18
(Marküh 9.33-37; Lükah 9.46-48)
1 Asun üng akläke Booi Jeishüh-a veei lo-ulü “Pangsiima upa pea u ni akdäm bok” tilü ah nih kthäh u.
2 Booi Jeishüh noh hnashen mat khü ma lü akläkea kshuunga ah ngdüih shak.
3 Booi Jeishüh noh “Ngngaai ua, kei kah pyen ma kkhai. Nang nih-ea mlung kkyoonga nghlai vai hlü kti. Ahina hnashena kba nah nih mlung kko naak vai u hlü kti. Am ani ta Pangsiima pea i hok kba phi am vaang yah u kti.
4 Asuna thoon lü ahina hnashena kba mlung mhneem kti ta Pangsiima pea akdäm boka thoon kkhai.
5 Kah hmaaia phäh mat mat noh ahin bang hnashen hin ah dou daan ta kei ah nah dou daan üng täng kti.
(Marküh 9.42-48; Lükah 17.1-2)
6 Lüphi ahina hnashena kba kei nah üm nak kti mat mat mkhye shak ktia kkhyaang ta Pangsiim noh mtaam nu pek kkhai ni. Ah nghngü üng lung kdäm nu häi lü tui li kthuuk nu üng kpyaai-in ta asuna kkhyaanga phäh do bok kti.
7 Mkhye poh vaia ah nih jah hlo hleep hin kho mdek kkhyaangea phäh khui kha naaka thoon kkhai ni. Mkhye mshoh vaia hlo hleep naak vekuung kuung kkhai. Lüphi ahin kba jah hlo hleep ktia phäh khui kha naaka thoon kkhai ni.
8 Nah kut am ani üng nah kho noh ah ning mkhye shak ta kkyük-in lü kpyaai-ina. Nah kut kho ngküüm ktia itüh-a am thik kti meia k'uma pha-a kthaka kut kho vaang däk üng angshääia xün naaka vaan ta do bok kti.
9 Nah mik noh ah ning mkhye shak ta kkoih-in lü kpyaai-ina. Nah mik nghngih üng Mulai pea nah pha-a kthaka nah mik vaang thak üng angshääia xün naaka nah pha ta do bok kkhai ni.
(Lükah 15.3-7)
10 Nang nih-e noh ahi bang hnashene käh nah nih jah mdih ngshuui vai ua mseei ei ubä. Kah ning jah mtheh kkhai. Ah nih nih-e jah mtät kti kkhaan khoa ka kkhaan kho ngshäe noh kah Pa Pangsiima mik hmaai anghläia hmukhoh ktie ni.
11 I lüni ti ta kei, Kkhyaang Sa hin khyük leih ktie jah shui hjap lü jah kuum kyan kkhaia kah lok kti ni.
12 Su ngngaai ua. Kkhyaang mat noh to aphya ta-ei kti. To mat sun ah khyüh ta kko kip kän üng puum kko sun mkyaanga jah ta-hüt lü kkhyük ktia to mat sun hmube onga shui kkhai, am ni bä.
13 Ngngaai ua, kei kah pyen ma kkhai. Vek ktia to kko kip jah puum kkoa phäh ah je kyaia thea khyük kti to puum mat ah hmuh bea phäh je kyai bok kkhai ni.
14 Asun kba ni, kkhaan khoa vek kti nah nih Pa Pangsiim noh ahi bang hnashen mat phi am kkhyük hlü shak.
15 Nah püi noh ah ning bäü naak ta sit kti lü nah nih pät däk nah nih ve naaka ah mkhye sun mtheh-a. Ah ning ksang naak ta nah püi sun mkhye üng mhlät bä.
16 Lüphi am ah ning ksang naak ta kkhyaang nghngih mat khü lü jah seh püia. I lüni ti ta mkhye mshoh-a be sun ‘Shak shi kkhyaang nghngih kthuma ma-a mshi mkyaai vaia thuum vek kti.’
17 Asunea pyen kshak sun phi am ah jah su ngngaih ta shaang ngsiim üng mtheh-a. Shaang ngsiima pyen phi am ah ksang naak ta Pangsiim am kshing kti kkhyaang, am ani üng khoon to k'hlooka kba ngngaai ua.
