26
(Marküh 14.1-2; Lükah 22.1-2; Johaan 11.45-53)
1 Booi Jeishüh noh akläke üng aana mong ah jah msuh mtheh lo kona ah nih noh
2 “Phyong Pooia pha naak vai mhnüüp nghngih va hlü ti kti atia nah nih kshing ktie ni. Asun üng kei, Kkhyaang Sa baan lam ktung üng ah nih nah hnim vaia nah ap kkhaie ni” tilü ah jah mtheh.
3 Kona khotu ngsiim kdäme jah Jüdah khong mange, Khaai Pa ngming nak kti khotu ngsiim kdäm boka sü ima ngkhääm lok ktie.
4 Booi Jeishüh ampyua man lü hnim vaia seng kyam ktie.
5 Asune noh “Phyong Pooi k'um üng ta am thoon khoh. Asun kba am ani ta kkhyaange noh jah hai ulü üng-phou kkhaie ni” tilü ngthäh ngkhyah ktie.
(Marküh 14.3-9; Johaan 12.1-8)
6 Booi Jeishüh Pet Tanih ngnama mneh kshe mneh khoi kti Shimona ima ngkhin ei vaai kti.
7 Jeishüh noh buh ah ei k'um üng aphu kküüi pi pi lung mang uum book üng aphu kküüi pi pi tui ng'uui sun nghnu mi mat noh lo püi lü teep lü Jeishüh-a lu kkhaana ah buih.
8 Lüphi akläke noh asun ah nih hmuh üng am je na-ulü “A i a tui ng'uui phu kküüi nu ta ah kpyo kpyaat vai ni.
9 Tui ng'uui hin joih ta xün kho hah pi pi yah lü mpyeen shek ktie üng jah peet vai shü” tilü mship mhjop ktie.
10 Booi Jeishüh noh asun ngjalo lüta “Nghnu mi noh ahin poh ei tu she. I vai nah nih puk sheet shak ktie ni. Ah nih noh kei üng ah nah poh peet hin do pi pi kti ni.
11 Ampyeen kshe-e ta nah nih hlonga anghläia vek kkhaie. Kei ta nah nih hlonga anghläia am ve ngü.
12 Kah puum sha ah na-buih hin ta kah thih kona kah yook ah nih nah piit pyaang vai sun ah poh mshah-a kyak kti ni.
13 Ngngaai ua, kah pyen ma kkhai. Kho mdek kphyüt säpa thang kdo kkya nah nih kpyaü naak naküta ahina nghnu mi nah nih shüüm naak vaia ah poh mshah hin pyen hü kkhaie ni” ah ti.
(Marküh 14.10-11; Lükah 22.3-6)
14 Asun kona akläk xalei nghngih üng ka Jüdah Sakarot ngming nak kti mat sun khotu ngsiim akdämea veei sit kti.
15 Ah nih noh “Jeishüh sun nah nih kut üng kah ning jah ap ta i nah nih nah pek kkhaie ni” tilü ah jah kthäh. Khotu ngsiim kdäme noh ngui tangka thum kip ah nih peet u.
16 Asuna kkhyüh Jüdah Sakarot noh Jeishüh ah thun ei naak vaia mkot shui hnüh kti.
(Marküh 14.12-21; Lükah 22.7-13, 21-23; Johaan 13.21-30)
17 Kkhaai phoom kka-a kkhaai kpeh ah nih ei naak pooi aksüka mhnüüp üng akläke Booi Jeishüh-a veei lo-ulü “Phyong Pooi üng to sa nah ei naak vai hoa nah jah pyaan vaai hlü shak kti ni” tilü ah nih kthäh u.
18 Booi Jeishüh noh “Mlüh k'uma asäna ima sit ubä. ‘Kah nih ngvaai u noh “Kah thih naaka ksüün säh lohnüh kti. Nah läk ktie mah mah nah ima Phyong Pooi kah nih ei kkhaie ni” tilü mtheh vaai ubä’” tilü ah jah sük.
19 Akläke noh Booi Jeishüh-a pyena kba poh lü Phyong Pooi ei ook vai piit pyaang ktie.
20 Kho kyaak kona khoa mthan lo hnüh üng Booi Jeishüh akläke üng ngshut yüm lü ei ok kti.
21 Ah nih ei k'um üng Jeishüh noh “Ngngaai ua, kei kah pyen ma kkhai ni. Nah nih kshuunga ka mat mat noh kei nah thun ei kkhai ni” ah ti.
