiah a sim.
Pathian Puanthlam Hrang Pekmi
(Suah 25:1-9)
4 Moses in Israel mi hnenah, “ Bawipa ih thupekmi bangtukin,
5 Bawipa ih hnenah thawhlawm nan pek pei. Thawhlawm pek a duhtu hmuahhmuah in, sui, ngun, dar;
6 mepian, sen uai, a senmi tuuhmul, puan mankhung, mehmul ih tahmi hnipuan,
7 tuucang phaw a senih buhmi, saphaw òha le lawithing,
8 meivannak siti, hriak culhnak ding le zihmui rimthaw dingah zihmui a phunphun,
9 lungmankhung sen le Puithiam Sang ih hruk ding òaangben hrang le angki thianghlim sunghruk parih ben dingah lungmankhung pawl nan pe pei,” tiah a ti.
Puanthlam Hrangih Thilri
(Suah 39:32-43)
10 “Nanmah lakih zungthiam hmuahhmuah in Bawipa ih fialmi thilri hmuahhmuah cu nan tuah pei:
11 Pathian umnak inn hrangah puanthlam le a tlun khuh, phar pawl le puan awk-nak kual pawl, phartlang, òhuam le a tawdam pawl,
12 Thukam Kuang le a putnak zawnfung pawl, kuangsin le kuang phentu puanzar pawl,
13 cabuai, cabuai zawnfung pawl le a thilri pawl, Pathian hnenih pek ding sang,
14 meivannak fung le a thilri pawl, mei-inn le mei-inn hrang siti,
15 zihmui rimthaw ur-nak hrangih biakòheng le biakòheng zawnfung pawl, culh ding hriak, zihmui rimthaw, puanthlam luhnak sangka puanzar,
16 mei-ur thawinak pek ding biakòheng le biakòheng parih dammi dar khohriik, biakòheng zawnfung pawl le a thilri pawl, kut kholhnak kheng le a tawdam,
17 Puanthlam kulhnak puanzar le a òhuam pawl le a tawdam pawl, kotka puanzar,
18 Puanthlam le a kulhnak hrangah thil bannak le a hri pawl,
19 hmun thianghlim sungih puithiam pawl ih hmanmi hnipuan sunglawi le mankhungmi puithiam Aaron le a fapa pawl ih puithiam hna an òuan tikah an hruh dingmi hnipuan thianghlim pawl cu an tuah pei,” tiah Moses in a ti.
Israel Mi Pawl In Thawhlawm An Pek
20 Cuih hnuah Moses hnen ihsin Israel pawl cu an umnak ciar ah an tlung.
21 Puithiam hnipuan thianghlim tuahnak hrang, Bawipa ih Puanthlam saknak hrang le thlam sung hnaòuannak hrangih a òulmi hmuahhmuah pawl cu pek a duhtu pawl le a lung a thotu pawl in Bawipa ih hnenah thawhlawm an pek.
22 Nunau siseh, mipa siseh, an ra ih thil mawiternak ih benmi a phunphun le hnakhai, zunghruk, òhi le sui ih tuahmi thilri pawl cu siang zet in an pek. Mi hmuahhmuah in Bawipa ih hnenah pek dingih an ruahmi thawhlawm, sui ih tuahmi thilri pawl tla cu Bawipa ih hnenah an rak keng ih an pek.
23 Mepian, sendup le a senmi tuuhmul siseh, mehmulih tahmi hnipuan le a senih buhmi tuucang phaw le saphaw òha zet pawl siseh, a neitu in Bawipa ih hnenah an pek.
24 Ngun siseh, dar siseh, a pe theitu pawl in Bawipa ih hnenah an pek ih, lawithing a neitu pawl in inn saknak ah an pek.
25 Cun nunau zungòha pawl in pat an hnuk ih mepian, sen uai le a senmi tuuhmul puan le pat ih tahmi hnipuan mankhung an tuah ih Bawipa ih hnenah an pek.
26 Nunau zungòha pawl in mehmul tla pat ah an hnuk.
27 An hruaitu pawl in a thianghlimmi sunghruk angki le òaangben parih ben dingah lungmankhung sen an pek ih,
28 mei-inn van ding siti, culh ding hriak le zihmui rimthaw ur ding hrangah siti le zihmui tla an pek.
29 Israel mi hmuahhmuah in nunau siseh, mipa siseh, Moses hnen ihsin Bawipa ih thupek an theih bangtukin a hnaòuannak hrangah an pek duhmi thawhlawm cu Bawipa ih hnenah an pe ciamco.
Puanthlam Hrang Zungthiam Hnaòuantu Pawl
(Suah 31:1-11)
30 Moses in Israel pawl hnenah, “Judah phun sung ihsin Hur ih tupa Bezalel, Uri ih fapa cu Bawipa in a hril zo.
31 Bawipa in Bezalel cu a thlarau in a khahter ih zungthiamnak, thil tuahtheinak le kutzung thiamnak ih tuah thei dingmi theihtheinak a nei ih,
32 pungsan a phunphun suai theinak le sui, ngun le dar in cuih pawl tuah theinak tla a nei;
33 lungmankhung taat thiamnak, zanthing in zuk tuahthiamnak le kutzung thiamnak a phunphun a nei a si.
34 Bezalel cu Dan hrin sung ihsin Ahisamak ih fapa Oholiab hnenah an kutzung thiam pawl cu midang zirh thiamnak khal Bawipa in a pek a si.
35 Lungto parih lungkher thiam pawl le thing parih cangan le zuksuai thiam pawl, pungsan suai thiam pawl le mepian, sendup le a sen ih tah thiam pawl, puan parih òelh thiam pawl ih thiamnak bangtukin Pathian in Bezalel le Oholiab hnenah thiamnak nasa zet in a pek hai. Hnaòuan a phunphun an thiam ih pungsan a phunphun an suai thiam a si.