18 Ngngaai ua, kei kah pyen ma kkhai. Kho mdeka käh poh vaia nah mkhyah abäng sun kkhaan khoa phi mkhyah ei kkhai. Kho mdeka poh vaia nah mkhyah abäng sun kkhaan khoa phi poh vaia mkhyah ei kkhai ni.
19 Kah ning jah mtheh be tü kkhai. Nang nih-e üng ka kkhyaang nghngih hin i phi nishe tä sham vaia mlung ng'yäp ktia athoon üng kkhaan khoa kah Pa Pangsiim noh nah nih phäh-a ning jah poh peet kkhai.
20 I lüni ti ta kkhyaang nghngih kthum noh kei nah hjok khah kkhaia ah nih ngkhääm naaka ah nih nih-ea kshuunga kei kah vek kkhai” ah ti.
21 Kona Peta Booi Jeishüh-a veei lolü “Booi Pao, kah püi noh ah nah bäü naak ta ah mkhye i vei kah mhlät yah vai ni. Kkhyüh vei mä” tilü ah kthäh.
22 Jeishüh noh “Kah ning mtheh kkhai. Kkhyüh vei däk am khäk, nah püia mkhye kkhyüh kip siim siim kkhyüh kip vei nah mhlät yah vai.
23 Pangsiima pe hin i üng msäp khoh vai ni ti ta shang phuhlang mat noh ah xüh shoh-e ah nih pu pon lei ah jah tong naak be üng täng kti ni.
24 Ah nih lei sa laang sun sut ei lü bük lüta kho kum kthum kip ktha kheen vai kän lei mah kti xüh shoh mat shang phuhlanga veei ah nih lo püi u. Asuna xüh shoh noh ah lei ah thung naak vai am ve.
25 Asun üng ta ah mah pa noh ‘Ahina kkhyaang ah pät ni, ah kkhyu ni, hnashene abäng mpya-a jah jooi vaaia. Ah külak naküt phi jooia. Nah yah-a ngui üng ah lei thung na-a’ tilü ah mkhyah.
26 Ah xüh shoh ta ah mah pa-a ma-a ah mkhuuk üng ngdääng lü ‘Booi Pao, nah mhjook ei ma-a. Abäng kah ning khih päih be kkhai ni’ tilü ah nghui naak.
27 Ah mah pa noh ah xüh shoh sun mpyeen ei lolü ah lei abäng sun mhlät päih lü ah tüih be.
28 Lüphi xüh shoh sun ah mah pa-a ima kkhyüh ah luh lo be üng xüh shoh ah püi ah hmuh lo. Asuna xüh shoh noh aksüka xüh shoh-a veeia mhnüüp mat ktha kheen vai bang lei nak kti. Aksüka xüh shoh noh ah püi sun man lü ah k'o üng ah xaak. ‘Nah lei abänga nah khih-a’ tilü ah mshi kyet.
29 Lei mah xüh shoh sun noh ah mkhuuk lu üng ngdääng lü ‘Nah mhjook ei ma-a. Abäng kah ning khih päih kkhai ni’ tilü ah nghui naak.
30 Lüphi lei ktong xüh shoh noh thäü thäü käh ah su ngngaih peet. Sit lü ah püi noh ah lei ah khih päih veia khup üng ah jah khyum shak.
31 Shang phuhlanga xüh shoh akse-e noh asun kba ah nih thoon ve sun jah hmu-ulü puk she lotong ktie. Ah nih mah pa-a veei sit ulü athoon ve abäng ah nih mtheh vaai u.
32 Asun üng ta ah nih mah pa noh kho hah lei mah kti xüh shoh sun ah veeia ah jah khü shak. ‘Nang kkhyaang kshe pi pi ni. Nang noh nah nah nghui naaka phäh nah lei abäng kah ning mhlät päih ni.
33 Kei noh kah ning mpyeen eia kba nang noh phi nah püi nah mpyeen eia ngkäih kti kyo’ ah ti.
34 Ah mah pa thüi shei kkhüt lü xüh shoh noh ah lei abänga ah jah khih be päih veia khup üng ah jah pheh shak.
35 Asuna ng'yüia nang nih-e noh phi nah nih mlung kko ksang üng nah nih püia mkhye am nah nih mhlät ta kkhaan khoa vek kti kah Pa Pangsiim noh phi ahin kba nah nih bäng ning jah poh kkhai tilü” ah jah mtheh.