EFESA
(Ephesians)
Kawhhran Hnenih Paul Cakuat
Thuhmaihruai
Efesa kawhhran hnenah Paul ih cakuat hi a hmaisabik ah, “Tikcu caan a kim tikah Pathian in famkim ih a tuah tummi cu: Van ah siseh, leilung ah siseh, siammi thil hmuahhmuah hi finkhawm òheh ih Khrih kha lu bik ih ret khi a si,” ti thu hi a thupi bik ah a ret (1:10). Cun leikhawvel milai hmuahhmuah Jesuh Khrih sungah pumkhat si theinak dingah hi Pathian ih tumtahnak bangtukin minung pawl in tican nei ih nung dingah zangfah a dil.
Hi cabu a hramthokah cangantu pa hin pumkhat sinak ding tumtahnak thu a sim. Himi thu ahhin Pathian in a milai pawl ziangtin a hril, Jesuh Khrih sungah ziangtin an sualnak a ngaithiam in a luatter, tile Pathian ih thutiamnak cu Thlarau Thianghlim in ziangtin aamahkhannak ah a canter ti thu a sim. A òhen hnihnak ah ca siartu pawl cu Bawi Khrih sungah pumkhat an sinak kha pakhat le pakhat an nun khawsaknak cio ah tican nei in an langternak dingah a forh.
Pathian ih milai pawl pumkhat tein Khrih ah an lung a khat aw a si, ti langternak dingah sim duhmi a langtertu tahòhimnak hmang in a sim. Kawhhran cu taksapum bangtuk a si ih Khrih cu lu bangtuk a si; kawhhran cu inn bangtuk a si ih Khrih cu a kiil ih innhramòoh bangtuk hi a si; Kawhhran cu nupi bangtuk a si ih Khrih cu a pasal bangtuk a si, a ti. Khrih sungah a langmi Pathian zangfahnak hin hi cangantu ih ruahnak cu sang zet ah a thlenter. A simmi hmuahhmuah ah Khrih ih duhdawtnak, a pumpeknak, sual ngaithiamnak, zangfahnak le a thianhlimnak thawn a sim a si.
1
1 Pathian lungkimnak vekin Khrih Jesuh ih tirhthlah keimah Paul in Efesa khua ih a ummi Pathian mi pawl, Khrih Jesuh thawn nan pehzom awknak ah rin tlak ih a nungmi, nan hnenah hi ca hi ka lo kuat.Ref 1.1 Tirh18:19-21, 19:1;
2 Kan Pa Pathian le kan Bawipa Jesuh Khrih in zangfahnak le daihnak lo pe hram seh.
Khrih Hnen Ihsin Thluasuahnak
3 Kan Bawipa Jesuh Khrih ih Pa le a Pathian cu thangòhat si ko seh! Ziangahtile Khrih thawn kan pehzom awknak thawngin kan thlarau hrang van thluasuahnak a phunphun kan hnenah in pek.
4 Khrih thawn kan pehzom awknak thawngin Pathian in kannih cu Amah ih hmaiah mi thianghlim le mawh nei lo si dingin leilung a sersiam hlan hman in Amah ih ta ah in rak hril zo. In duhdawt ruangah,
5 Pathian in Jesuh Khrih thawngin a faale ah in canter ding cu a lungawi zawng le a duh zawng in rem a rak ruat cia a si.
6 A sunglawimi a zangfahnak le a duhdawtmi a Fapa thawngin laksawng in pekmi ruangah Pathian cu thangòhat si ko seh!
7 Ziangahtile Khrih a thihnak thawngin kan sualnak cu ngaidam a si zo ih a luatmi kan si zo. Pathian in a zangfahnak cu kan hnenah tam zet in in pek ruangah,Ref 1.7 Kol 1:14;
8 a zangfahnak cu a va tum lawmmam so!
9 Pathian cun a fimnak le a thuukmi a thutheihnak in a tumtah cia mi cu a tuahsuak ih Khrih sungin kimter a duhmi a thuthup cu kan hnenah a langter zo.
10 Tikcu caan a kim tikah Pathian in famkim tein a tumtahmi cu: Van ah siseh, leilung ah siseh, siammi thil hmuahhmuah hi finkhawm òheh ih Khrih kha lu bik ih ret ding khi a si.
11 Ziang hmuahhmuah hi Pathian amah ih tumtahmi le ruahciami vekin a kim òheh. Khrih thawn kan pehzom awknak thawngin a minung si dingah Pathian in, in hril zo; cumi cu amah ih tumtahmi a si ih a hramthok ihsin a rak khaukhih cia mi a si.
12 Curuangah Khrih sungin ruahsannak a nei hmaisabiktu kannih in Pathian hnenah sunlawinak pe uh si.
13 Nan hnenah rundamnak a thlentertu Thuthangòha a dikmi thuthang cu nan theih tikah nannih khal Pathian minung nan si ve. Khrih nan zum ih Pathian in amah ih ta nan sinak langternak ah hminsinnak cu nan parah a khen; cuih hminsinnak cu pe dingin a lo tiam cia mi Thlarau Thianghlim kha a si.
14 Pathian in a minung hnenah a kam cia mi kan ngah tengteng ding ti langternak ah cuih Thlarau Thianghlim cu aamahkhan a si ih a minung hnen ahcun luatnak tlamtling in a pe ding ti kan theih fiangnak tla a si fawn. A sunlawinak cu thangòhat si ko seh.
Paul Thlacamnak
15 Bawi Jesuh nan zumnak le Pathian minung parih duhdawtnak nan neih zia ka theih thok vete ihsin,
16 nanmah ruangah Pathian hnenih lungawi thusim ka cawl dah lo. Ka thlacamnak in ka lo ciing ringring.
17 Cule kan Bawipa Jesuh Khrih ih Pathian, a sunglawimi kan Pa in, nan hnenah Thlarau lo pe hram dingin ka dil. Cuih Thlarau cun a lo fimter dingih Pathian nan hnenah a langter fawn ding; cuticun Pathian cu nan thei ding.
18 Ziangbangtuk ruahsannak nei dingah so a lo kawh ih a minung pawl hrangah a tiamkam cia mi cu ziangtluk mangbangza so a si.
19 Amah a zumtu pawl sungah a hnaòuan theinak huham cu ziangtlukin so a tum, ti tla khi hmu thei dingin le a tleunak tla nan hmuh theinak dingah nan thinlung run ongter hram seh, tiah a hnenah thla ka cam a si. Kan sungih a ummi cahnak cu,
20 Khrih thihnak ihsin a thawhter hnuah vancung khua a vorhlam kapih a totertu Pathian ih cahnak huham thotho kha a si.Ref 1.20 Saam 110:1;
21 Cutawkah Khrih cu uktu a si ih vancung ih uktu dangdang siseh, thuneitu dangdang siseh, bawi dangdang a ummi pawl tla siseh, an tlunah Khrih cu uktu bawi a si. Hi leikhawvel tlunah siseh, a ra leh dingmi leilungtlun ah siseh, thuneitu pawl hmuahhmuah ih tlunah Bawi bik a si.
22 Pathian in Khrih ke hnuai ah ziangzongza a ret thluh ih ziang hmuahhmuah ih tlunah Bawi a si tiin kawhhran ih lu ah Khrih cu a ret.Ref 1.22 Saam 8:6;
23 Kawhhran cu ziang hmuahhmuah a famkimtertu Khrih ih ruangpum a si.Ref 1.23 Kol 1:18;