4
Pathian Thu Ngai Ding
1 Cule Moses in misenpi hnen ahcun, “Ka lo zirhmi daan pawl cu thlun uhla nan nung dingih Bawipa, nan pupa ih Pathian in a lo pekmi ram cu nan luah ding.
2 Ka thupekmi tlunah zianghman bet hlah uh, a sup khal sup hlah uh. Bawipa nan Pathian ih thupekmi ka lo simmi cu thlun thluh uh.Ref 4:2 Thup 22:18, 19;
3 Peor Tlang parih Bawipa ih thil tuahmi kha nan mit rori in nan hmu zo. Baal a betu hmuahhmuah cu pakhat hman tang lo in a siatsuah òheh;Ref 4:3 Mipum 25:1-9;
4 asinain Bawipa nan Pathian a rinsantu nannih cu tuih sun tiang nan nung lai a si.
5 “ Bawipa ka Pathian ih i fial bangtukin daan hmuahhmuah ka lo zirh zo. Cuih daan pawl cu nan do dingmi le nan luah dingmi ramsung nan luh tik khalah thlun ringring uh.
6 Fel tein thlun uhla cuticun miphun dangdang hmaiah mifim le thil theitu nan sinak kha a lang ding. Hi daan pawl hi miphun dangdang in an theih tikah, “Hi miphun hi, miphun mak zet an si ih fimnak le thil theihnak a nei ngaingai mi an si,” an ti ding.
7 “Ziangbangtuk ih miphun tum an si khalle Bawipa kan Pathian vekih kan kawh tin tein, in naihtu Pathian cu an nei cuang lo ding. Bom dingih kan kawh tin tein, in thei a si.
8 Ziangbangtuk a tummi miphun a si khalle tuih sun ih ka lo zirhmi daan vekih a dingmi daan cu zohman in an nei zik lo.
9 Curuangah ralring uh! Nan nunsung hmuahhmuah ah nan mit rori in nan hmuh zomi thil pawl cu hngilh hrimhrim hlah uh; ciing ringring uh. Nan faate pawl le nan tesinfa pawl zirh òheh uh.
10 Sinai Tlangah Bawipa nan Pathian hmaiah nan dingih Bawipa in ka hnenah, “Misenpi pawl kokhawm hai aw. Keimah upat òihzah dingin an faate pawl an zirhnak dingah le an nunsung hmuahhmuah ah keimah upat le òihzah an thiamnak dingah ka hmurka hrimhrim ih ka òongmi an theih kha ka duh a si,” a ti tla kha nan fanau hnenah sim uh.
11 “Meikhu dum zet vek khawdur duppi ih a khuhmi van tawngin meisa tleu a kap zukzo aw mi tlang hramih nan ra din zia pawl kha nan faale pawl tla sim hai uh.
12 Cuih meisa sung ihsin Bawipa cu nan hnenah a òong ih a òongmi khal nan hna in nan thei nain Bawipa ih pianhmang cu ziangti hman in nan hmu lo.Ref 4:11, 12 Suah 19:16-18; Heb 12:18, 19;
13 Nanmah thawn thukamnak a tuah ih cuih thukam nan thlun theinak ding lamzin khal a lo sim a si. Cuih lamzin cu lungpheng pahnih parih a nganmi nan thlun dingmi Thukham Pahra kha a si.Ref 4:13 Suah 31:18;
14 Nan do dingmi le nan luah dingmi ram ah nan thlun dingmi daan hmuahhmuah cu zirh dingah Bawipa in, in fial a si.”Ref 4:14 Suah 21:1;
Milem Biak Lo Ding
15 “ Bawipa in Sinai Tlang meisa sungin nan hnenih a òong tikah ziang hmuihmel hman nan hmu lo. Curuangah fimkhur zet in um uhla,
16 mipa asilole nunau hmuihmel in maw,Ref 4:16 Suah 20:4; Pui 26:1; Daan 5:8; 27:15;
17 leivak ramsa asilole vanzuang vate hmuihmel in maw,
18 a bokvakmi ramsa asilole tisung ih a tlangmi nga vekin maw, milem tuah tahrat in nan sual lonak ding ralring in um uh.
19 Van ih nan hmuhmi ni le thlapi le arsi pawl cu vanrang hnuai minung hmuahhmuah hrangah a si ih nannih cun nan bia lo pei ih nan rian pang lo pei.
20 Atu ih nan dinhmun amah ih minung nan si theinak dingah nan hrangah thir er-titnak vek a simi Izipt ram ihsin a lo suahmi nan si.Ref 4:20 Suah 19:5; Daan 7:6; 14:2; 26:18; Tit 2:14; 1 Pit 2:9;
21 Nanmah ruangah Bawipa kan Pathian cu ka parah a thin a heng ih a lo pek dingmi ramòha sungih lut lo dingah, “Jordan tiva na tan lo pei,” i ti; cumi cu siatcam in a phuang zo.Ref 4:21 Mipum 20:12;
22 Curuangah kei cu hi ram ahhin ka thi dingih Jordan tiva cu ka tan thei lo ding; asinain nannih cun nan tan dingih cuih ramòha cu nan luah ding.
23 Bawipa nan Pathian in nanmah thawn thukamnak a tuahmi cu nan hngilh lonak dingah ralring uh. Amah ih thupekmi thlun uhla nanmah ih hrangah ziangvek milem khal tuah hlah uh;
24 Ziangahtile Bawipa nan Pathian cu thiik neimi Pathian a si ih ziang hmuahhmuah a kangraltu meisa vek a si.Ref 4:24 Heb 12:29;
25 “Nan luah dingmi ram ah kum reipi nan um ih tu le fa nan neih hnu hmanah ziangbangtuk milem hman tuah tahrat in nan sual lo pei. Milem rian cu Bawipa ih hmaiah thil òha lo zet a si ih a thin nan hengter ding.
