15
1 Jum ei naak ngkhääng kti nih nih-e noh jum ei naak ngseek kti be naea kkhaana mlung mshaaü lü ktha ah nih ngseek naak üng ah nih ngnääng vaia jah ku ei vai hlü kti. Nih pät da shoxat bük lü nih khäk shak vai am ni.
2 Nih bäng noh nih püia jum ei naak angkhääng naak lo vaia, ah nih-a do naak vai, ah hlü ei sun nih büh peet vai u.
3 I lüni ti ta Khrito phi ah hlü eia kba vek kti am ni. Sangsiim üng ang'yuka kba “Kkhyaange noh nang Pangsiim ah nih ning thang mseh u hin kei ah nih nah thang mseh naaka thoon kti” tilü vek kti.
4 Sangsiim üng ng'yuk kti abäng hin nih nih-e jah msuuk mtheh kkhaia ng'yuk kti ni. I lüni ti ta Sangsiim noh ktha mah lü nih ve vai jah nih mlunga shaaü vaia jah msuuk mtheh ktia thoon lü nih ääp ei naak khoh vek kti.
5 Pangsiim ah pät kuung noh nih mlung jah shaaü shak lü ktha jah pek kti. Booi Pa Jeishüh Khrito üng nglooi ei lü abäng mlung kko mat üng nah nih ve vai ua ahina Pangsiim noh ning jah ku ei she.
6 Asun kba ani ta nah nih bäng noh akthai mata kba nih Booi Pa Jeishüh Khritoa Pa Pangsiim sun nah nih mküüi mtou khoh kkhaie.
7 Khrito noh ah ning jah dou daana kba mat jah mat noh nah nih püi phi dou daang ua. Asun üng va Pangsiima jou taai phi ngshing ngte lok kkhai.
8 Kei noh nang hin kah ning mtheh ma kkhai. Pangsiim kkhyü shing üng vek kti ati sun ah jah mhnüh naaka Khrito hin Jüdah kkhyaangea xüh shoh-a thoon lok kti. Asuna phäh Pangsiim noh nih pu pae üng kkhyü taam ah jah peet sun küm seei lok kti.
9 Asun kba kkhyaang mjü kse-e noh phi Pangsiima ah jah mpyeen eia phäh mküüi mtou lokhoh kkhaie. Sangsiim üng ng'yuk kti ta “Asuna phäh nang Pa Pangsiim kkhyaang mjü kse-ea kshuunga kah ning je kyai ei kkhai ni. Pa Pangsiima ngming sun mküüi mtou lü kah ng'äi kkhai ni” tilü vek kti.
10 Sangsiim üng ng'yuk be tü kti ta “Kkhyaang mjü kse-eo, Pangsiima jah xü kse kkhyaangea dä je kyai ua” tilü ni.
11 Kona ng'yuk be tü kti ta “Amjü kse abängeo, Booi Pa mküüi mtou ua. Kkhyaang amjü kkümeo, mküüi mtou ua”
12 Shahma ngsiim Hei Shajah noh ah pyen ta “Jeishea mjü mjoonga kkhyüh kkhyaang mat lok kkhai. Amjü kse-e sun jah up kkhaia kaai lobe kkhai ni. Kkhyaang mjü kse-e noh ah nih ni ah nih ääp ei kom u.”
13 Jum ei ktiea ääp eia thoon kti Pangsiim noh nang nih-ea jum ei naaka phäh je kyai naak jah diim deih naak küm seei ktia ning jah pe-ushe. Asuna phäh Mkhyangsiima hiit üng nang nih-ea ääp ei naak ngshääi ei ktia däm lo bok bok kkhai ni.
14 Kah be naeo nang nih-e hin do naak jah theem naak amjü kküm üng nah nih be baang ktie ati sun kah mkhüh üp kti. Asuna thoon lü mat jah mat nah nih püi nah nih msuuk mtheh khoh ktie.
15 Lüphi ahina sa üng akhäka mong sun kah ning jah shüüm naak shaka angkyaai kuunga kah yuk lo ni. Pangsiim noh ah nah peet bä naaka phäh kei noh ahin kba kah yuk lo ni.
16 Kei hin amjü kse-ea phäh-a khuut bi kkhaia Khritoa xüh shoh-a kah thoon kti. Pangsiima thang kdo kkya kah kpyaü hü hin khotu ngsiima khuut kah poh kti ni. Amjü kse-e hin Mkhyangsiim noh jah ngsiim ngsaih shak lü Pangsiima dou daana looi ngkäih kti khah naaka ah nih thoon vai ua ahina khuut kei noh kah poh kti ni.
