5
Biakinn Sak An Thoksal
1 Cun profet pahnih Haggai le Iddo ih fapa Zekhariah in Israel Pathian ih thu cu Judah le Jerusalem ih a ummi Judah mi hnenah an phuang vivo.Ref 5:1 Hag 1:1; Zek 1:1;
2 An thuphuanmi cu Shealtiel ih fapa Zerubbabel le Jehozadak ih fapa Joshua in an theih tikah Jerusalem Biakinn sak cu an thoksal. Cule cuih profet pahnih in an bawm.Ref 5:2 Hag 1:12; Zek 4:6-9;
3 Hmakhat teah Eufrates Nitlak lam ram uktu Mangki bawi Tattenai le Shethar Bozenai le an kuthnuai bawi dangdang pawl cu Jerusalem ah an feh ih Biakinn saktu pawl cu, “Hi Biakinn sak dingah le a sung thilri pawl tuah dingah zo in so thu an lo pek?” an ti.
4 Cuih Biakinn sak a bawmtu pawl hmuahhmuah ih hmin tla an sut òheh.
5 Asinan Pathian in Judah hotu pawl cu a zoh a kilkhawi ringring; cule Persia bawi pawl cun siangpahrang Darias hnenah ca an kuat ih a cakhirh an ngah hlan sung cu zianghman khamnak an tuah lo.
6 Siangpahrang Darias hnenih thu an thanmi cu hitiin a si:
7 “Siangpahrang Bawipa, na uknak sungah daihnak um hram seh!
8 “Siangpahrang bawipa na theih dingih kan ruahmi cu: Judah pengah kan feh ih Judah mi pawl in a maksakmi Pathian ih Biakinn cu an saksal; lungto tum pipi in an sak ih a phar tla ah thing-ah tum pipi an song. Taimak suah le fel zet in an sak ih an hnaòuan cu an hma a sawtzet a si.
9 “Zo ih thupeknak in so hi Biakinn hi nan saksal ih a sung thilri tla nan tuah ciamco, tiah kan sut.
10 An hotu pawl zo an si, ti na theihnak dingah hi an hnaòuannak ih hotu pawl hmin tla kan sut.
11 “In lehnak ahcun, ‘Van le leilung ih Pathian ih siahhlawh kan si ih a cak zetmi Israel siangpahrang in Biakinn a rak sak ih a sung thilri pawl tla a rak tuah òheh; cuih Biakinn cu kan saksal a si.
12 Sikhalsehla kan pupa pawl in Van ih Pathian cu a thin an hengter ruangah cuih Pathian in Babilon siangpahrang Nebuchadnezzar a nehter. Biakinn cu a siatsuah òheh ih minung pawl cu Babilon ah sal ah a hruai.Ref 5:12 2 Siang 25:8-12; 2 San 36:17-20; Jer 52:12-15;
13 Cule siangpahrang Sairas in Babilon siangpahrang a si kum khatnak ah hi Biakinn cu saksal dingin thu a rak pek.Ref 5:13 Ezr 1:2-11;
14 Cuih tlunah Nebuchadnezzar in Jerusalem Biakinn ihsin a lak ih Babilon biakinn ih a retmi sui le ngun le bungbeel pawl tla cu siangpahrang Sairas in Judah peng uktu dingah a tuahmi Sheshbazzar hnenah a rak pek.
15 Cuih thilri pawl cu Jerusalem Biakinn ah fehpisal dingah le Biakinn cu a hlanih a rak umnak hmun keelih saksal dingin amah cu siangpahrang in a rak fial a si.
16 Cule Sheshbazzar cu Judah peng a thleng ih Jerusalem Biakinn saksal dingin a hram lungphum tla a phum; cuih ihsin thokin atu tiang Biakinn sak hna cu kan òuan, asinain kan òheh hrih lo,’ in ti.
17 “Curuangah siangpahrang bawipa na lungkim a si ahcun Babilon ah siangpahrang thuhla khummi hminsinnak cabupi sungah rak hawl uhla hi biakinn saksal dingah siangpahrang Sairas in thu a rak pek ngaingai le pek ngaingai lo rak zoh hnik uh; cule hi thu cu in run thansal hram aw,” tiah an ti.