1 Kona kkhaan kho ngshä noh shak jah pek kti mlik tui ah nah mhnüh. Asuna tui sun lung yeena kba ngsiim lü Pangsiim jah To Sa-a Booi ngoh naaka kkhyüh puut lok kti. 2 Asuna mlik tui sun mlüh-a lam nua nglunga loong kti. Mlik tuia yi yea xün naaka thing dung vek kti. Asuna xün naaka thing dung sun mjü xalei nghngih-a ngthei kti. Ah nih sun akhya tä lü ngthei kti. Asuna thinga hnah ta kkhyaang mjü naküta mya naak be ni. 3 Mlüh k'uma Pangsiima yün she ei i phi am ve ti. Pangsiim jah To Sa-a Booi ngoh naak mlüh k'uma velü ah xüh shoh-e noh hjok khah ktie. 4 Ah nih nih-e noh Booi Pa-a mik hmaai hmu-ulü ah ngming ah nih msa yü üng ng'yuk kkhai. 5 Mthan am ve ti. Mei phäih-a kvaai am ani üng kho mika kvaai am hlü ti. I lüni ti ta Booi Pa Pangsiim ah nih nih-ea kvaaia thoon kkhai. Aksüün tä lü ngshääi ei ktia shang phuhlangea thoon lü up kkhaie. 6 Kkhaan kho ngshä noh kei üng “Ahina kkhyü nglung sang lü üm naak vai ngkäih kti ni. Booi Pa Pangsiim noh shahma ngsiime üng ah Mkhyangsiim jah pek kti. Ah xüh shoh-e üng asuna monge i vei am lo thoon velok kkhai ati sun jah mhnüh kkhaia Pangsiim noh ah kkhaan kho ngshä ah tüih lo ni” ah ti.

7 Booi Jeishüh noh “Ngngaai ua. I veei am lo kah lobe kkhai ni. Ahina sa up üng ng'yuk kti malam pyen shääm kyet kti üng ta do kya naak vek kti” ah ti. 8 Kei, Johaan noh ahina thoon ve ngjalü kah hmuk kti. Kei noh abäng hmu-ngjapääng ngüshe nah mhnüh kti kkhaan kho ngshäa ah kho ma-a ngbok lü hjok khah kkhaia kah ngtääng kti. 9 Lüphi ah nih noh “Käh käh, käh ngbok xa-a. Kei hin phi nanga kba xüh shoh hnga ve ni. Nah be na shahma ngsiime jah ahina sa up üng ng'yuk kti malam pyen jah shääm kyet kti abängea khuut poh püia phi kah thoon kti ni. Pangsiim däk hjok khah-a” tilü ah pyen. 10 Kona kkhaan kho ngshä noh “Ahina sa up üng malam pyene käh jah thupa. I lüni ti ta ahina athoon ve lo vai säh lohnüh kti ni. 11 Mkhye mshoh kti noh ta mkhye mshoh ei lä she. Mtuih mleh kti phi mtuih mleh ei lä she. Angpyuuna vek kti phi ngpyuun ei lä she. Ngsiim ngsaih ktia kkhyaang phi ngsiim ngsaih ei lä she” tilü ah pyen. 12 Booi Jeishüh noh “Ngngaai ua, i vei am lo kah lohnüh kkhai ni. Kkhyaang naküte ah nih poh mshah-a kba kah jah peet be vai kheen kah lo püi kkhai ni. 13 Kei hin Alapha jah Omeka ni. Aksük jah akpäih naak ve ni. Kei hin sut ei naak jah akhüt naaka kah thoon kti. 14 Ah shui shak ngsiim ngsaih ktia mshop kti noh do kya naak yah kkhai. Asun üng ah nih nih-e noh xün naak thing dunga ktheih ei yah kkhaie. Asun üng va ah nih nih-e sun mlüh-a mkot üng lut yah kkhaie. 15 Mlüh kpunga ui üng täng ktia kkhyaang, shong mah ktie, boh bah ktie, kkhyaang hnim ktie, mhnama lup hjok khah ktie, hleei hlak lü kkhyaang jah tuui ten ktie veyah kkhaie ni. 16 Nang noh ahin kba athoon ve lo vaia mong shaangea veei nah shak shi khoh vai kei Jeishüh noh kah kkhaan kho ngshä nah veeia kah tüih lo pääng ni. Kei hin Davita phung nua thoon ngüshe Davita kkhyüh phi kah tui kyum lok kti ni. Kei hin lik lika vaai kti thaih ke aai shi ni” tilü ah pyen. 17 Mkhyangsiim jah To Sa-a sa ngla noh “Lo be hnüh-a” tilü ah nih pyen. Ahin ngjak kti naküt noh phi “Lo be nüh-a” tilü pyen u she. Tuia kkhyoot ei naküt lo she. O hlü naküt kti noh aphu käh pe xalü xün naak tui o she. 18 Kei, Johaan noh ahina sa up üng ka malam pyen ngjak kti naküt üng angseeia kah ning jah msääi kti ni. Ahina malam pyenea thea kkhyü mshap ktia kkhyaang üng Pangsiim noh ahina sa up üng ng'yuk kti khui kha naake üng mtaam pek kkhai ni. 19 Avai shüa ahina sa up üng malam pyene üng ka kkhyü nglung jah mkhyüh ktia kkhyaang vek kkhai ni. Asun kba jah mkhyüh kti üng ta ahina sa up üng ng'yuk kti xün naak thing dunga ktheih Pangsiim noh ah shoon am pe. Kona ngsiim ngsaih kti mlüh k'uma phi am ve shak. 20 Ahina monge üng shak shi kti noh “Ää, i vei am lo kah lo be hnüh kkhai ni” ah ti. Amen. “Booi Jeishüh-o, lo hnüh-a” 21 Booi Jeishüh-a bä naak Pangsiima kkhyaange bäng üng ve ei lä she. Amen