26
Paul In Agrippa Hmai Ah Thu A Sim
1 Agrippa in Paul hnenah, “Na thuhla cu na sim thei,” tiah a ti. Paul in a kut a hun thlir ih a òannak thu cu hitiin a sim:
2 “Siangpahrang Agrippa, tuih sun nangmah ih hmaiah Judah mi pawl ih sual in puhmi thu pawl let ve theinak caan ka ngah ruangah mi vanòha ngaingai ka si tiah ka ruat aw.
3 Judah mi daan hmuahhmuah le thu an elawknak pawl a thei òhehtu na si ruangah mi vanòha ih ka ruahawk cuangnak cu a si. Thinsau tein i ngai hram aw, tiah zangfah ka lo dil.
4 “Judah mi pawl hmuahhmuah in ka nuncandan cu ka nauhak lai ihsin in thei òheh. Ka nuncan khawsaknak thuhla pawl, a hmaisa ah keimah ih miphun hnenah, a neta ah Jerusalem ah, a zate in an theih òhehmi a si.
5 Ka thuhla cu sim an duh a si ahcun an sim pei, an theih ringringmi a si. A hramthok ihsin kei cu kan biaknak lam ahcun a fektukmi Farasi pawl ih sungtel ka si.Ref 26.5 Tirh 23:6; Fili3:5;
6 Tuih sun hitawkah ka thu rel dingin ka dinnak khal hi Pathian in kan pu le kan pa pawl hnenih thukamnak a tuahmi kha ruahsannak ka neih ruangah a si.
7 Cutiih ruahsannak ka neihmi cu kan miphun phun hleihnih pawl in Pathian kha a sun a zan in an rak biak lai ih ruahsannak an rak neihmi thotho a si. Cuih ruahsannak ruangah cun Siangpahrang Bawipa, Judah mi pawl in taza in cuainak hi a si!
8 Hitawkih a rami pawl, Pathian in mithi a thawhter tihi ziangahso a cang thei lomi thilah nan ruat?
9 “Nazareth mi Jesuh ih thuhla cu ka do thei tawkin ka do ding, tiah keimah rori in ka rak ruah dahmi a si.Ref 26.9 Tirh 8:3, 22:4-5;
10 Cumi cu Jerusalem khua ih ka rak tuah rero dahmi a si. Puithiam upa pawl hnen ihsin thuneihnak ka ngah ih Pathian minung pawl tampi thawng ah ka thlak. Thah dingih thurel an si tikah ka lungkimnak langternak ah ka kut ka rak tung ve òheu.
11 Vei tampi sinakok sung rori ah ka hremter hai ih an zumnak bansan hai seh tiah ka zuam thei tawkin ka rak zuam. An parah ka thin a heng tuk ih anmah hrem dingin ramdang khua pawl tiang ka thleng dah a si.
A Lungthlengnak Thu A Sim
(Tirh 9:1-19; 22:6-16)
12 “Cutiin anmah hrem duh rori ahcun Puithiam upa pawl hnen ihsin thuneihnak ca ka lak ih Damaskas khua ah ka feh.
13 Maw siangpahrang Bawipa, sun laifangih Damaskas lamzinih ka feh rero lai ah ni hnakin a tleu deuhmi tleunak van ihsin a rung thleng ih keimah le ka fehpi mi pawl ih kimvel kha a run tlet.
14 Kan zate in leilung ah kan tlu ih Hebru òong in aw pakhat ka thei ih, ‘Saul, Saul, ziangahso i hrem rero? Cawcang in a neitu pa ih fung a saih tikah amah a natter awk sawn vekin nangmah na nater aw sawn a si,’ tiah a ti.
15 ‘ Bawipa, zoso na si?’ tiah ka sut. Cule Bawipa in, ‘Na hremmi Jesuh ka si.
