11
1 Amah Michael cu i bawmtu le i òantu dingah òuanvo neitu a si.
2 Cule atu ih ka lo sim dingmi hi thudik a si,” a ti.
Vancungmi cun, “Persia ram cu siangpahrang pathum in an uk hrih ding. A palinak siangpahrang cu a dang pawl hnakin a lian deuh ding. A cah bik le a lian bik laitak ahcun Grik ram a zuam ngam ding.
3 “Cule a ralòha zetmi siangpahrang pakhat a hung suak ding. A ukmi ram cu a kau ngaingai dingih a duhmi poh a tuah hluahhlo ding.
4 Asinan a cah bik laitak ah a ram ukmi cu a òhen aw thluh dingih ram pali ah a cang ding. Amah ih tesinfa a si lomi in a ai ah siangpahrang an òuan ding, sikhalsehla amah tluk cun zohman in huham an nei lo ding.
Izipt Le Siria Ram Pawl
5 “Izipt ram siangpahrang cu a cak zet ding. A ralbawi tum bik pakhat cu amah hnakin a cak sawn dingih a ram ukmi tla a kau sawn ding.
6 Kum tampi hnuah Izipt siangpahrang in Siria siangpahrang thawn òantlangnak cakhen an tuah dingih a fanu tla a nupi dingah a pe ding. Sikhalsehla cuih cakhen cun rei a awh lo ding. Izipt siangpahrang ih fanu, a pasal, a faale amah a thluntu, siahhlawh pawl thah òheh an si ding.
7 Rei lo teah Izipt siangpahrang fanu ih sungkhat siangpahrang a cang ding. Siria siangpahrang ralkap pawl a do ding; an ral òannak ruhkulh sung tiangin a nor dingih a neh ding.
8 An khawzing lem pawl le an khawvang pawl hnenih pekmi sui le ngun ih tuahmi thilri pawl cu Siria ihsin Izipt ah a phurkir ding. Kum rei nawn daihnak a um hnuah,
9 Siria siangpahrang in Izipt ram a do ding; asinain a siipsal a òul ding.
10 “Siria siangpahrang fapa pawl in raldo dingah an tim an tuah dingih ralkap tam ngaingai an khawm ding. Siangpahrang fapa lakih pakhat in ral pawl ih òanhmun an khuarnak cu tilian bangin a do ding.
11 Cutikah a thinheng in Izipt siangpahrang in Siria siangpahrang cu a do dingih a ralkap tam ngaingai a kai ding.
12 Cutiih ral a neh ruangah le Siria ralkap tampi a thah ruangah cun a hngal zet ding; asinain ral cu a neh ringring lo ding.
13 “Siria siangpahrang khal a kirsal dingih a hlan hnakih ralkap tamdeuh in a khawm ding. A tikcu a remcan tikah hriamnam òha zet kengtu a ralkap siar cawk lo thawn Izipt do dingah a pan ding.
14 Cutikah Izipt mi tampi cu an siangpahrang duh lo ah ral an tho ding. Cule Daniel, na miphun sungin mithah òih lomi hrekkhat cu, langnak an hmuh ruangah ral an tho ve ding; sikhalsehla an sung ding.
15 Curuangah Siria siangpahrang cun ralhruang ih kulhmi khuapi cu a kulh dingih a la ding. Izipt ralkap pawl cun an do thei nawn lo ding; an ralkap lakih a cakbik pawl hman raldo dingah thazang an nei nawn lo ding.
16 Ral nehtu Siria cun dotu zohman nei lo in a duhduh a tuah vivo ding. Ram Tiam ah a ding dingih cuih ram cu a kut sungah a hum ding.
17 “Cule Siria siangpahrang cun raldo dingah a ngaihtuah ding; a ralkap hmuahhmuah hman a tum ding. A ral ram siatsuah òheh dingah a ral thawn òantlangnak cakhen a tuah dingih a fanu tla a nupi dingah a pe ding. Asinan a tumtahmi cu a tisuak lo ding.
18 Cuih hnuah tifinriat kap ram pawl a do dingih ram tampi a neh ding. Sikhalsehla ramdang pakhat uktu bawi in amah cu a neh dingih a puarthaunak cu a cemter ding; a puarthaunak cu amah Siria siangpahrang par lala ah a thlenter ding.
19 Siangpahrang cu amah ih ram ralòannak ralhruang ah kir tahrat in a òang ding nain a sung thotho ding; cuticun anih khal a cem ding.
20 “Amah ih hnuah siangpahrang dang pakhat a suak ding. Cuih siangpahrang cun a ramsung paisa òhanter duh ah a kuthnuai bawi pakhat a fial dingih a ram minung pawl hnen ihsin ngunkhuai tampi in a la ding. Rei lo teah cuih siangpahrang cu an that ding, sikhalsehla mizapi hmuh ah a si lo dingih raldonak hmun khalah a si lo ding,” tiah a ti.
Miòha Lo Siria Siangpahrang
21 Vancungmi in a simfiang vivo ih, “Cuih siangpahrang a hun sangtu Siria siangpahrang cu miòha lo, mi siakha zet a si ding; siangpahrang can theinak lamzin khal a nei lo ding nain rinlopi ah mibumnak in siangpahrang thuneihnak cu a long ding a si.
22 Amah a dodaltu cu, Pathian ih Puithiam Sang a si khalle, hlonhlo le hnonhlo a si ding.
23 Cakhen tuah tahrat in ram tampi a bum ding; ram fate uktu asinain ni khat hnu ni khat a cak deuhdeuh ding.
24 Rinlopi ah a lian zetmi peng a do dingih a pupa pawl ih tuah dah lomi thil a tuah ciamco ding. Raldonak ih a lakmi le a lonmi hransaw thilri pawl cu amah a thluntu pawl a zem ciamco ding. Ralhruang tampi do dingah a tum lawk ding nain a rei hlanah a tikcu a cem ding a si.