22 Asun üng puk shelo pyei ulü “Kei ta am ni khü vai no, angvaaio” tilü mat pän üng mat noh ah nih kthäh u.
23 Booi Jeishüh noh “Kei nah thun ei kkhai noh kah kuta hlonga ah kut üng kkhaai kpeh anbooi kbe üng hlu lü ei kti ni.
24 Sangsiim üng ng'yuk ktia kba kei, Kkhyaang Sa üng thoon yah kkhai shükyo. Lüphi kei, Kkhyaang Sa nah thun ei kti ta khui kha kshe nu khaam ei yah kkhai ni. Am ah nih sa naak xa-a ta asuna kkhyaanga phäh do bok kkhai shü” tilü ah jah mtheh.
25 Kona ah nih thun ei hlük kti Jüdah noh phi “Angvaaio, kei ta am ni hnga läk khüng vai” tilü ah pyen. Booi Jeishüh noh “Ä, nah pyena kba nang kuung ni” ah ti be.
(Marküh 14.22-26; Lükah 22.14-20; 1.Korine 11.23-25)
26 Ah nih ei k'um üng Booi Jeishüh noh kkhaai phoom kka-a kkhaai kpeh lou lü Pangsiim ah je ei. Kkhaai kpeh kphyüt lü akläke üng ah jah peet. “Lou lü ei ua. Ahin kah puum sha ni” tilü ah jah mtheh.
27 Kona Booi Jeishüh noh ngbom tui phäih phi lou lü Pangsiim je ei ma lü ah jah peet. “Abäng noh o-ua.
28 Ahin keia thi ni. Pangsiima be khüta ngshing ngte naak ni. Kkhyaang kho hah noh mkhye mhlät naak ah nih yah vaia kah mshooia thi ni.
29 Kah ning jah mtheh ma kkhai, Kah Pa Pangsiima pea nang nih-e adä ayüma nih ook be tü vei säpa ahina ngbom tui am o-ti ngü” ah ti.
30 Mküüi mtou naak ng'äi msuuk ma ulü Kshi Dung msuung da sit ktie.
(Marküh 14.27-31; Lükah 22.31-34; Johaan 13.36-38)
31 Kona Booi Jeishüh noh “Tuh-a mthan hin üng ta abäng noh nah nih nah hoih kkhaie ni. Sangsiim üng ng'yuk ktia kba ‘Pangsiim noh to kshääm tuk kkhai ni. Asun üng toe ngpyeeng päih kkhaie ni’ tilü vek kti.
32 Lüphi thi-ma lü kah xün lo be üng Kalile hne da nah nih ma-a kah nasit kkhai ni” tilü ah jah mtheh.
33 Peta noh ta “Abäng noh ning hoih ulüphi kei noh ta am ning hoih laang ngü” ah ti.
34 Booi Jeishüh noh “Ngngaai ua, kei kah pyen ma kkhai. Tuh-a mthan bä bä hin üng aaia khoon hlaana ‘Ah nih am kshing ngü’ tilü kthum vei nah ngsiim kkhai ni” tilü ah namtheh ei.
35 Lüphi Peta noh “Nah hlonga thi vai ngüshe phi ‘Ah nih am kshing ngü’ ta am tishoom ngü” tilü ah ngkyaang jäk jäk lü ngtek kti. Akläke abäng noh asun kba ah nih pyen u.
(Marküh 14.32-42; Lükah 22.39-46)
36 Kona Jeishüh jah akläke abäng Ket Shemania ah nih shui ngvoonga sit ktie. Asua Jeishüh noh akläke üng “Ahia ngshut ma ua. Tä sham kkhaia sa kä sa kah sit ma kkhai ni” tilü ah jah mtheh.
37 Peta jah Sepetea sa xooi ah jah seh püi. Asun üng Booi Jeishüh ah nih ma-a puk shelok kti. Ng'ääi ng'vyeeng lok kti.
38 “Thi-khyäü onga kah pyang ma ng'äh ngkhyah kti ni. Ahia ana-ve lü käh ip lü nah mtäh püi ubä” ah ti.
39 Booi Jeishüh ta va-sit sa lü mdeka kyuton lü “Kah Pao, athoon khoh-a ta ahina khui kha kshe käh nah shoong ei shaka. Lüphi keia hlü eia kba käh nik ktia, nanga mkhüh-a kba thoon she” tilü tä sham kti.
