THUSIMTU
(Ecclesiates)
Thuhmaihruai
Thusimtu cauk sungah hin thuthuk ruat mifim pa ih khawruah daan le a hmuhdan kha a um. Cupa ih khawruah daan ahcun milai kan nunnak hi ziangtlukin a tawi, kan ruahnak thawn ziangtluk a rak linglet ih ziangtlukih thulolak so a si timi thu a ngan. Milai cem netnak ding a theitu Pathian ih thil tidan hi kan thei thei hrimhrim lo, a ti. Asinan midang hnenah ruahnak a pek duhmi cu: Pathian thil tidan hi kan theih theilo hmanah nan nun sungah Pathian laksawng khi a cang thei tawpin rak nompi uh a ti.
Hi thuthuk ruat mifim pa ih ruahnak hi a si lo lam zawng hlir le beidonnak ngaingai lam lawng in a sim. Hi cauk Baibal sungih a umnak hin Baibal sungih Pathian zumnak cu hibangtuk thil a si lo lam le rinhmainak neimi si hmanah kau zet in a pomkhawm cih thei ve thotho ti a langter. Mi tampi in hi cauk an siar tikah anmah ih si zia an hmu ih thazang cahnak ah an hmang. Hibangtuk ruahnak ngannak Baibal thotho hin a sunglawi mi nunnak a pe theitu Pathian in zumnak a neiter thei a si timi cinken salnak ah an hmang.
1
Nunnak Hi Thulolak A Si
1 Jerusalem siangpahrang, David fapa Thusimtu ih simmi pawl:
2 Thusimtu in hitiin a ti,
Zianghman an si lo,
zianghman an si lo;
Thil hmuahhmuah hi
zianghman an si lo;
3 Milai in leilungtlun a nun sungih
a hnaòuan mi le a zonzaihmi
hmuahhmuah in
ziang òhathnemnak so a ngah?
4 Sankhat a liam ih sandang a ra suak,
Asinan leilung cu a hmun ringring ko.
5 Ni khal a suak ih a tlasal,
Cule a suahnak lamah a kir ih
a suaksal lala.
6 Thli cu thlanglam ah a hrangih
saklam khalah a hrang;
A heel aw vivo ih
a thoknak a thleng kirsal.
7 Tiva hmuahhmuah tifinriat ah an luang,
Sikhalsehla tifinriat cu
a khat cuang lo;
Tiva cu an hna lamah an kirsalih,
An luan keel in an luangsal.
8 Thil hmuahhmuah hi
thinlung retheitertu an si;
Minung kaa in sim cawk ding a si lo.
Mit in thil a hmuh mi hi
khawh ti a nei lo,
Hna khalin a theihmi hi nin ti a nei lo.
9 Thil a um zo mi kha a umsal ding;
Thil tuah cia mi kha
tuahsal an si ding;
Vanrang hnuai ahhin
thil thar zianghman a um lo.
10 Zotal in, “Zoh hnik uh,
himi hi thilthar a si!”
an ti thei mi a um dah maw?
A um lo,
Kan sem hlanpi ih
a rak um cia mi hlir an si.
11 Hlanlai san kha zohman in
an thei nawn lo;
A ra thleng dingmi san khal cu
an nehhnu ih san pawl in
an thei nawn lo ding.
Thusimtu Ih Hmuhtonmi
12 Kei Thusimtu hi Jerusalem ah Israel siangpahrang ka rak si.
13 Cule vanhnuai ih thil umdan hmuahhmuah pawl hi fimnak hmangin theihfel le hmuhsuak dingah ka thinlung in ka ngaihtuah.
Pathian in milai parah harsatnak a pekmi hi ka zoh tikah riahsiatnak ngaingai a si.
14 Leilung tlunih thil tuahmi hmuahhmuah hi ka hmu zo. Zoh hnik uh, zianghman an si lo; thli dawi rero sehla cubangtuk men an si.
15 A kawi cia mi cu dingter a theih lo,
A um lomi cu siar a theih lo.
16 Keimah le keimah cu: “Ka hlanih Jerusalem a rak uktu hmuahhmuah hnakin fimnak tam sawn ka nei. Ka thinlung in fimnak le theihnak cu nasa zet ka nei a si,” ka ti aw.Ref 1.16 2 Siang 4:29-31;
17 Cuticun ka thinlung cu fimnak thei dingah le aatnak le fimlonak khal thei dingah ka hmang. Cukhal cu zianghman an si lo; thli dawi rero vek thotho a si.
18 Fimnak a tam tikah buainak a tam,
Theihnak a tam tikah riahsiatnak a tam.