3
Siangpahrang Og An Nehnak Thu
(Mipum 21:31-35)
1 “Cuih hnuah saklam, Bashan ram lamah kan hung ih siangpahrang Og le a ralkap pawl cu kanmah do dingah Edrei khua an thleng.
2 Asinan Bawipa in, “Òih hlah! Amah Og siseh, a ralkap pawl le a ram siseh, na kut sungah ka lo pe ding. Heshbon uktu Amor siangpahrang Sihon na tuah vek thotho in a par khalah na tuah ding a si,” i ti.
3 “ Bawipa in siangpahrang Og le a minung pawl cu kan kut sungih in pek ruangah pakhatte hman zuah lo in kan that òheh.
4 Cuih tlunah an khuapi hmuahhmuah kan lak; kan lak lomi pakhat hman a um lo. A zate in khuapi sawmruk kan lak. Bashan siangpahrang Og ukmi Argob ram khal a zate in a tel a si.
5 Hi khuapi pawl cu ralhruang sang zetzet in an kulh ih kotkhar le kotkalh pawl an nei òhepòhep. Cule kulh lomi khuate pawl tla an rak um ve.
6 An khua pawl cu kan siatsuah òheh ih Heshbon siangpahrang Sihon ukmi khuasung ih kan tuah vek thotho in mipa siseh, nunau le nauhak siseh, kan that òheh a si.
7 An òilva pawl kan lak ih an khuapi pawl cu kan ram òheh.
8 “Cuih òumah Jordan tiva in nisuahnak lam ram pawl Amor siangpahrang pahnih kut in Arnon tiva ihsin Hermon tlang tiang kan lak.
9 Hermon tlang cu Sidon mi pawl in Sirion an ti ih Amor mi pawl cun Senir an ti.
10 Cuticun Bashan ram siangpahrang Og ih ram hmuahhmuah, hmunrawn khuapi pawl, Gilead le Bashan ram hmuahhmuah le nisuahnak lamah Salekah le Edrei khuapi pawl tiangin kan lak òheh a si.”
11 Siangpahrang Og cu Refaim mi pawl sung ihsin a netabik ih a rung tangmi a si. A ihkhun cu thir ihkhun a si ih, pi hleili a sau ih pi ruk a kau. Cuih a ihkhun cu Ammon khuapi Rabbah ah atu tiang a um lai.
Jordan In Nisuahnak Lam Ummi Pawl
(Mipum 32:1-42)
12 “Cun hi ram hi kan lak tikah Arnon tiva kiangih ummi Aroer khuapi le a kimvel ram pawl le Gilead tlangpar ram le a khuapi pawl cu Reuben le Gad hrin pawl hnenah ka pek.
13 A tangmi Gilead ram le Bashan ram zate, Og ukmi Argob ram pumpi in Manasseh hrin a hrek pawl hnenah ka pek a si.”
Bashan ram a zate hin Refaim mi pawl ram an timi a si.
14 Cuih Bashan ram, Argob ram pumpi cu Manasseh fapa Jair in Geshur le Maakath ramri tiang a lak. Cuih ram ih khua pawl cu amah ih hmin suangin hmin a sak ih atu tiangin Jair khuate pawl tiah an ti lai.
15 “Manasseh hrin Makhir hnenah Gilead ram cu ka pek.
16 Cule Reuben le Gad hrin pawl hnenah Gilead le Arnon tiva karlak ram cu ka pek. Tivapi laifang cu thlanglam an ramri a si ih Ammon pawl ram ih ramri a simi Jabbok tiva cu saklam an ramri a si.
17 Nitlaknak lamah an ram cu Jordan tiva tiang a si. Saklam ah Galilee Tili in thlanglam ah Tipi Thi tiang, cule nisuahnak lam ahcun Pisgah Tlang hram tiang an ramri cu a feh.
18 “Cuih tlunah hitiin thu ka pek hai a si: “ Bawipa kan Pathian in hi Jordan tiva in nisuahnak lam ram hi nan luah dingah a lo pek. Atu ah nan ralkap pawl cu ralthuam thawn thuamter uhla Israel nan unau dang pawl an ram an luah thei venak dingah an hmaiah Jordan tiva ralah fehter uh.
19 Nan nupi pawl, nan faate pawl le nan òilva pawl, (òilva tampi nan nei ti cu ka theihmi a si) cupawl lawng ka lo pekmi khuapi sungah an um pei.
20 Bawipa in Jordan tiva in nitlaknak lamih ram a pekmi an luah hlan le nanmah bangin Bawipa in daihnak thawn cutawk ram ih a umter hai hlan lo nan unau dang Israel mi pawl cu nan òanpi pei. Cuih hnu lawngah ka lo pekmi ram ah nan kir thei ding,” ka ti.Ref 3:18-20 Jos 1:12-15;
21 “Cule Joshua hnen khalah, “ Bawipa nan Pathian in siangpahrang pahnih te parih thil a tuahmi na mit rori in na hmu thluh zo. Na do dingmi ram sungih minung pawl par khalah cuvek thotho in a tuah ding.
22 Cuti a si ruangah zohman òih hlah; Bawipa nan Pathian in nan ai ah a do ding,” ka ti.
Kanaan Ram Ah Moses A Luhter Lo
23 “Culai ahkhan, Bawipa ih hnenah,
24 “Maw Bawipa Pathian, thil mangbangza le thilmak zetzet na tuah dingmi pawl i hmuhmi hi a thawhnak lawng an si lai, tihi ka thei. Van ah siseh, leilung ah siseh, nangmah vekin thilmak zetzet tuah theitu pathian zohman an um lo.
25 Maw Bawipa, Jordan tiva cu i tanter awla khatlam ralih ramòha zet le tlangpar ram mawi zet le Lebanon Tlang cu i zohter ta hram aw,” tiah ka dil ciamco.
26 “Sikhalsehla nanmah ih ruangah Bawipa cu ka parah a thin a heng ih ka dilnak cu a ngai lo. “Tawk thlang seh! Hi thu cu rel nawn hlah!
27 Pisgah tlang parah hung feh awla saklam, thlanglam, nisuahnak lam le nitlaknak lam hung thlir aw. Jordan tiva ral na kai lo ding ruangah na hmuhmi pawl cu òha tein zohta aw.Ref 3:23-27 Mipum 27:12-14; Daan 32:48-52;
28 Joshua khal òha tein thu sim aw. Amah cu thazang pe awla cakter aw, ziangahtile na hmuhmi ram cu luah dingah misenpi pawl amah in a hruai ding a si,” i ti riangri.
29 “Curuangah Bethpeor khua ih khatlam ral phairawn ah kan um a si,” a ti.