19
(Marküh 10.1-12)
1 Ahin kba ah jah msuh mtheh ah ngpääng lo jah Booi Jeishüh Kalile hnea kkhyüh shot lü Jotan mlik tui saye Jüdah hne da sit kti.
2 Kkhyaang pä nu üng am shi khyaih ktie ah jah mdo be.
3 Pharishe-e akhäk Jeishüh-a veei lo ulü “Kpa mi mat noh ah päta mlung ktüüma ah kkhyu ah hoih vai hin Pangsiima thuum üng ngkäk kti mä” tilü ah nih saam naaka ah nih kthäh tuhan u.
4 Booi Jeishüh noh “Ahina mong Sangsiim üng i hok kba ng'yuk kti ati sun am nah nih kshing ktie bä. Aksük ksüka Pangsiim noh kkhyaang kpa mi jah nghnu mi ah jah mhnün mseng ni.
5 Asuna thoon lü Pangsiim noh ‘Kpa mi mat hin noh ah nu pa ah jah kphya naaka kthaka ah kkhyu kphya na-bok lü ve püi she. Ngkhyu ngla xooi sun ah nih mti sha ngso lolü kkhyaang mata kba thoon kti’ tilü ah pyen.
6 Asuna thoon lü Pangsiima hmuh-a kkhyaang nghngih xooi am ni ti. Kkhyaang mata kba thoon kti xooi. Pangsiima jah mkhääp sun kkhyaang noh käh jah mkhya she” tilü ah jah mtheh be.
7 Ah nih-e noh “Kkhyaang mat noh ah kkhyu ah ngkya naak püi sa yuk lü hoih khoh kti tilü Moshei noh i vai ah ä ja” tilü ah nih kthäh be u.
8 Booi Jeishüh noh “Nah nih mlung kka ngngaih kka-a phäh asun kba nah nih ngkya vaia Moshei noh ah ä ni. Lüphi aksük shääia kkhyüh ahin kba am ni.
9 Kah ning jah mtheh kkhai. Mat mata kkhyu noh kpa mi kse am ave püi ta asuna kkhyaang noh ah kkhyu hoih lü nghnu mi kse ah kkhyu naak ta bäü hma kti ni” tilü ah pyen.
10 Akläke noh “Ngkhyu ngla ngkya-a mong asun kba ani ta käh ngkhyu ngla xa üng do bok kkhai ni” ah nih ti u.
11 Booi Jeishüh noh “Kkhyaang naküt noh asuna msuh mtheh naak ngja-kya khoh kkhai am ni. Pangsiim noh bä naak ah jah peeta kkhyaange noh ni ah nih ngjaak kya kom u.
12 Kkhyaang akhäk ta ah nih hmi loa kkhyüh ah nih khyüi sho käh küm seei lü nghnu mi am lou ei khoh u. Kkhyaang akhäk be tü ta kkhyaange noh ah nih jah kphyata phäh ah nih kkhyu lou ei lü am ng'yah. Akhäk noh ta Pangsiima pea phäh däka mtun ei hlü ulü ah nih kkhyu am lou ei u. Asun ngja-kya khoh kti noh ngja-kya she” ah ti.
(Marküh 10.13-16; Lükah 18.15-17)
13 Asun kona Booi Jeishüh noh ah nih kkhaana ah kut mtaang lü ah jah tä sham peet vaia Booi Jeishüh-a veei hnashene ah nih jah lo püi u. Akläke noh ta hnashene ah nih jah kshät u.
14 Lüphi Booi Jeishüh noh “Hnashene kah veeia lou u she. Käh jah kshät ua. Hnashena kba ah nih mlung mhneem ktie hin Pangsiima pe üng shääng ei ktie ni” tilü ah jah mtheh.
