20
(Mate 28.1-8; Marküh 16.1-8; Lükah 24.1-12)
1 Pangsiim ngam püi mhnüüpa akho ngooi üng ngooi lam nu kho thai hlaana Marih Maka Talen sun msüm hnün lung khuui sua sit ngooi kti. Ah nih noh lung khuui khaih naak lung pelep nu mkota kkhyüh ah ngheei-in sun ahunata ah hmuh lo.
2 Asun üng Shimon Peta jah Booi Jeishüh-a kphya naak akläka veei dong lobe lü “Booi Pa-a yook lung khuuia kkhyüh pook lü hoa ah nih seh püi ua la am hmat u ngü” tilü ah jah mtheh vaai.
3 Asun üng ta Peta jah Booi Jeishüh-a kphya naak akläk noh lung khuui da sit kti xooi.
4 Ah nih nih xooi sun dong nih lü Booi Jeishüh-a kphya naak mat noh Peta sun khe ei lü msüm hnün lung khuuia phavaai ma kti.
5 Ah nih noh ngmüm lü lung khuui sun ah hei bük hü. Yook hloop naak jih vehüt kti ah hmuh. Lüphi ak'uma am va lut.
6 Kona Shimon Peta sun phalolü lung khuuia k'um su va-lut kti. Ah nih noh phi jih ngpüüp hüt ktie sun ah jah hmuh lo hnga.
7 Booi Pa-a lu ah nih hloop naaka jih sa sun phi vek kti. Asuna jih sa sun jih kse-e üng ahnga-a ngkhep ei kti su vek kti.
8 Kona lung khuuia phavaai ma kti sun phi ak'uma lut hnga lü asune sun hmulü ah jum lo ksang.
9 “Ah nih hin thih naaka kkhyüh thou be kkhai” tilü Sangsiim üng vek kti sun akläke noh am ngngaai kya ham u.
10 Kona akläk xooi sun ima sit be kti xooi.
(Mate 28.9-10; Marküh 16.9-11)
11 Marih sun ta kyap lü lung khuuia kpunga ngdüüi kti. Ah kyah shoa lung khuuia k'um sun ngmüm lü ah hei büh.
12 Asun üng Booi Jeishüh-a yook ah nih taak naak ua hnüna shui shak book shui shak kti kkhaan kho ngshä nghngih sun, ah lu kuung da mat, ah kho kuung da mat ngshut kti xooi, ah jah hmuh.
13 Asun xooi noh “Nghnu mio, i nah kyah-in kti ni” tilü ah nih kthäh. Marih noh “Kah Booi Pa-a yook aksea ah nih seh püi u. Hoa ah nih taak ua la am hmat ngü” tilü ah pyen.
14 Asun kba ah pyen sho su va-mdei lüta Booi Jeishüh sun ah hlonga ngdüüi lü ah hmuh. Lüphi Booi Pa atia am kshing laang.
15 Booi Jeishüh noh “Nghnu mio, i lü nah kyap-in kti ja. U nah shui kti ja” tilü ah kthäh. Marih noh ah nih sun ngvoong mtät ktia shui lü “Angvaaio, ah yook aksea nah seh püia athoon ta nah taak naak nah mtheh-a. Asua sit ngüshe kah la-vaai be kkhai” ah ti.
16 Asun üng Booi Jeishüh noh “Marih-o” tilü khü lüta Marih noh ah veei da nglat lü Hepye läka “Angvaaio” ah ti.
17 Booi Jeishüh noh “Käh nah hnea. I lüni ti ta kei hin kah Pa Pangsiima veei am sit be ham ngü. Kah be naea veei sita. Nang nih-ea pa-a phi thoon kti, kah pa-a veei kah sit be kkhai. Ah nih sun keia Pangsiima phi thoon lü nang nih-ea Pangsiima phi thoon kti. Asun naküt ah nih nih-e üng jah mtheh vaaia” tilü ah xüh.
18 Asun üng Marih Maka Talen noh sit lü “Kei noh Booi Pa kah hmuh ni” tilü akläke üng ah jah mtheh mkhyah vaai. Booi Jeishüh-a sük koh naküt phi ah pyen vaai be.
(Mate 28.16-20; Marküh 16.14-18; Lükah 24.36-49)
19 Asuna mhnüüp mülam, ngkhyün suum aksüka mhnüüp üng akläke sun ngkhääm ulü kshoh phi ah nih khaih ei u. I lüni ti ta Jüdah khong mange ah nih jah kyüh ua phäh ni. Asun üng Booi Jeishüh pou lolü ah nih kshuunga ngdüüi kti. Ah nih noh “Nah nih diim deih naak vai ua kah ning jah tä sham peet kti” ah ti.
20 Asun kba pyen ma lü ah mja üng ka ah nghma jah ah kpem üng ka ah nghma sun ah jah mhnüh. Akläke noh Booi Pa sun hmube ulü je kyai tong ktie.
21 Booi Jeishüh noh “Nah nih diim deih naak vai ua kah ning jah tä sham peet kti” tilü pyen be tü lü “Kah Pa Pangsiim noh kei ah nah tüih loa kba nang nih-e phi kah ning jah tüih ktie ni” ah ti.
22 Asun kona jah hmuut lü “Mkhyangsiim dou ei ua.
23 Nang nih-e hin noh kkhyaang mat mata mkhye nah nih mhlät u ta ah nih-a mkhye sun ngsiim lok kti. Nang nih-e noh mat mata mkhye am nah nih mhlät u ta ah nih phi mkhye üng ve-ei ham kti.”
24 Booi Jeishüh-a pou lo sun üng akläk xalei nghngih üng ka Angphia phi ah nih shui Tomah sun ah nih hlonga am ve.
25 Asun üng akläke noh “Booi Pa kah nih hmuh u ni” tilü Tomah üng ah nih mtheh vaai u. Tomah noh ta “Ah mja üng ka mthi theka nghma ni, ah kpem üng ka ah nghma sun hmulü saam ngüshe ni kah jum kom” tilü ah pyen.
26 Amhnüüp kkhyeta mhnüüp üng akläke sun ngkhääm ktie. Tomah phi vek kti. Kshoh khaai ei kyo u lüphi Booi Jeishüh ah nih kshuunga pou lolü ngdüüi kti. Ah nih noh “Nah nih diim deih naak vai ua kah ning jah tä sham peet kti” ah ti.
27 Kona ah nih noh Tomah üng “Nah mjung üng kah nghma hin mthama. Kah mja nah jah büka. Nah kut shäng lolü kah kpem nghma phi nah saama. Balaak mä atia käh ngngaai lü aksanga jum eia” tilü ah mtheh.
28 Tomah noh ta “Kah Booi Pao, kah Pangsiimo!” ah ti lo hnaam.
29 Booi Jeishüh noh phi “Nah nah hmuh-a phäh-a nah jum ei ktio. Käh nah hmu-xa kyo lüphi nah jum ei ktia kkhyaang üng Pangsiim noh do kya naak pe-bok kti” ah ti.
30 Aksanga ta Booi Jeishüh noh akläkea ma-a mün sam kshe kho hah pa poh kyo kti. Ahina Sangsiim sa up üng am yuk päih u.
31 Lüphi nang nih-e hin noh Booi Jeishüh sun Khrito ni, Pangsiima sa-a phi thoon kti atia nah nih jum ei vai ua ahin bange hin kah jah yuk ni. Asun kba jum lü Booi Jeishüh üng angshääia xün naak nah nih yah ei vai ua phäh ni.