JAKOP
Jakop noh jum ei kti Jüdah-e üng ah jah kbia sa
1
1 Kei Jakop, Pangsiim jah Booi Pa Jeishüh Khritoa xüh ei noh sa kah ning jah yuk lok kti. Kho mdek naküta ngpyeeng hü kti Jüdah kkhyaang mjü xalei nghngih bänga kah ning shüüm ktie ni.
2 Kah püieo, hlo hleep naak mjü kküm nah nih shoong üng je kyai na-phyak kti atia ngngaai ei ua.
3 I lüni ti ta nah nih jum ei naak ning jah kshü kset lü ngnääng naak nah nih yah lo ta nah nih pätea säm naaka thoon lok kti.
4 Nah nih xün naak üng nah nih küm seei lo vaia ni, kkhyaanga ning jah kbäü ei naak üng phi angsiim vaia asuna säm naak noh ning jah kpüi she. Asun üng nah nih ve soh ngki ngheei ta ahlü naak am ve.
5 Nang nih-e üng mat mat noh pum ngyam ah hlü ei ham ta Pangsiima veei tä sham ei she. Pangsiim noh kkhyaang naküt sun üng käh jah mkhyoh mkaih lü mtu mtäng naak khoh vai käh veti onga jah pek kti.
6 Lüphi up lat naak mlung kko käh vek kti jum ei naak üng tä sham vai. I lüni ti ta up lat ktia kkhyaang sun kho khi lü ngnook kti mpang lai tui mkhyung üng täng kti.
7 Asun kba vek ktia kkhyaang noh “Pangsiima veei kah yah kkhai mä” atia käh ngngaai she.
8 Asuna kkhyaang sun ah mlung kkyoong nghngih kthum ktia thoon lü ah ve soh ngnei shak phi am säm seet khoh.
9 Mpyeen shek kti ngbe ngna sun Pangsiim noh ah jäh shoon mhlün mtaaia phäh je kyai she.
10 Booi beei kti ngbe ngna ta Pangsiima peet mlung mhneem naak üng je kyai she. I lüni ti ta booi ei kti sun phi kkhyäi paaia kba thuum be hnaam lü kyü kkhai ni.
11 Khoa luh lo üng kho nghngi noh uui lü ah dung sun ngjaai lok kti. Ah paai kyü lü ah ngtou ngtaai naak sim pyak be kti. Asun kba ni booi ei kti sun phi ah mtun ktha naak k'um üng sim pyak ei be kkhai ni.
12 Kshü kset hlo hleep shoong lü kkhyü shing ktia kkhyaang ta do kya naak yah kti ni. I lüni ti ta asun kba ah khaam ei sun ah nääng ta Pangsiim noh angshääia xün naaka thoon kti lu ngbün sun kheena pek kkhai. Asun kba Pangsiim mhlä kphya nak ktia kkhyaang naküt üng ah jah peet vai Pangsiima ng'aan ei vek kti.
13 Kkhyaang mat noh kshü kset jah mkhye mshoh vai hlo hleep ah khaam ei ta “Pangsiim noh mkhye mshoh vaia ah nah hlo kdäk ni” käh ti she. I lüni ti ta Pangsiim sun sheet xuut üng hlo kdäk lü am ng'yah. Ah pät Pangsiim noh phi mkhye naak da ua kkhyaang phi am hlo hleep khoh.
14 Kkhyaang mat hin ah kpaam ktah eia phäh mkhye naak da hlo hleep khaam ei lü ng'ook kyet kti.
15 Ah kpaam ei sun ah dou daan üng mkhye naak hmi lok kti. Mkhye naak sun phi ah be baang lo üng thih naaka thoon lok kti.
16 Kah püieo, käh ngngaai mkhye ua.
17 Do ktia ngkho, küm seei ktia ngkho naküt hin kkhaan kho pea kkhyüh lok kti ni. Akvaai mhnün mseng kti Pa Pangsiim noh ah jah peet ni. Pangsiima mlung kkyoong hin kho mhnüüp jah kho mthana kba ngthu nghlai kti am ni.
18 Ah nih noh ah hlü eia kba sang ktia ah kkhyü be üng ah jah hmi be shak ni. Pangsiim noh ah jah mhnün mseng ah kkhyüng kshei naküta kshuunga hnün ksük üng vek kkhaia nih nih-e ah jah tüüi pyaan ni.
19 Kah kphya naak kah püieo, angtea mshü mseei ua. Kkhyaang naküt su ngngaih naak da jaang she. Ngsi ngjaang jah thüi shei naak da ta hleem hleem she.
20 Kkhyaanga thüi shei noh Pangsiima hlü ei ngpyuun ktia ve soh am thoon shak khoh.
21 Asuna thoon lü mtuih shek kti ve shoh khoi abäng, am do ktia poh mshah naküt jah hoih ua. Nah nih mlung kkyoonga Pangsiim noh ah ning jah sho peet kkhyü sun mlung mhneem lü dou ei ua. I lüni ti ta asuna kkhyü noh ning jah kuum kyan khoh kti ni.
22 Nang nih-e hin noh Pangsiima kkhyü be sun angngaih thaka nah nih ngngaih u ta nah nih pät noh nah nih pät nah nih mhleei ei ktie ni. Asuna ksah-a Pangsiima kkhyü bea kba velü poh mshah ua.
23 Kkhyaang mat noh Pangsiima kkhyü be sun ngjalü ah ngjaaka kba am ah ve ta lup büh naak (hman) üng ah lup ah hei hmuh üng ni ah täng.
24 I lüni ti ta ah pät noh ah pät bük hüt ma lü aksea sit lüta i a mäi ah lo sun angsheng kuunga ah mhnih-in be.
25 Lüphi kkhyaang mat noh lup büh naak sun ah büh kyeta kba küm seei kti Pangsiima thuum sun bük kyet yah kkhai. Asuna thuum sun noh mkhye naaka k'uma kkhyüh jah mhlät kti. Asun kba ni Pangsiima kkhyü be sun ngjalü ah ngjaaka kba vek ktia kkhyaang sun ah poh mshah naküt üng Pangsiim noh do kya naak pek kkhai.
26 Kkhyaang mat noh “Pangsiim kah üm nak kti ni” tilü ah ngthuk ei am ah mkhiin mkhäk ta ah pät noh ah pät sun mhleei ei lü ah jum ei naak alapa thoon kti.
27 Nih Pa Pangsiima hlü eia kba ngsiim ngsaih ktia jum ei kti noh ta khui kha mpyeen shek kti ah nu pa kka hnashene jah hmeei nue jah mshü mseei yah kkhai. Hina kho mdek kkhyaange am do ktia ah nih ve soh sun üng phi nah nih ngsiim yah kkhaie.