27
(Marküh 15.1; Lükah 23.1-2; Johaan 18.28-32)
1 Ngooi lam nua ta khotu ngsiim kdäme jah Jüdah khong mange abäng noh Jeishüh thi-yah kkhai kuunga ah nih mkhyah u.
2 Ah kut mthi yüüi üng jah khih shak lü ah nih seh püi u. Romah aso-yah booi Pilata kut üng ah nih ap u.
3 Booi Jeishüh ah nih hnim vaia ah nih mkhyah sun ah jah hmuh üng Jüdah Sakarot puk shelo tong lü vuuk be kti. Ah kheen ah nih peet u ngui tangka kthum kip sun khotu ngsiim kdäme jah Jüdah khong mangea veei ah lo püi be.
4 Jüdah Sakarot noh “Kah mkhye pi pi kti ni. Ah bäü hma am velaang ktia kkhyaang kah thun ei ni” tilü ah pyen. Asune noh ta “Kei nih-e üng am shääng ei. Nah päta ma ni” ah nih ti be u.
5 Asun üng ta Jüdah noh ngui tangka sun hjok khah im nua kpyaai-in hüt lü shot kti. Athuuk naaka sit lü ah pät sun yüüi üng ng'ook vaai tong kti.
6 Khotu ngsiim kdäme noh “Ngui tangka sun ah nih hooi u. Ahina ngui hin kkhyaanga shaka phäh ah nih peeta ngui ni. Asuna thoon lü hjok khah im nua ngui msun naak üng xon vaia thuum üng am looi ngkäih” ah nih ti u.
7 Asun üng asuna ngui üng kkhyaang mjü kse-ea msüm hnün vai k'am mdek vok ktiea k'am mdek hnüna ah nih shui kho mdek sun ah nih kkhyäih naak u.
8 Asuna thoon lü asuna mdek sun tuh vei säpa thi mdeka ah nih shui u.
9-10 Asun hin shahma ngsiim Jeireh Mih-a malam pyena kba thoon lok kti ni. Ah nih noh “Isare kkhyaange noh ah nih-a shaka phäh ah nih peet vaia ah nih tääng u ngui tangka kthum kip lou ulü k'am mdek vok ktia mdek hnün ah nih kkhyäih u ni. Booi Pa noh asun kba ah jah poh shak ni” tilü anapyen.
(Marküh 15.2-5; Lükah 23.3-5; Johaan 18.33-38)
11 Jeishüh Pilat booia ma-a ah pha vaai üng Pilat booi noh “Nang hin Jüdah-ea ning shang phuhlang mä” tilü ah kthäh. “Ä, nah pyena kba ni” tilü Jeishüh noh am shak be.
12 Khotu ngsiim kdäme jah Jüdah khong mange noh Jeishüh ah nih mshuum ei u üng i phi am pyen be.
13 Asun üng ta Pilat booi noh “Ahin kba nua ah nih ning kbäü ei u ta am nah ngjaako” tilü ah kthäh.
14 Jeishüh noh ta am mshak be. Mkhap mat hngoh phi am pyen be. Pilat booi mün sam lotong kti.
(Marküh 15.6-15; Lükah 23.13-25; Johaan 18.39-19.16)
15 Pilat booi noh Phyong Pooi tä lü kkhyaang päa tong khup kkyum mat ah hläh khoia thuum vek kti.
16 Asun k'um üng Jeishüh Pana Pa ngming nak kti nglou ngthang kti kkhyaang kshe mat khupa k'uma vek kti.
17 Kkhyaang pä nu ngkhääm lo-ulü Pilat booi noh “U kah hläh vai nah nih hlü ei ktie ni. Jeishüh Pana Pa mä. Am ani üng Khritoa ah nih shui Jeishüh mä” tilü ah jah kthäh.
18 Khotu ngsiime jah Jüdah khong mange noh ngkeei ngku ulü Jeishüh sun ah kut üng ah nih ap u ati sun ah kshing ni.
19 Pilat booi si jaang ngoh naak üng ah ngshut k'um üng ah nghnu mi noh ah veeia kkhyaang tüih lolü “Asäna kkhyaang kdo pi pi sän üng am do kkhaia i phi käh poh bä. Ah nih-a phäh tuh mthan üng kah ngmang kshe üng khui kha kshe nu kah khaam ei kti ni” tilü ah pyen vaai shak.
20 Lüphi khotu ngsiim kdäme jah Jüdah khong mange noh Pana Pa bä bä hlät lü Jeishüh hin ta mkhyüh mhleih-a tilü ah nih tong vaia kkhyaang päe ah nih jah mhlon msook u.
21 Pilat booi noh “Ahin xooi üng u ni nah nih nah hläh hlü shak u” tilü ah jah kthäh. “Pana Pa bä bä hläta” tilü ngpyaang ktie.
22 Asun üng ta Pilat booi noh “Khritoa ah nih shui Jeishüh hin i a kah poh vai ni” tilü ah jah kthäh be tü. “Baan lam ktung üng thi-yah kkhai” tilü kkhyaang päe ngpyaang ktie.