25 Ralòha zet in Izipt ram do dingah ralkap tampi a la ding; Izipt siangpahrang khal amah do dingah ralkap tam zet le cak zet thawn a tiar aw ve ding. Asinan Izipt siangpahrang cu phiarnak a tong dingih a hlawhtling lo ding.
26 A thuron bikmi pawl in an siatsuah ding; a ralkap tampi thah an si dingih an òekdarh òheh ding.
27 Cule siangpahrang pahnih cu cabuai pakhat ah rawl an hil tlang ding; sikhalsehla an thinlung cu a òha lo veve dingih pakhat le pakhat an bum aw ton rero ding. An tumtahmi cu an tisuak lo ding, ziangahtile a tikcu a kim hrih lo.
28 Siria siangpahrang cu a lonmi thilri hmuahhmuah thawn a tlungkir ding; Pathian minung pawl ih biaknak siatsuah òheh tum in a tlungkir ding. A duhduh a tuah vivo dingih amah ih ram ah a kir ding a si.
29 “Nehhnu ah Izipt ram a dosal ding; sikhalsehla a hlan vekin thil a cang thei lo ding.
30 Rom miphun pawl amah do dingah lawng thawn an ra dingih a thin a phang ding.
“Cule a thinheng in a kir dingih Pathian minung pawl ih biaknak siatsuah a tum ciamco ding. Mah ih biaknak a tlansantu pawl ih ruahnak pekmi kha a thlun ding.
31 A ralkap hrekkhat pawl cun Biakinn an borhhlawhter ding. Nitin thawinak pekmi cu an cemter dingih thil Fihnung Tuksumza an ret ding.Ref 11.31 Dan 9:27; 12:11; Mat 24:15; Mar 13:14;
32 Cuih siangpahrang cun hrokhrawlnak thawn hna a òuan ding ruangah an biaknak a dungtuntu pawl cun an bawm ding; sikhalsehla Pathian a thluntu pawl cun an do ding.
33 Mipi lakih hotu fim pawl in an fimnak kha mi tampi hnenah an hlawm ve ding. Asinan a rei hlanah cupawl òhenkhat cu raldonak ah an thi dingih òhenkhat meisa tla in an ur that ding. Cule mi òhenkhat cu an thilri lon sak an si dingih thawng ih thlak an si ding.
34 Cutiih thahnak an tuar rero lai ah Pathian minung pawl cu bomnak malte an ngah ding; anmah òantu mitampi cu mah ih zawnruahnak ruangih òantu an si ding.
35 Cuih hotu fim hrekkhat pawl cu thahnak an tuar ding nain cutiih tuarnak ruangah misenpi pawl cu an thiangfai deuh ding. Cuticun caan netnak, Pathian ih a khiahmi caan, a thlen hlan cu a si vivo hrih ko ding.
36 “Siria siangpahrang cun a duhduh a tuah ding. Ziangvek khawzing hnakin ka tum sawn, tiah tluang a khawng dingih Cungnungbik Pathian hnak hman in ka maksak sawn, tiah a porh aw ding. Pathian hremnak a ton hlan cu, cutiin a ti thei vivo ko ding. Asinan Pathian cun a tumtah vek cekci in a tuahsuak ding.Ref 11.36 2 Thes 2:3, 4; Thup 13:5, 6;
37 Siangpahrang cun a pupa pawl ih an rak renmi khawzing, le nunau pawl ih an duh zetmi khawzing khal zianghman ah a siar lo ding. Ziangbangtuk khawzing hman a poisa lo ding, ziangahtile khawzing hnakin ka tum sawn, tiah a ruat aw ding a si.
38 Cuhnakin ralhruang a humhimtu khawzing a upat sawn ding. A pupa pawl ih an biak dah lomi khawzing hnen sawnah sui le ngun, lungmankhung le laksawng sunglawi dangdang a pe ding.
39 A ralhruang pawl ihsin òangtu dingah ramdang khawzing betu pawl a hmang ding. Amah kha in uktu bawi na si, tiih a saangtu pawl cu upatnak, hminòhatnak, hnaòuan tum pipi le laksawng ah leiram a pe ding.
40 “Siria siangpahrang ih netnak tikcu a kim cuahco thlang tikah Izipt siangpahrang in amah kha a do ding; cule Izipt siangpahrang cu a cahnak zate, a rang le a rangleng pawl le lawng tampi thawn a do ve ding. Tilian bangin ram tampi a do ding.
41 Ram Tiam hman a do dingih a thawng a thawng in a that ding; sikhalsehla Edom ram, Moab ram le Ammon ram a tang hrihmi pawl cu an luat ding.
42 Hi ram pawl a do tikah cun Izipt ram hman a luat lo ding.
43 Izipt ram ih an thuhmi hlawnthil, sui, ngun le a dang thil mankhung pawl a la òheh ding. Libia ram le Ethiopia ram tla a neh ding.
44 Cule nisuah lam le saklam ihsin a thlengmi thuthang in a thin a phangter ding; thinòeu zet in a do sinsin dingih khua le ram tampi a siatsuah dingih mi tam ngaingai a that ding.
45 A siangpahrang puanthlam pawl hman cu tifinriat le Biakinn dinnak tlang karlak ah a sak ding. Sihmansehla cutawkah zohman bawmtu nei lo in a thi ding,” tiah a ti.