32
Izipt Siangpahrang Cu Tisartam Vek A Si
1 Sal kan taannak kum hleihnih kum, thla hleihnih thla, nikhat ni ah Bawipa in ka hnenah,
2 “Milaipa, Izipt siangpahrang hnenah ralrinnak fiang tein pe aw. Ka thu cu a hnenah hitiin sim aw: Miphun pawl lakah kiosa vekin hna na òuan, asinain tiva sungih a vak reromi tisartam vek sokhaw na si. Na ke in tidai na nawiter ih tiva pawl na balter òheh.
3 Miphun pawl an tonkhawm awk tikah ka sur in ka lo awk dingih annih in tikap ah an lo dir ding.
4 Leilung parah ka lo hlon dingih na sa eitu dingah leilungtlun vate le ramsa hmuahhmuah ka ko ding.
5 A òoih hluahhlomi na ruak cu tlang le nelrawn pawl khuhnakah ka hmang ding.
6 Na thisen in tlangsang pawl a hnih òheh hlan lo le tivate pawl a khahter òheh hlan lo ka thle rero ding.
7 Nangmah ka lo siatsuah tikah cun van khi lang lo in ka khuh dingih arsi pawl ka thimter òheh ding. Ni cu khawdur phenah a relh dingih thlapi khal a vang lo ding.Ref 32.7 Mat 24:29; Mar 13:24, 25; Luk 21:25; Thup 6:12, 13; 8:12;
8 Van ih a ummi tleunak hmuahhmuah ka hmit òheh dingih na ram cu thimnak in a khuh òheh ding. Cungnungbik Bawipa keimah in ka sim zo.
9 “Ka lo siatsuahnak thuthang cu na theih dah lomi ram pawl sungih ka phuan tikah miphun tampi an thin a nuam lo ding.
10 Na parih thil ka tuahmi hin miphun tampi mangbang zet in a tuah ding. Ka ralnam ka vai tikah cun siangpahrang tampi thinphang in an khur thlohthlo ding. Nangmah na tluk ni ahcun an zate in anmah ih nunnak ruat ah thinphang in an òhia rero ding,” a ti.
11 Cungnungbik Bawipa in Izipt siangpahrang hnenah, “Babilon siangpahrang ih ralnam na tong ding.
12 Zangfah nei lo miphun pawl ih ralkap pawl in an ralnam an suah dingih na minung pawl an sattan ding. Na minung pawl le na uanawknak thilri dang hmuahhmuah cu an siatsuah òheh ding.
13 Tiva kua kipah na òilva pawl ka that dingih tidai nawitertu ah minung siseh, òilva siseh, tiva kua ah an feh nawn lo ding.
14 Na tidai ih hnawm pawl cu a taw ah ka òhutter dingih na tiva pawl cu thiangfai zet in ka luangter dingih hriak bangin a fim ding. Cungnungbik Bawipa keimah in ka sim zo.
15 Izipt cu ramòhing ah ka tuah ih cutawk minung hmuahhmuah ka siatsuah òheh tikah cun keimah hi Bawipa ka si kha in thei ding.
16 Hi ralrinnak pekmi hi mithi phumnak hla ah a cang ding. Izipt le a minung pawl parih riahsiatnak langternak dingah miphun tampi nunau pawl in an sak ding. Cungnungbik Bawipa keimah in ka sim zo,” tiah a ti.
Mithi Khua
17 Sal kan taannak kum hleihnih kum, thla khat thla, ni hleinga ni ah Bawipa in ka hnenah,
18 “Milaipa, Izipt mi pawl hrangah mithi ngai in um aw. Mithi khua ah miphun cak zetzet pawl thawn vun kuat aw.
19 An hnen ahcun:
Midang hnakin ka mawi cuang
tiah na ruat aw maw?
Mithi khua ah na vung feh dingih,
Pathian thei lo pawl thawn
daiziar in na um ding.
20 “Izipt mi pawl cu ral kut ih a thimi pawl thawn an tlu ding. Anmah that òhehtu dingah ralnam tiarcia in a um.
21 Ralòha bik pawl le Izipt òan ih raldotu pawl in mithi khua in Izipt mi pawl an rak hmuak ih, ‘Ral kut ih a thimi Pathian theilotu pawl cu hinah an rung ih an umta a si,’ tiah an au.
22 “Cunah Assiria a um ve; a ralkap pawl ih thlan cu a kiangkap hmunkip ah an um. An zate in ral kut ih thi an si.
23 An thlan pawl cu mithi khua thuknak bik ah an um. A ralkap pawl cu raldonak ah an thi ih an thlan in a thlan an kulh. Cupawl cu an dam lai ah a nungmi pawl ram a òhihòhaih rerotu an rak si.
24 “Elam khal cunah a um; a ralkap pawl ih thlan cu a kiangkap ah an um òheh. An zate in ral kut ih a thimi an si ih mithi khua ahcun serhtan lo in an vung feh. An dam lai ahcun tuksumnak khuazakip ah a rak umtertu an si nain atu ahcun mualpho le daiziar in an um zo.
25 Elam cu ralkut in a thimi pawl lakah a it; a ralkap pawl ih thlan cu a kiangkap ah an um. An zate in serhtan lo, ral kut thi lawnglawng an si. An nun lai ahcun khuazakip ah tuksumnak a khahtertu an si; asinain atu ahcun ral pawl ih thah mi lakah an tel ih mualpho le daiziar in an thi.
26 “Meshek le Tubal khal cunah an um; an ralkap pawl ih thlan cu an kiangkap ah an um. An zate in serhtan lo, ral thahmi lawnglawng an si. A nungmi pawl a òhihòhaihtu bik an rak si.
27 Khuahlan ih ralòha hminthang pawl cu an thih tikah hriamnam kim thawn an phum. An ralnam cu an lu hnuai ah an ret ih an ralphaw cu an ruangpi parah an ret. Asinan annih cu cuvekin upatnak thawn phum an tong lo. Hi ralòha pawl cu a nungmi pawl òhihòhaih thei dingin huham an rak nei.
28 “Cuvekin Izipt mi pawl cu serhtan lo, ral thahmi pawl lakah pal cih mi ah an cang ding.
29 “Edom khal cutawkah a siangpahrang pawl le a hotu pawl thawn an um. Anmah cu ralkap cak zetzet an rak si, asinain atu ahcun mithi khua ah serhtan lo, ralthahmi pawl thawn an um a si.
30 “Saklam ih siangpahrang pawl tla cunah an um; Sidon mi pawl khal an um ve. An huham in khuazakip ah òihphang in mi an rak tuah, asinain atu ahcun ral thahmi le serhtan lo pawl thawn mualpho in an cawl zo. Mithi khua ih a vung fehtu pawl thawn mualphonak cu an òawm aw a si.
31 “Hitiih ral ih thahmi pawl hmuahhmuah an hmuh tikah Izipt le a ralkap pawl hrangah cun an hnemawknak a si ding,” tiah Cungnungbik Bawipa in a ti.
32 “Izipt siangpahrang cu a nungmi pawl òhihòhaihtu si dingah ka ngaihtuah; asinain amah le a ralkap pawl cu thah an si dingih ral kut in a thimi serhtan lo pawl thawn phum an si ding,” tiah a ti. Cungnungbik Bawipa in a sim zo.