29
Moab Ram Ah Bawipa Ih Thukam
1 Moab ram an um lai ahcun Bawipa in Moses hnenah a tanglam thukamnak cu Israel mi hnenih sim dingin thu a pek. Hi thukam cu Bawipa in Sinai Tlang parah Moses hnenih a pek zomi hlei ah a pek betmi a si.
2 Moses in Israel misenpi pawl cu a kokhawm ih an hnenah, “ Bawipa in Izipt siangpahrang parah le a kuthnuai bawi pawl le a ram pumpi parih a tuahmi cu nan mit rori in nan hmu zo.
3 Rapthlakza natsia a phunphun, Bawipa ih tuahmi mangbangza le khawruahhar a phunphun tla nan hmu zo.
4 Sikhalsehla hi thil nan ton cia mi pawl ih a tican nan theih theinak dingah Bawipa in theih theinak a lo pe hrih lo.
5 Bawipa in kum sawmli sung rori nelrawn ramòhing ah a lo hruai hai ih nan hnipuan le nan kedam pakhat hman a òet lo.
6 Ei dingah sang nan nei lo ih in dingah sabit le zu tla nan nei lo; asinain Bawipa in amah cu nan Pathian a sinak nan theih theinak dingah nan òulmi hmuahhmuah cu a lo pek.
7 Cule hitawk ram kan thlen tikah Heshbon siangpahrang Sihon le Bashan siangpahrang Og cun in rak do. Asinan kan neh ih,Ref 29:7 Mipum 21:21-35;
8 an ram cu kan lak ih Reuben hrin, Gad hrin le Manasseh hrin a hrek hnenah kan pe a si.Ref 29:8 Mipum 32:33;
9 Curuangah nan hnaòuannak kipih nan hlawhtlinnak dingah hi thukam cu fel zet in nan thlun pei.
10 “Tuih sun ah nan zate in nan hotu pawl le nan upa pawl, mipa,
11 nunau le nauhak, nan lakah a ummi nan hrangih zanthing a hlamtu le tidai a khaitu ramdangmi pawl thawn Bawipa nan Pathian ih hmaiah nan ding a si.
12-13 Nan pupa Abraham, Isaak le Jakob hnenah a kam bangin le nan hnenih a kam bangtukin nannih cu Bawipa in amah ih minung ih a lo tuahnak dingah le nanmah ih Bawipa a sinak dingah tuih sun ahhin Bawipa nan Pathian ih thukamnak sungah lut uhla a lo tiammi pawl cu pom uh.
14 Hi thukamnak le tiamnak pawl cu nanmah hnen lawngah Bawipa in a tuah a si lo.
15 Bawipa ih hmaiah tuih sun ih a dingmi kan zate hnenah le a sem hrih lomi kan tefa pawl hnen khalah hi thukamnak cu a tuah a si.
16 “Izipt ram sungih khawsak daan le miphun dangdang ram sungih khualtlawn cu ziangvek a si, ti nan thei thluh zo.
17 Sui le ngun, lung le thingih tuahmi fihnungza an milem pawl tla nan hmu òheh zo.
18 Hitawkih a dingmi mipa, nunau, innsang le hrin pawl zovek hman Bawipa kan Pathian dungtun tahrat in miphun dangdang ih khawzing pawl bia lo dingah fimkhur zet in nung uh. Cubangtuk Bawipa dungtun tahrat ih miphun dang khawzing a betu cu a hram ihsin a hung cerhmi a khaa ih tur nei thingkung bangtuk nan si ding.Ref 29:18 Heb 12:15;
19 Tuih sun ah hivek siatcam thukamnak thei tahrat in mah ih thulungkhen neih ruangah, “Ka duh bangin ka feh dingih ka lamzin cu a tluang ko ding,” tiih a zumtu nan um lonak dingah fel tein ruat uh. Cubangtuk milai nan um a si ahcun hi misenpi miòha thawn miòha lo thawn, a siatsuahtu nan si ding.
20 Cubangtuk milai cu Bawipa in a ngaithiam hrimhrim lo ding. Bawipa ih thinhennak cu a parah meisa bangin a alh dingih leilung parih sin a hmin a hlohral hlan lo hi cabu sungih nganmi vanduainak le camsiatnak cu pakhat hnu pakhat a parah a thleng ding.
21 Israel misenpi ralrin peknak ah Bawipa in amah hrimhrim cu a hmang dingih Bawipa ih thukamnak sungih nganmi siatserhnak hmuahhmuah cu a parah a thleng ding.
22 “Hmailam san tampi sungah nan tefa pawl le lamhlapi ih a ummi ramdangmi pawl in nan khua le nan ram parih Bawipa ih thil a tuahmi harsatnak le vanduainak pawl cu an hmu ding.
23 Nan ram cu a kolh òheh dingih kaat le ci in a khat ding; zianghman ciin theih a si lo dingih belh hman a kho thei lo ding. Nan ram cu Bawipa a thin a heng ih a rak siatsuah mi Sodom le Gomorrah, Admah le Zeboiim khua pawl a bang ding a si.Ref 29:23 Sem 19:24, 25;
24 Cutikah leilungtlun miphun hmuahhmuah in, “Ziangahso Bawipa in an ram cu hibangtuk lawmmam in a tuah? Ziangruangah so Bawipa cu a thin a heng?” tiah thu an sut ding.
25 Cule thulehnak cu, “ Bawipa, an pu le an pa ih Pathian in Izipt ram ihsin a runsuak lai ih anmah thawn thukamnak a tuahmi kha an bal ruangah a si.
26 Pathian dangdang nan biak lo pei, tiah Bawipa in a khammi, a hlan khalah an biak dah lomi khawzing cu an biak ih a hna an òuan.
27 Curuangah Bawipa cu a minung parah a thin a heng ih an ram ah hi cabu sungih nganmi camsiatnak pawl cu a thlenter.
28 Bawipa cu a thin a heng zet ih a minung pawl cu an ram ihsin a phih suak hai ih ramdang ah a hlon; tuih sun tiang cunah an umta a si,” ti a si ding.
29 “ Bawipa kan Pathian in a phuan lomi thuthup tampi a hnenah a um. Asinan a Daan cu a phuang zo ih kannih le kan tefa pawl in sanikhuk in kan thlun dingmi a si.”