15 Asun üng Jeishüh noh hnashenea lu kkhaana ah kut ah mtaan. Kona asuna kkhyüh shot kti.
(Marküh 10.17-31; Lükah 18.18-30)
16 Booi ei kti mat sun Booi Jeishüh-a veei lolü “Angvaaio, angshääia xün naak kah yah vaia akdo i kah poh yah kkhai ni” tilü ah kthäh.
17 Booi Jeishüh noh “Adoa mong i lü nah nah kthäh kti ni. Pangsiim mat däk ni ah do. Angshääia xün naak nah yah hlü ta Mosheia thuume jah ksang na-a” tilü ah mtheh.
18 Booi ei kti noh “I a thuume ni” tilü ah kthäh be tü. Jeishüh noh “Kkhyaang käh hnim vai, kkhyaangea kkhyu käh ve püi vai, käh mpyuuk ei vai, hleei hlak pyen lü käh shak shi vaia.
19 Nah nu pa nah jah lei shong vai, nah pät nah mhlä kphya naaka kba nah püi phi nah mhlä naak vai” ah ti.
20 Booi ei kti kpa mi sa noh ta “Angvaaio, asun Pangsiima thuum naküt kah diik sa-a kkhyüh kah läk lam päih ni. Kah hlü naak i veham kkhai ni” tilü ah kthäh be tü.
21 Booi Jeishüh noh “Nah küm seei hlü ta nah taak ei naküt jooi vaai päih kti lü nah yah-a ngui abäng ampyeen kshe-e üng jah yeta. Asun üng va kkhaan khoa nah khoh kkhyam vai vek kkhai. Asun kona lolü kei nah läk loa” ah ti.
22 Lüphi kpa mi sa noh asun ah ngjaak üng hmaai shelü puk shelo pyei lü sit be kti. I a thoon lüni ti ta asuna kkhyaang booi ei pyei kti.
23 Asun üng Booi Jeishüh noh akläke üng “Ngngaai ua, kei kah pyen ma kkhai ni. Booi ei ktie hin Pangsiima pea ah nih vaan vai khak pi pi kti ni.
24 Kah ning jah mtheh be tü kkhai. Sha nghngü kshaaü sän mpyüm khuui üng ah vaan vai am alooia kba booi ei kti phi Pangsiima pea ah vaan vai khak bok kti ni” tilü ah jah mtheh.
25 Akläke noh asun kba ah pyen ah nih ngjaak u üng mün sam tong u lü “Asun kba ani ta u noh ta kuum kyan naak yah kkhai ni” tilü ah nih kthäh u.
26 Jeishüh noh ah nih-e jah bük lü “Kkhyaang noh ah pät noh ah pät am kuum kyan khoh. Pangsiim noh ta kuum kyan khoh kti. Pangsiim noh ta abäng naküt khyaih khoh kti” tilü ah pyen.
27 Peta noh “Ngngaaia, kah nih taak ei naküt hoih lü kah nih ning läk u ni. Kei nih-ea phäh i vek kkhai ni” tilü ah kthäh.
28 Booi Jeishüh noh ah nih-e üng “Ngngaai ua, kei kah pyen ma kkhai. Abäng naküt akthaai thäka ah nih thoon loa ksüün üng kei, Kkhyaang Sa kkhaan khoa jou taai mah kti booi ngoh naak üng kah ngshut üng nah läk kti nang nih-e phi booi ngoh naak xalei nghngih üng nah nih ngshut yah kkhaie. Isare koon shaang xalei nghngih nah nih jah si jaang kkhaie ni.
29 Kkhyaang mat noh keia phäh-a ah im, ah hnuun püi kphyaai be, ah nu pa, ah sa na, ah lou ma ah jah hoih ta ah jah hoih käna athap phya mata phya mat Pangsiim noh pe-be kkhai. Angshääia xün naak phi yah kkhai.
30 Lüphi tuh hi ma-a vek kti kho hah-e hin Pangsiima pea ta hnua veyah kkhaie. Tuh hi hnua vek kti kho hah-e hin Pangsiima pea ta ma-a veyah kkhai ni” tilü ah jah mtheh.