26 Cutiin nan tuah ngaingai a si ahcun lei le van saal in tuih sun ah ka lo sim: Hi ram ah rei nan leeng lo ding, tuan ah nan hloral ding. Nan luah dingmi Jordan tiva ral ahcun rei nan nung lo ding; siatsuah òheh nan si ding.
27 Bawipa amah hrimhrim in leitlun miphun pawl lakah a lo òhekdarh òheh hai ding. Mi malte titham lo lawng nan tang ding.
28 Cule minung kut ih tuahcopmi khawzing dangdang thing le lungih tuahmi khawzing, khua a hmu thei lomi le a thei thei lomi, rawl a ei thiam lomi le rim a hnim thiam lomi khawzing nan biak ding.Ref 4:27, 28 Daan 28:36;
29 Cutawkah cun Bawipa nan Pathian cu nan hawl dingih nan thin le nan lungtak tein nan hawl ahcun Amah cu nan tong ding.Ref 4:29 Jer 29:13;
30 Asinan vansannak nan ton tikah le hi thil hmuahhmuah nan parih a thlen tikah a netnak talah Bawipa ih hnenah nan hoikirsal dingih a thu cu nan ngai ding.
31 Bawipa cu mi zangfahtu Pathian a si. A lo thlahthlam in a lo siatsuah lo ding; nan pupa hnenah amah rori in thukamnak a tuahmi tla a hngilh lo ding.
32 “A liam zomi tikcu, nan sem hlan caan le leilung parih Pathian in minung a tuah caan tiang, dunglam caan thlir in zoh hnik uh. Vanhram deng tiang, leilung pumpi hi thlir hnik uh. Hibangtuk thil nasa hi khui talah a um dah maw? Hibangtuk thil mangbangza hi zotal in an thei dah maw?
33 Meisa sungin Pathian òongkam a thei ih a nungmi nanmah vek minung an um dah keel maw?
34 Bawipa nan Pathian in Izipt ram ih a tuah bangtukin miphun phunkhat cu ram pakhat sungin suahpi tahrat in amah ih miphun ah a tuah ngamtu pathian dang khui talah an um dah maw? Nan mithmuh rori ah a cahnak le a huham cu a langter ih, natsia le raldonak a thlenter, mangbangza le khawruahhar tampi a tuah ih rapthlakza thil tampi a suahter a si.
35 Amah lawng Pathian a si ih a dang pathian a um lo, ti nan theihnak dingah hi thil pawl cu Bawipa in a lo hmuh a si.Ref 4:35 Mar 12:32;
36 A lo zirh theinak dingah van ihsin a aw a lo theihter ih lei parah meisa a lo hmuhter hai ih cuih sungin nan hnenah a òong.
37 Nan pupa pawl cu a duhdawt ruangah an tesinfa pawl a hril ih amah rori in a cahnak huham thawn Izipt ram ihsin a lo suah.
38 Hi ram hi nan rak nor deuhdeuh tikah nanmah ih ram a si theinak dingah nanmah hnakih a tum deuh le a cak deuhmi miphun pawl cu amah in a dawisuak.
39 Curuangah Bawipa cu vancung le leitlun ah Pathian a si, ti kha ciing ringring uhla hngilh hrimhrim hlah uh. Pathian dang a um hrimhrim lo a si.
40 Tuih sun ih ka lo pekmi amah ih daan hmuahhmuah hi thlun uhla nanmah le nan tefa pawl ih lamzin cu a tluang ding. Bawipa nan Pathian in sanikhuk tiang nan ta si dingah a lo pek dingmi ram ahcun nan um ringring ding a si,” tiah a ti.
Rolnak Khuapi Pawl
41 Cule Moses cun,
42 mi pakhatkhat in a ral a si lomi pakhat a that pang asile a rol ih a himnak dingah Jordan tiva in nisuahnak lamah khuapi pathum a ret. Hi khuapi pakhatkhat ih a rol a si ahcun thah lo ding a si.
43 Reuben hrin pawl hrangah tlangpar ram ih a ummi Bezer khuapi, Gad hrin pawl hrangah cun Gilead ram ih a ummi Ramoth khuapi le Manasseh hrin pawl hrangah cun Bashan ram ih a ummi Golan khuapi an si.Ref 4:41-43 Jos 20:8, 9;
Moses In Daan A Pek
44 Bawipa ih daan le thuzirhnak pawl cu Moses in Israel mi pawl hnenah a pek.
45 Hi daan pawl cu Izipt ram ihsin an suah hnu,
46 Bethpeor khua ihsin khatlam ral, Jordan tiva in nisuahnak lam phairawn ih an um lai ah a pek a si. Cuih hmun cu Heshbon khua ih bawi a òuantu Amor siangpahrang Sihon ih ram sungah a um. Izipt ram in an suah hnuah Moses le Israel mi pawl in siangpahrang Sihon cu an do ih an neh.
47 A ram cu an luah ih Bashan siangpahrang Og ram tla an luah òheh. Hi siangpahrang pahnih cu Amor mi pawl ih siangpahrang an si ih Jordan in nisuahnak lamih a ummi an si.
48 Ram an lakmi cu Arnon tiva kapih a ummi Aroer khuapi ihsin Sirion Tlang tiang a sau ih,
49 cuih sungah cun Jordan tiva in nisuahnak saklam Arabah ram hmuahhmuah a tel ih Tipi Thi tla a tel; cule Pisgah tlang hram tiang a tel a si.