23 Pilat booi noh “I lüni, i pi pi mkhye kti ni” tilü ah jah kthäh be tü. Kkhyaang päe noh ta “Baan lam ktung üng thi-yah kkhai, thi-yah kkhai” tilü ngpyaang lodäm däm ktie.
24 Kkhyaang pä nue sun khotu ngsiim kdäme jah Jüdah khong mange da ngpüi vaai hnüh ulüta i phi am poh khoh ti lü üng-phou loto kkhaie ati sun ah jah hmuh. Asun üng kbe kshung kung üng tui jah lo shak lü kkhyaang päea ma-a ah kut ah mthih ei. “Ahin keia phäh shak shi ni. Kei hin amkhye am vek kti ahina kkhyaang hnim naak jah ah thia ngshooi naak üng am shääng ei ngü. Nang nih-ea poh ni” ah ti.
25 Kkhyaang abäng noh “Ahina kkhyaanga thih naak hin kah nih päte jah kah nih sa kshoon na kbang üng shääng ei kti ni” tilü ah nih pyen u.
26 Asun üng ta Pilat booi noh Pana Pa sun ah jah hläh peet. Booi Jeishüh sun jah kpaai shak ma lü baan lam ktung üng ah nih hnim vaia ah jah ap-in.
(Marküh 15.16-20; Johaan 19.2-3)
27 Romah ktuk kpoh-e noh Pilat booia im k'uma ah nih seh püi u. (Ah nih seh naak püi booi im k'um sun Romah läka Perito Rum ni) Asua ngtuk kpoh pä abäng jah khü ulü ngkhääm päih ktie.
28 Jeishüh-a shui shak shuut ulü jih shen ah nih mshui lo u.
29 Nghling nghjuun sun lu ngbüna ven lü Jeishüh üng ah nih kbün lo u. Ah kkheet da ah kut üng kshong khe ah nih ksün shak u. Ah ma-a ah nih mkhuuk üng ngdääng lü lei shong ktia hana som ktie. “Jüdah-ea shang phuhlango, nah mya kti mä. Nah shak shaaü she” ah nih ti tuhan u.
30 Ah mik hmaai ah nih mshoh ei u. Kshong khe hut lü ah lu üng ah nih te byak byak u.
31 Asun kba ah nih yaih ei kona ah nih mshui mshak jih shen nu sun ah nih jah kshe shuh naak u. Ah shui shak kuung mshui be ma ulü baan lam ktung üng hnim vaia ah nih seh püi u.
(Marküh 15.21-32; Lükah 23.26-43; Johaan 19.17-27)
32 Ngtuk kpoh-e noh Jeishüh sun mlüh thea ah nih seh püi k'um u üng Shüreneh teng pea ka Shimon ngming nak kti sun ah nih hmuh u. Man ulü Booi Jeishüh-a baan lam ktung ah nih kkoh shak u.
33 Kolah Kotah ah nih shuia hnüna phalok ktie. (Asun ta Aramik läka ‘lu kooi’ ti hlü ni)
34 Asua shei tui kkha üng ah nih kso ngbom tui sun Jeishüh üng ah nih tu u. Lüphi mdep ma lü am o.
35 Baan lam ktung üng khop lü ah nih hneen u. Kona Jeishüh-a shui shak sun u noh i yah ei hlük kkhe tilü sung keek ngjuuk ma lü ah nih ng'yet ei u.
36 Ngshut ulü Jeishüh ah nih mtäh u.
37 “Ahin Jüdah-ea shang phuhlang Jeishüh ni” tilü sa yuk ulü baan lam ktunga mdong Jeishüh-a lu kkhaana ah nih kdap u.
38 Jeishüh-a kkheet lama mpyuk ei mat ah ksong lama mpyuk ei mat baan lam ktung mat siim üng ah nih jah hneen peh u.
39 Lam üng nglääng ngla ktie noh Jeishüh ktha msheet ei lü ah nih lu ah nih kting ei u.
40 Asune noh “Hä, hjok khah im nu phye ma lü mhnüüp kthum üng nah sha-hlü be kti sän ta a i ja. Nah pät noh nah pät kuum kyan ei ma-a. Nang hin Pangsiima sa kpa ksanga nah thoon ta baan lam ktung üng kyum lobea” tilü Jeishüh ah nih yaih ei hü pah u.
41 Khotu ngsiim kdäme jah Sangsiim ktheeme, Jüdah khong mange noh phi asun kba ah nih yaih ei u.
42 Asune noh “Kkhyaange ta jah kuum ei kti. Ah pät noh ah pät ta am kuum ei khoh kba. Isare-ea shang phuhlanga thoon kti am ni bä. Baan lam ktung üng kyum lobe tu she. Asun hmuh u ngüshe va kei nih-e noh phi kah nih ning jum kkhaie shü.
43 Pangsiim üm nak kti sun ta Pangsiim noh ah hlü ei ta tuh kuunga kuum kyan tu she. ‘Kei hin Pangsiima sa kpa ni’ tilü pyen hü khoi kti am ni bä” tilü ah nih yaih ei u.