40 Kona Booi Jeishüh akläkea veei ah pha lo be üng ana-ip-in ktie ah jah hmuh lo. “Petao, buh k'hmin hngoh käh ip lü am nah nah mtät khoh kti bä.
41 Hlo hleep naak da käh nah nih ngpüi vaia tä sham ua. Nah nih mlung üng ta akdo nah nih poh hlükyo ktie. Nah nih puum sha noh am ah khyaih khoh” ah ti.
42 Booi Jeishüh noh va-sit sa lü tä sham be tü kti. “Kah Pao, ahina khui kha kshe hin nah nah mtheih mhnoon peet vai am athoon ta nanga mkhüh-a kba kah khaam ei kkhai ni” ah ti.
43 Booi Jeishüh lobelü akläke ngshut lü ku ip ktie ah jah hmuh lo be tü. Ah nih mik ku kkhüt kti.
44 Jeishüh akthum naaka sit be tü lü aksüka kba tä sham be tü kti.
45 Akläkea veei ah pha lo be tü üng “Nah nih ip ham ktieo. Nah nih ngxü ham ktieo. Bük ua, kei, Kkhyaang Sa mkhye ktiea kut k'uma ah nah ktuun naak vaia ksüün säh lohnüh kti ni.
46 Thou lo ua, nih sit vai u. Nah ktuun ei kkhai san üng lohnüh ve” tilü ah jah mtheh.
(Marküh 14.43-50; Lükah 22.47-53; Johaan 18.3-12)
47 Booi Jeishüh noh asun kba ah pyen k'um üng akläke xalei nghngih üng ka mat, Jüdah sun, phalok kti. Ah nih-a hlonga khotu ngsiim kdäme jah Jüdah khong mangea ah nih jah tüih lo kkhyaang pä nu ngkhyüi lok ktie. Asune noh ksim kshaaü jah ksüng ei ulü mäk määng jah kkot ei ktie.
48 Jeishüh thun ei hlük kti Jüdah noh kkhyaange üng ahin kba ah jah namtheh “Kah uut hin Jeishüh ni. Asun man ubä” ah ti.
49 Jüdah sun ahunata Jeishüh-a veei lolü “Angvaaio, Pangsiima bä naak nang üng veshe” tilü ah uut lo.
50 Booi Jeishüh noh “Kah püio, nah lohnüh kti mä” ah ti. Kona kkhyaange theih lo-ulü Booi Jeishüh sun baan nghleng nalü ah nih man u.
51 Asun üng ta Booi Jeishüh-a akläk mat noh ah bi ei ksim kshet lü khotu ngsiim kdäm boka xüh ei sun mdang lü ah nghnga kooi ah shah hlot-in.
52 Booi Jeishüh noh “Nah ksim sa hin ksim im üng xon ei be hnüh-a. Ah ksim kshet kti hin ksim üng thik kkhai ni.
53 Kah Pa Pangsiim noh ah nah ku ei vaia kah tonga athoon üng kkhaan kho ngshä ngtuk kpoh pä xalei nghngih am tan ktia ahunata jah tüüi lok kkhai ati sun am nah kshing ktio.
54 Lüphi asun kba ani ta kah mong Sangsiim üng ng'yuk kti sun i hok kba ni athoon ve lo kom” tilü ah pyen.
55 Kona Jeishüh noh kkhyaang päe üng “Ksim kshaaü jah ksüng ei lü mäk määng jah kkot ei lü mpyuk ei man kkhaia mäi lolü nah nih nah man lok kkhe-e ve mä. Hjok khah im nua k'uma amhnüüp tä lü nah nih hlonga ngshut lü kah ning jah msuuk mtheh sän üng am nah man kbak u kti.
56 Lüphi shahma ngsiimea malam pyen aküm seei lo vai hin ahin kba abäng naküt thoon yah kti ni” ah ti. Asun üng akläke abäng sun Booi Jeishüh ta-hüt lü sen-in ktie.
(Marküh 14.53-65; Lükah 22.54-55, 63-71; Johaan 18.13-14, 19-24)
57 Booi Jeishüh man ktie noh khotu ngsiim kdäm bok Khaai Pa-a im ah nih seh püi u. Asua Sangsiim ktheeme jah Jüdah khong mange ngkhääm lok ktie.