17 Asuna phäh Booi Pa Khrito üng nglooi ei lü Pangsiima khuut kah poh naak hin üng kah hmaai mah khoh kti.
18 Keia pyen jah kah poh mshah-a phäh amjü kse-e noh Pangsiima kkhyü ksang na-lok ktie ati sun Khrito noh kei üng khuut ah poh däk ni kah pyen hlü.
19 I lüni ti ta Khrito noh Mkhyangsiima hiit üng däm duh kti mün sam kshe jah ngshing ngte naake sun nah shum ei lü ah poh ni. Ahin kba kei hin Jeirüh Shalem mlüh-a kkhyüh Ilüh Rikum hnea kah seh shoa alam shok täh-a Khritoa thang kdo kkya küm seei ktia kah kpyaü hü pääng kti.
20 Keia nüt yaan ta Khritoa mong am ah nih ngjaak naak hama thang kdo kkya kpyaü hü vai ni. I lüni ti ta kkhyaang kse-e noh khuut ah nih sut ei naak pääng ua kei noh aktoih am lou ei hlü ngü.
21 Sangsiim üng ng'yuk kti ta “Ah nih-a mong am ngja-khoi ktie noh ah nih sun hmuk kkhaie ni. Ah nih veeia ah nih-a mong am pyen khoi ulüphi ngja-kya kkhaie ni” tilü vek kti.
22 Nah nih veeia anghläia kah lohlük kti kyo. Lüphi ahina monga phäh am kah lohlot kti ni.
23 Tuh hi ta asua keia khuut ngpääng hnüh kti. Nah nih veeia kah lo hlü phi kho kum kho vei lohnüh kti.
24 Asuna phäh Säpan pea kah seh shoa lopah ngüshe kah ning jah hmulok kkhai tia kah ääp ei kti. Nah nih veeia akhäk vei ve ngüshe je kyai naak üng ning nglooi ngtheeng ulü kah kdung seh naak be tü vaia phäh nah nih nah ku ei kkhaie atia kah ääp ei kti.
25 Tuh hi ta Jeirüh Shalem mlüh-a sit ma ngüshe asua vek kti Khritjaan be naea phäh ah nih jah ku ei naak kah jah tha vaai hlük kti ni.
26 I lüni ti ta Make Tonih hne jah Kärih hnea vek kti shaange noh Jeirüh Shalem mlüh-a vek kti mpyeen shek kti Khritjaan be naea phäh ngui ah nih jah msun peet u ni.
27 Ah nih nih-e noh Jeirüh Shalem mlüh-a Jüdah mjü üng ka jum ei ktie sun üng lei jah kkhih naak bea ngngaai ei lü je kyai naak üng ah nih jah ku ei u. I lüni ti ta amjü kse hin Jüdah-ea Mkhyangsiim üng shääng ei ktia do naak üng ngpüi ktie ni. Asuna phäh Jüdah-e phi amjü kse-ea do kya naaka thoon kti ngui xüi külak üng ah nih ngpüi be vaia ngkäih kti ni
28 Amjü kse-e noh ah nih msun u sun Jeirüh Shalem mlüh-a jum ei kti Jüdah-e üng kah jah mhjuum kona ta ahin kah khuut ngpääng kkhai ni. Kona Säpan pe da kah seh shoa nang nih-ea veei kah phalok kkhai ni.
29 Nah nih veeia kah lo üng ta Booi Jeishüh-a küm seei kti do kya naak üng kah lok kkhai atia kah kshing kti ni.
30 Kah be naeo, nih Booi Jeishüh Khritoa phäh Mkhyangsiima jah peet mhlä kphya naak üng mtun ei kkhüt lü Pangsiima ma-a nah tä sham peet ua tilü kah ning jah nghui na-hlük kti ni.
31 Jüdah hnea am jum ei ktiea kshuunga Pangsiim noh ah nah yung vai jah Jeirüh Shalem mlüh-a jum ei ktiea phäh-a ah nih msun msheh ngui kah lo püi sun je kyai lü ah nih dou ei vaia tä sham ua.
32 Pangsiima hlü eia athoon ta je kyai lü nah nih veeia phalo ngüshe nang nih-ea dä ning nglooi ei ulü xe nalü ktha nih yah ei kkhaie ni.
33 Diim deih naak jah pek kti Pangsiim noh nah nih bäng ayüma ning jah ve püi lä she. Amen.