44 Baan lam ktung üng ah nih jah hneen peh kkhyaang klääng xooi noh phi asun kba ah nih yaih ei.
(Marküh 15.33-41; Lükah 23.44-49; Johaan 19.28-30)
45 Mhnüüp ngshuunga kkhyüh im kngam shoon ei ksüün veia teng pe abäng nghmüp-in lok kti.
46 Im kngam shoon ei ksüüna ta Jeishüh noh “Eilih, Eilih laana shapa thanih” tilü akthai kdäma ngpyaang kti. Asun Aramik läk ni. Tihlü ta “Kah Pangsiimo, kah Pangsiimo, a i a nah nah hoih kti ni” tilü ni.
47 Ahlonga ngdüüi kti akhäke noh asun ngjalü “Shahma ngsiim Eilijah khü kti ni” tilü ah nih pyen u.
48 Ahunata kkhyaang mat dong lü tui mjon kti ah lo. Ngbom tui kthuui kkha nu üng kphüüm lü sung keek üng shäng lü Jeishüh noh ah ook vaia ah peet.
49 Kkhyaang akhäke noh “Nih bük ma vai u. Eilijah noh kuum kyan lohlük kkhe” ah nih ti u.
50 Kona Booi Jeishüh ngpyaang ngpyet-in lo pyei ma lü ah shak päih kti.
51 Asun kona hjok khah im nua angsiim ngsaih bok hnün ma-a mkota ah nih kda ei u jih nu sun ahunata alua kkhyüh apyaai säpa nghngih-a teek-in lok kti. Ngkhyü ngshüün lok kti. Lung nue ak-in lok ktie.
52 Msüm hnün lung khuuie ngbou ak-in ulü ngsiim ngsaih kti kkhyaang kho hah Pangsiim noh thih naaka kkhyüh ah jah thoh shak be.
53 Asune msüm hnün lung khuuia kkhyüh lut lok ktie. Booi Jeishüh ah thoh be kona Jeirüh Shalem mlüh ngsiima vaang vaai ulü kkhyaang kho hah-ea ma-a pou lok ktie.
54 Romah ngtuk kpoh pä khong jah ah hlonga Jeishüh mtät ktie noh ngkhyüa ngshüün jah athoon hlok abäng sun hmu-ulüta kyüh ei lotong ktie. “Ahina kkhyaang ta Pangsiima sa ksang ni” tilü ah nih pyen u.
55 Akthuuk nua kkhyüh nghnu mie noh Jeishüh tou ktie. Asune hin Kalile hnea kkhyüh Jeishüh läk lo-ulü mshüüm mseei ktie ni.
56 Asunea kshuunga Marih Maka Talen, Jakop jah Joshepa nu Marih jah Sepetea sa xooia nu ngpüi ktie.
(Marküh 15.42-47; Lükah 23.50-56; Johaan 19.38-42)
57 Kho kyaak kona Arih Mate mlüh-a ka Joshep ngming nak kti booi maang ei kti mat lok kti. Ah nih hin ampyua Booi Jeishüh-a akläka thoon kti ni.
58 Joshep sun Pilat booia veei sit lü Booi Jeishüh-a yook ah tong vaai. Ngtuk kpoh-e noh Booi Jeishüh-a yook Joshep üng ah nih peet vai ua Pilat booi noh ah mkhyah.
59 Joshep noh Booi Jeishüh-a yook sun la-vaai lü ngsiim ngsaih kti ngbu jih üng ah hloop.
60 Kona u phi am ah nih mkhyüh naak ham ah msüm hnün lung khuui akthaaia Booi Jeishüh-a yook ah xon vaai. Kona khuui mkot sun lung nu üng khaai hüt lü sit be kti.
61 Maka Talen Marih jah akse Marih mat sun lung khuui ma da ngshut kti xooi.
62 Angooi üng Pangsiim ngam püi mhnüüpa phäh ah nih ngkhäh ngsih-a mhnüüp kona khotu ngsiim kdäme jah Pharishe-e Pilat booia veei sit ktie.
63 Asune noh “Angvaaio, ahin jah mhleei mhlak kti hin noh ah xün ham üng ‘Amhnüüp kthum üng kah thou be kkhai ni’ ah ti sun kah nih shüüm ktie ni.
64 Asuna thoon lü akthuma mhnüüp vei säpa ngtuk kpoh-e noh mseei lü ah nih mtäh kyet vai ua mkhyah-a. Asun kba am ani ta akläke noh lo-ulü ah yook sun mpyulo to kkhaie ni. Kona ‘Thou be pääng kti ni’ tilü kkhyaange üng jah mtheh hü kkhaie ni. Asun üng ah xün k'um üng kkhyaange ah jah mhleei mhlaka kthaka kshe hleen lonak nak kkhai ni” tilü ah nih pyen u.
65 Pilat booi noh “Mtät kkhai ngtuk kpoh mat seh püi ua. Nah nih mkhiina ah nih-a dä lung khuui sun mtät ubä” ah ti be.
66 Asun üng sit ulü lung khuui mkota ah nih taak u lung nu sun ngshing ngte naak ah nih poh u. Asuna ngtuk kpoh üng lung khuui sun ah nih mtäh shak u.