58 Peta noh ta jah mhjook sa lü khotu ngsiim kdäm boka im säpa ah jah läk. I hok kba athoon ve lo sun ah kshing vaia ngvoong k'uma vaang lü im mtät ktiea hlonga ngshut kti.
59 Khotu ngsiim kdäme jah kong si üng ka abäng noh Booi Jeishüh ah nih hnim vaia mshuum ei lü shak shi tuhan kkhaiea kkhyaang jah shui hü ktie.
60 Lüphi Booi Jeishüh-a mong sun hleei msom lü pyen kti kho hah lok ktie kyo hnim naak vai ngkäih sun am hmu-u. Akpäih naaka ta kkhyaang nghngih lok kti xooi.
61 Asun xooi noh “Ahina kkhyaang kshe noh ‘Kei noh ta Pangsiim hjok khah im nu phye phyat-in lü mhnüüp kthum üng kah sha-be kkhai’ ah ti kah nih ngjaak ni” tilü shak shi kti xooi.
62 Asun üng khotu ngsiim akdäm bok ngdüüi lolü “Nah mpyong khuui kti, am ni bä. Pyen be tua. Ahin xooi noh ning mshuum ei lü ah nih pyen hin i hok kba ja” tilü Jeishüh ah kthäh.
63 Jeishüh noh ta msik msot phi am tibe. Khotu ngsiim kdäm bok noh “Nang hin Pangsiima Sa kpa Khrito mä ati sun xüng shei kti Pangsiima ngming khü lü tuh kuunga jah mtheh-a” ah ti.
64 Booi Jeishüh noh “Ä, nah pyena kba ni. Lüphi kah ning mtheh ma kkhai. Ngooia ta kei, Kkhyaang Sa Pangsiima kkheet lam da ngshut ngüshe kho ngmei üng kah lo nah nih hmuk kkhaie ni” tilü ah pyen.
65 Asun üng ta khotu ngsiim kdäm bok noh ah jih phi kteek-in lü “Pangsiim thang msheet ei lü pyen ve. Shak shi am nih hlü ei ti u. Pangsiima thang ah msheet sun abäng noh nah nih ngjak ktie am ni bä.
66 I a ni nah nih ngngaih u” tilü ah jah kthäh. “Thi ngkäih kti ni” tilü abäng noh ah nih mkhyah u.
67 Jeishüh-a hmaai ah nih mshoh u. Akhäk noh ah nih kut üng ah nih thoon u. Akhäk noh ah ngbeeng ah nih kbeih u.
68 Asune noh “U noh ning te kti ni. Khrito-o shahma shüma” tilü ah nih yaih yün ei u.
(Marküh 14.66-72; Lükah 22.56-62; Johaan 18.15-18, 25-27)
69 Asun k'um üng Peta ngvoong k'uma ngshut kti. Xüh ei nghnu mi mat ah veeia lolü “Nang hin phi Kalile hnea ka Jeishüh-a ning püi” ah ti lo.
70 Lüphi Peta noh “I a joong nah pyen kti ni am kshing ngü” tilü abängea ma-a ngsiim kti.
71 Kona Peta ngvoong mkot da va-sit kti. Asua xüh shoh nghnu mi sa mat noh hmuh be tü lü kkhyaange üng “Asän sän Nasaret mlüh-a ka Jeishüh-a püi ni” ah ti.
72 Peta ta ngsiim be tü kti “Nah pyena kkhyaang hin am kshing laang ngü” tilü ng'yün ngse lü ah pyen.
73 Nghjook sa be tü ktia asua ngdüüi ktie üng ka mat noh Peta-a veei sit lü “Nang hin Jeishüh-a püie üng ka kuung kuung ni. Nah kthai üng angte nu ni” ah ti.
74 Peta noh “Ahina kkhyaang am kshing laang ngü. Jah mhnün kti noh phi kshing kkhai ni” tilü ng'yün ngse lü ngsiim be tü kti. Asun üng ta aai nghlüi ahunata khoong kti.
75 Asun üng Booi Jeishüh noh “Aaia khoon hlaana ‘Ah nih am kshing ngü’ tilü kthum vei pyen lü nah ngsiim kkhai ni” ah ti sun ah shüüm lo be. Kho kpunga sit lü kyap-in vaai tong kti.