10
Bawipa Sunlawinak In Biakinn A Tlansan
1 Ramsa nung cherubim pawl lu tlunih tlunkhuh-kuum cu ka hun zoh ih a tlunlam ah safaira lungmankhung in tuahmi siangpahrang tohkham bangtuk pakhat ka hmu.Ref 10.1 Ezk 1:26; Thup 4:2;
2 Pathian in puan paate a sintupa hnen ahcun, “Ramsa nung cherubim pawl hnuai ih a ummi lengke pawl karlak in va feh awla na sumpi khatin meiling keng aw. Cuih meiling cu khuapi parah va òhehdarh aw,” tiah a ti.Ref 10.2 Thup 8:5;
Ka zoh ih a va feh lai kha ka hmu.
3 Biakinn sung a vungluh zawng ah cherubim pawl cu Biakinn thlanglam kapah an ding; cule Biakinn sunglam khaan cu mero in a khat.
4 A tleu zukzomi Bawipa ih umnak tleu cu cherubim hnenin a hung kai ih Biakinn sangka lamah a òhawn. Cutiin Biakinn sung cu mero in a khat ih a tual cu a tleu pempem.
5 Cherubim pawl ih thla khawn thawm cu a lenglam tual khalin a thang òheh. Ziangkimtithei Pathian ih aw vekin a thang.
6 Bawipa in puan paate a sintupa cu cherubim pawl hnuai ih a ummi lengke pawl karlakin meisa la dingah thu a pe ih cupa cu a feh ih lengke pakhat kiangah a ding.
7 Cherubim pawl lakih pakhat in an kiangih a ummi meisa cu a kut in a hei dawh ih meiling hrekkhat a hei lak ih puan paate sintupa kut sungah a ret. Cupa cun meiling kha a lak ih a suak.
8 Cuih cherubim pawl cun an thla hnuai ciar ah milai kut vek a simi an neih fingfing kha ka hmu.
9-10 Leengke cu an pali in an bangrep ih cherubim kiangah an um fingfing khal kha ka hmu. Leengke pawl cu lungmankhung vekin an tleu zukzo ih lengke pakhat sungah lengke dang pakhat ding zet in a tan zawng in a vunglut mi an nei fingfing.
11 Cuih cherubim pawl an òhawn tikah her òul lo in khuitawk lam khalah an òhawn thei hluahhlo. An feh duhnak lamah hmunkhat ah an feh tlang hluarhlo; dunglam herta òul lo in an feh tlang thei a si.
12 An ruang pumpi, an dunglam zaangtluan, an kut pawl, an thla pawl le lengke pawl khal mit hlir in an khat.Ref 10.12 Thup 4:8;
13 Hi lengke pawl cu hmaisabik langnak ih ka rak hmuhmi lengke pawl thawn an bangrep a si.Ref 10.9-13 Ezk 1:15-21;
14 Cherubim pakhat in hmai pali fingfing an nei. Hmaisabik cu cawcang hmai a si; pahnihnak cu milai hmai a si; pathumnak cu kiosa hmai a si ih palinak cu muvanlai hmai a si.Ref 10.14 Ezk 1:10; Thup 4:7;
15 (Hi cherubim pawl cu Khebar Tivapi kiangih ka rak hmuhmi ramsa nung thotho kha an si.) Cherubim pawl cu thli lakah an zam so ih,
16 an òhawn tikah lengke pawl khal an feh ve. Zam dingih an thla an pharh tik khalah lengke pawl an tel ve.
17 Cuih cherubim pawl an colh tikah lengke pawl khal an cawl ve; an zam tikah lengke pawl khal an tel ve; ziangahtile cherubim pawl in lengke pawl cu an uk a si.
18 Cule a tleu zukzo mi Bawipa ih umnak cu Biakinn sangka ihsin a suak ih cherubim pawl ih tlunah a òhawn.
19 Ka mit hmuhhngan ahcun an thla pharh tahrat in leilung ihsin an hung zam ih lengke pawl khal an tel ve. Biakinn nisuahnak lam kotka ah an cawl ih a tleu zukzomi tleunak cu an tlunah a um.
20 Hi cherubim pawl cu Khebar Tivapi ah Israel ih Pathian hnuai ih ka rak hmuh zomi ramsa nung pawl an si, ti ka theithiam.
21 An zate in hmai pali an nei fingfing; thla pali fingfing le an thla hnuai ah milai kut bangtuk pakhat ciar an nei fingfing.
22 An hmai pawl cu Khebar Tivapi ih ka rak hmuhmi ramsa nung pawl hmai vek cekci an si. Cherubim pawl cu hmailam ah ding tein an feh fingfing.