16
1 Kah nih na nghnu Pho Pe hin Khen Kejah mlüh shaanga khuut poh lü Pangsiim kphya nalü jum ei naak ngkhääng kti ati sun kah ning jah mtheh hlük kti ni.
2 Pangsiima kkhyaange üng alooi ngkäih-a kba ah nih sun Booi Pa Khritoa ngming üng akdoa dou daang ua. Ah nih üng hlü kti ave ta ku ei ua. I lüni ti ta kei üng sut ei lü jum ei kti kho hah jah ku ei kti ni.
3 Booi Jeishüh-a khuut kah jah poh püi Phyiki Lah jah Aküüi Lah phi kah jah shüüm kti atia nah jah mtheh peet ua.
4 Kah shak ah nih nah yung naak üng thi-khyäü kti xooi ni. Kah jah je ei ni. Lüphi kei kah pät däk noh am ni. Amjü kse shaange noh phi ah nih xooi sun jah je ei ktie ni.
5 Ah nih ima vek kti shaang phi kah shüüm kti. Kah kphya naak kah looi püi Epa Netüh phi kah shüüm kti. Ah nih hin Asha hnea aksük dä däa Booi Jeishüh jum ei loma ktia kkhyaang ni.
6 Kah khuut nah ku ei kkhüt kti kah na nghnu Marih phi kah shüüm kti.
7 Kah hlonga khup üng kyum khoi kti Jüdah mjü kah püiea thoon kti Anto Niküh jah Juni phi kah jah shüüm kti. Ngshäe abäng noh ah nih xooi sun ah nih jah kshing kkhüt ni. Keia hlaana Khrito jum ei ma kti xooi ni.
8 Khrito üng kah kphya naak kah looi püi Ampilah sun kah shüüm kti tia mtheh ua.
9 Khritoa khuut poh püia thoon kti Upa Nun jah kah kphya naak kah looi püi Sha Kih phi kah jah shüüm kti.
10 Khrito üng kkhyü shing üng vek kti Apheih Let phi kah shüüm kti. Arito Püluh-a kkyoong abäng phi kah jah shüüm kti.
11 Jüdah mjü üng kah püi Herot kah shüüm kti. Nashi Küh-a kkyoong üng ka Khritjaan be nae phi kah jah shüüm kti.
12 Booi Pa-a khuut poh kti xooi Tüphanah jah Tipho Sa phi kah jah shüüm kti ati sun nah jah mtheh peet ua. Booi Pa-a phäh mtun ei kkhüt lü khuut poh kti kah kphya naak kah looi püi Perih phi kah shüüm kti ni.
13 Booi Pa-a khuut ah poh naak üng nglou ngthang kti Yung Puh phi kah shüüm kti tia mtheh ua. Anghläia ah sa kpa-a kba nah bük teng kti ah nu phi kah shüüm kti ni.
14 Ashum Khitüh, Pe Koon, Henem, Patoh Pa jah Hemah nih-ea dä vek ktie Khritjaan be na abäng kah jah shüüm kti.
15 Pilo Küh jah Juliah, Nerüh jah ah na nghnu Olüüm Pa nih-ea dä vek kti Pangsiima kkhyaange abänga kah jah shüüm kti.
16 Ngsiim ngsaih kti uut mhnam naak üng mat noh mat uut mhnam u kti lü nah nih püi dou daang ua. Khritoa shaang abänge noh nang nih-e phi ning jah shüüm ktiea pyen ktie ni.
17 Kah be naeo, shaang ngkhoi ngpa shak ktie, kkhyaangea jum ei naak jah up lat shak ktie jah aksük dä däa nah nih dou daana msuh mtheh naak kpet mjak ktie sun jah mseei ua. Asune sun nah nih jah mphen ei vai ashih deen kuunga kah ning jah sük hlük ktie ni.
18 I lüni ti ta asun kba thoon ktie hin nih Booi Pa Jeishüh-a khuut poh ktie am ni. Ah nih päta kkhon nu vai poh ei ktie ni. Ah nih kkhyü tui lü kkhyaang jah mküüi mkhyah ulü am dang ei yah ktie sun jah up lat shak ulü jah mhleei mhlak ktie ni.
19 Nang nih-e noh Pangsiima kkhyü nah nih ksang nak ktie ati sun ngja-hü päih hnüh ktie ni. Asuna phäh kah je kyai tong kti. Do ktia ngkho üng pum ngyam ve u kti lü akshea ngkho üng ta anghmoonga kba nah nih thoon vai kah hlü ei ni.
20 Diim deih naak jah pek kti Pangsiim noh i vei am nghjook kti Shatan yaai pa sun nang nih-ea kho pha kkea yeh byen-in kkhai ni. Nih Booi Jeishüh Khritoa bä naak nang nih-ea dä veshe.
21 Khuut kah poh püi Timotih noh nang nih-e ning jah shüüm ktia pyen kti ni. Jüdah mjü kah püie Lushi, Jasoon jah Sho Tipah noh phi ning jah shüüm ktie.
22 Kei, Tetuh noh ahina Polüh-a sa yuk peet ngüshe Khrito üng kah ning jah shüüm ktie ni.
23 Kei nah kkhin nak kti Kajüh noh phi ning jah shüüm ktiea pyen kti. Ah nih-a ima shaang noh phi ngkhääm naak poh khoi ktie. Mlüh-a ngui kshääma thoon kti Eratuh jah kah nih na Katüh noh phi ning jah shüüm ktie.
24 (Nih Booi Jeishüh Khritoa bä naak nang nih abäng üng ve she.)
25 Pangsiim nih mküüi mtou vai u. Nah nih jum ei naak angkhääng vaia ning jah ku ei khoh kti ni. Keia kpyaü Khritoa mong thang kdo kkya noh ahin kba jah msuuk mtheh kti. Ahin hin tuh hi ngshing ngte lolü kshoon kho vei ah süm-in Pangsiima thup ni.
26 Tuh hi ta shahma ngsiimea yuka sae üng Pangsiima thup sun pou lok kti ni. Asun üng Pangsiima mkhyah-a kba ah kkhyü sun kkhyaang mjü naküta veei kpyaü hü pääng ktie. I lüni ti ta ah nih bänge noh Pangsiima kkhyü sun jum lü ah nih ksang naak vaia phäh ni.
27 Pangsiim apät däk üng ni küm seei ktia theem ngvaai naak ave ta. Ah nih sun Booi Pa Jeishüh Khrito üng aksüün tä lü ngshääi ei ktia mküüi mtou u-she. Amen.