1 Asun kona Booi Jeishüh noh Tipe Rih tui pei su akläkea ma-a pou lok kti. Kkea kba thoon vek kti. 2 Shimon Peta, Angphia ah nih shui Tomah ni, Kalile hne Kaana mlüh pa Natha Nei, Sepetea sa xooi ni, Booi Jeishüh-a akläk akse nghngih mah mah-a ayüma vek ktie. 3 Shimon Peta noh “Ngvaai vooi kkhaia kah sit hnüh kkhai” tilü ah jah mtheh. Ah nih nih-e noh phi “Kah nih ning läk lok kkhaie” ah nih ti u. Asun üng ta tui li su mhlüüi üng sit hü lü ngvaai vooi ktie. Lüphi asuna mthan üng nga thek mat laang phi am yah ngtu u. 4 Kho athaih lo üng ta Booi Jeishüh sun kkong peia ngdüüi lok kti. Lüphi ah nih sun Booi Jeishüh atia akläke noh am dang yah u. 5 Booi Jeishüh noh “Kah püieo, nga am nah nih yah ktie mä” tilü ah jah hei kthäh. Ah nih nih-e noh “Thek mat phi am yah kbah u-ngü” ah nih ti be u. 6 Ah nih noh “Ngvaai sän mhlüüia kkheet da kpyaai ua. Asun üng nga nah nih yah kkhaie” tilü ah jah mtheh. Asun üng ngvaai sun asun da ah nih voih u. Asun üng ta nga ng'ook kolaih lü ngvaai sun mhlüüia kkhaana phi am mkaai be khoh u. 7 Booi Jeishüh-a kphya naak akläk mat noh Peta üng “Nih Booi Pa u ni!” ah ti. Peta noh asun ngjalo lüta ah khüüi vai üng ah shuh eia ngvaih jih sun jih ei be lü tui su ju ksou kti. 8 Akse akläke sun noh nga ng'ook pyei ktia ngvaai sun mhlüüi üng kkong da ah nih kaih lo u. Kkong pei sun üng säh kti. Alama kkhyuk kip ni ah nih kkeh naak u. 9 Kkonga ah nih pha u üng mei k'eh üng ah nih tih mei ksaka kkhaana ngkyeng ei kti nga ah nih hmuh u. Kkhaai kpeh phi vek kti. 10 Booi Jeishüh noh “Tuh nah nih yah lo u nga phi akhäk lo püi ua” ah ti. 11 Shimon Peta sun mhlüüi da su va-sit be lü ngvaai sun kkonga ah mkaai. Asuna ngvaai sun üng nga kdäm atheka phya mat mhma kip kthum ng'ook kti ni. Nga asun kba nung kyo lüphi ngvaai sun am teek laang. 12 Booi Jeishüh noh “Lolü ngooi buh ei lo ma ua” ah ti. Akläke sun noh “Nang u ni” tilü u noh phi am kthäh dat u. Booi Pa atia ah nih kshing u. 13 Booi Jeishüh ah nih veeia kkhaai kpeh jah nga sun jah lo lü ah jah yet. 14 Booi Jeishüh thih naak üng ah thou be kona akläkea ma-a ah pou lo sun tuh hin akthum naak ni. 15 Ah nih ng'ei ng'ook kon ua Booi Jeishüh noh Shimon Peta üng “Jonah-a sa Shimono, ah nih nih-ea nah kphya naaka kthaka nah nah kphya na-bok kti mä” tilü ah kthäh. Peta noh “Ä, Booi Pao, kah ning kphya naak sun nang Booi Pa noh phi nah hmat kti ni” tilü ah mshak be. Booi Jeishüh noh “Asun kba athoon ta kah to sae eia ve naaka jah mshüüma” ah ti be. 16 Booi Jeishüh noh “Jonah-a sa Shimono, nah nah kphya nak kti mä” tilü ah kthäh be tü. Peta noh “Ä, Booi Pao, kah ning mseh naak sun nang Booi Pa noh phi nah hmat kti ni” tilü ah mshak be tü. Booi Jeishüh noh “Asun kba ani ta kah toe jah bük tenga” tilü ah mtheh. 17 Booi Jeishüh noh “Jonah-a sa Shimono, nah nah kphya nak kti mä” tilü akthum naaka ah kthäh be tü. Peta sun Booi Jeishüh noh “Nah nah kphya nak kti mä” tilü kthum vei kuung ah kthäh-a phäh-a puk she lok kti. Asuna thoon lü “Booi Pao, nang noh abäng naküt nah hmat kti. Kei noh kah ning mseh naak phi nah hmat kti ni.” Booi Pa noh “Asun kba ah ni khom ta kah toe eia ve naaka jah mshüüma. 18 Ngngaai ua, kei kah pyen ma kkhai ni. Nah kpa mi sa ham hin üng ngpong ngseei lü nah hlü ei naaka nah sit hü kti. Nah pa kshe lo üng ta nah kut xooi jah shäng kti lü kkhyaang kse-e noh ning khoon ulü am nah seh naak hlü da ning seh püi kkhaie” ah ti. 19 Peta sun i hok kba thilü Pangsiima jou taai ah ngshing ngte shak vaia mong sun mhnüh mtheh naaka ah pyen. Kona Booi Jeishüh noh “Kah hnu nah läk loa” tilü ah mtheh be tü.

20 Peta sun ah hnu da va-nglat lüta Booi Jeishüh-a kphya naak akläk sun noh jah läk lolü ah hei hmuh. Ah nih sun Booi Jeishüh-a thih hlaan mü buh ah nih ei u üng akse-ea thaka Booi Jeishüh-a hlonga säh bok ktia ngshut lü “Booi Pao, ning ktuun ei kkhai u ja” tilü kthäk kti akläk ni. 21 Peta noh Booi Jeishüh üng “Booi Pao, ah nih ta i hok kba vai ja” tilü ah kthäh. 22 Booi Jeishüh noh “Kei hina kho mdeka kah lo be tü säpa ah nih sun ve soh shak vai ngüshe phi nang üng am shääng ei kti. Nang noh ta kah hnu nah läk bä” tilü ah mtheh. 23 Asuna phäh-a jum ei kti be nae üng asuna akläk am thi-laang tia kthai ngpyaü hü kti. Lüphi “Ah nih am thi-yah” atia Booi Jeishüh noh ah pyen am ni. Ah nih noh “Kei hin kho mdeka kah lo be tü säpa ah nih sun ve soh shak vai ngüshe phi nang üng am shääng ei kti” tilü ah pyen ksang ni. 24 Asuna akläk mat sun ahina thoon ve abäng hin yuk lü shak shi kti akläk ni. Ah shak shi sang kti atia nih hmat ktie. 25 Booi Jeishüh noh ah poh mshah-e akse kho hah pa veham kyo kti. Asun bang abäng sun yuk vaia athoon ta yuka sa up sun kho mdek abäng üng nih talü hleei hlook ei kkhaia kah ngngaih ni. Amen.