16 Tho awla na ke in ding aw. Keimah i rian dingin ka lo hril duh ruangah na hnenah ka lang a si. Tuih sun ih kei i tonnak thu le hmailam ih ka lo hmuh dingmi thu pawl hi midang hnenah na sim pei ih ka thutheitu na si pei.
17 Nangmah cu Israel mi le Zentail mi hnenah ka lo thlah dingih an kutsung ihsin ka lo runsuak ding.
18 An mit na mengter dingih thimnak sung ihsin tleunak ah, Satan cahnak sung ihsin Pathian hnenah na kirter hai ding. Cuticun keimah in zumnak thawngin an sualnak tla cu ngaidam an si dingih Pathian ih thianhlimtermi pawl lakah an tel ve ding,’ tiah i ti.
Paul In A Hnaòuannak A Sim
19 “Cuti a si ruangah, Siangpahrang Agrippa, van ihsin langnak ka hmuhmi ih thu cu ka el thei lo.
20 Hmaisabik ah Damaskas khua ah, cule Jerusalem khua ah, cuih hnuah Judea ramsung hmuahhmuah le Zentail mi hnen khalah ka feh ih, ‘Nan sual siir aw uhla Pathian hnenah kir uh; cule nan sualsirnak langtertu hnaòuan kha òuan uh,’ tiah thu ka sim vivo.Ref 26.20 Tirh 9:20, 28-29;
21 Cutiih ka ti ruangah Judah mi pawl in Biakinn sungah in kai ih a thah tiangin in tum a si.
22 Sikhalsehla tuih sun tiangah hin Pathian in i bawm ih atu ah, nanmah a tum a seen ti lo in nan zate hmaiah ka hmuhmi thu cu ka sim a si. Ka simmi thu hi Moses in siseh, profet pawl in siseh, a cang ding tiih an rak sim cia mi an si.
23 Cutiih an simmi cu ziang a si tile: Tleunak rundamnak thu cu Judah mi le Zentail mi pawl hnenih than dingah Messiah in tuarnak a tong dingih, cuih hnuah thihnak ihsin a nungsaltu hmaisabik a si ding, ti a si,” tiah a ti.Ref 26.23 Isa 42:6, 49:6; 1 Kor 15:20;
24 Paul in a òannak thuhla cutiin a sim tikah Festas in, “Paul, na aa zo a si! Na zir tamtuknak in a lo aatter zo a si hi!” tiah a hei auh.
25 Cutikah Paul in, “Bawipa Festas, ka aa lo sokhaw! Lungfim tein thutak ka lo sim a si!
26 Maw Siangpahrang Agrippa, na hnen ahcun suupmi nei lo ralòha zet in ka òong; ziangahtile nang cu hi thu pawl hmuahhmuah hi a thei òhehtu na si. Pakhat hman hrelh lo in na hminsin òheh ko ding tiah ka zum, ziangahtile hitiih ka simmi pawl hi zo ih theih lomi, a kelkawm ih thuhmi pawl an si lo.
27 Siangpahrang Agrippa, profet pawl na zum maw? Na zum a si, ti ka thei!” tiah a ti.
28 Agrippa in Paul cu, “Hi tikcu tawite sungah Khristian canter i tum maw si?” tiah a ti.
29 Paul in, “A caan tawite ah siseh, caan saupi ah siseh, nangmah le tuih sun hitawkih ka thu a ngaitu hmuahhmuah hi nan zate in, hi ka kut ih thir cikcin siar lo, keimah vek si òheh uhla tihi Pathian hnenih ka thlacamnak a si,” tiah a ti.
30 Cule Siangpahrang Bawipa, Mangki Bawipa, Bernis le midang pawl tla an tho ih,
31 an feh hnuah pakhat le pakhat, “Hi pa hi thah tlak le thawng thlak tlak sualnak a tuahmi a um ual lo,” tiah an ti aw.
32 Cun Agrippa in Festas hnenah, “Rom siangpahrang hnenah azu khan hlah sehla, hi pa hi thlah theih mai a si ko ding nain!” tiah a ti.