30
Dinsuah Salnak Le Thluasuahnak
1 “Nan hril dingah thil pahnih, thluasuahnak le siatserhnak ka lo pek. Himi pawl nan parih an thlen tikah le Bawipa nan Pathian in a lo òhekdarhnak ram ih nan um tikah hi ka lo simmi hi nan theisal leh ding.
2 Cule nanmah le nan tefa pawl cu Bawipa ih hnenah nan kir dingih nan thinlung le nan nunnak zate in tuih sun ih ka lo pekmi Bawipa ih thukham pawl cu nan thlun ding.
3 Cutik lawngah Bawipa cun nan parah zangfahnak a nei ding. A lo òhekdarhnak ram ihsin a lo kirtersal dingih neinung zet in nan umsal ding.
4 Leilungtlun a kil le a dengih òhekdarhmi nan si khalle Bawipa nan Pathian in a lo finkhawmsal dingih,
5 nan pu le nan pa pawl an rak umnak ram ahcun nan umsal ding. Cule nan pu le nan pa pawl hnakin nan lian deuh dingih nan tam deuh fawn ding.
6 Nan thinlung zate le nan nunnak zate in nan duhdawt theinak dingah le nan nun theinak dingah Bawipa nan Pathian in nanmah le nan tefa pawl ih thinlung cu serhtannak a tuah dingih amah ih thu ngai duhnak thinlung a lo pe ding.
7 Hi camsiatnak pawl cu nanmah a lo huatu le a lo hremtu nan ral pawl ih parah Bawipa in a thlenter thluh dingih,
8 tuih sun ih ka lo pekmi a daan le a thupekmi pawl cu nan ngai dingih nan thlunsal ding a si.
9 Nan òuannak kipah Bawipa in hlawhtlinnak a lo pe dingih tefa le òilva tampi nan nei dingih nan lo in rawl tampi a suah ding. Nan pu le nan pa pawl neinung zet ih a tuah hai tikah khan a lung a awi bangtukin nannih pawl neinung zet ih tuah ding khalah a lung a awi zet ding.
10 Asinan a thuzirhmi pawl ngannak hi cabu sungih ummi a daan hmuahhmuah cu nan thlun ih a thu nan ngai a òul a si. Nan thinlung le nan nunnak cu a zate in amah ih hnenah pe uh.
11 “Tuih sun ih ka lo pekmi daan hi a har tukmi a si lo; nan thlun thei lo dingmi khal a si lo.
12 A sang tuk ih van a dai ti khal a si lo. “Kan hna in kan thei ih kan thlun theinak dingah zoso a hung kai dingih kan hrangah a run òhum ding?” nan ti ding a um lo.
13 Tipithuanthum ralih a ummi khal a si lo. “Kan hna in kan thei ih kan thlun theinak ding zoso tipithuanthum ralah feh tahrat in kan hrangah a rak keng ding?” nan ti ding a um lo.
14 A naite ah a um: Nan kaa sung le nan thinlung sungah a um. Nan thlun ding lawng hi a sam a si.Ref 30:12-14 Rom 10:6-8;
15 “Tuih sun ah a òha le a sia, nunnak le thihnak hril dingin nan hnenah ka lo pe a si.
16 Bawipa nan Pathian ih thukham, tuih sun ih ka lo pekmi hi nan thlun ih amah nan duhdawt, a thu nan ngai ih a daan nan tuah a si ahcun nan òhangso dingih miphun tum zet ah nan cang ding. Bawipa nan Pathian in nan luah dingmi ram ahhin mal a lo sawm hai ding.
17 Sikhalsehla a thu nan ngai lo ih nan thinlung hmundang hoi in khawzing dangdang tla nan biak a si ahcun,
18 tuih sun ahhin fel tein ka lo sim: Nan cimit thluh ding a si. Nan luah dingmi ram Jordan Tiva ral ahkhin caan sau nan nung lo ding.
19 Atu ah nan hril dingah nunnak le thihnak, asilole Pathian thluasuahnak le camsiatnak ka lo pe ih nan hrilmi theihpitu ah lei le van ka ko a si. Nunnak hril uh. Cuticun nanmah le nan tesinfa pawl nan nung ding.
20 Bawipa nan Pathian cu duhdaw uhla a thu ngai in amah cu pomhnget uh. Pathian cu nan nunnak a si ih nan pupa Abraham, Isaak le Jakob hnenih a kam cia mi ram ah kum reipi nanmah le nan tefa pawl nunkhawsau in nan um ding,” tiah a ti.Ref 30:20 Sem 12:7; 26:23; 28:13;