1 Booi Jeishüh üng nang nih ngbe ngnaea thoon lü nah nih püi kphya nalü ve ei lä ua. 2 Aksea kkhyüh lok kti Khritjaan be nae phi akdoa jah kkhin na ua. Asun kba ah nih poh üng akhäke noh am kshing ei xa ulü kkhaan kho ngshä jah kkhin nak ktie. 3 Nah nih pät khupa k'uma nah nih vek ktia mäia khupa k'uma kae phi jah shüüm ua. Nah nih pät noh mkhuh mhlih nah nih khaam ei ktia kba mkhuh mhlih khaam ktie phi jah shüüm ua. 4 Kkhyu ngla-a thoon hin shü kyü na-ua. Nghnu mi noh phi kpa mi noh phi kkhyaang kse käh ve püi lü mat noh mat Pangsiima ma-a kkhyü taam eia kba ve vai. Boh bah lü kkhyaanga nghnu mi kkhyaanga kpa mi ve püi ktia kkhyaang Pangsiim noh mtaam pek kkhai ni. 5 Ngui xüi käh nah nih kpaam ei vaia mseei ei ua. Nah nih taak eia ngui xüi külak üng nah nih mkhüh hnip lü ve ua. I lüni ti ta Pangsiim noh “Kei hin nah nih hlonga anghläia kah vek kkhai. I tüh-a phi am ning hoih u-ngü” tilü ah pyen. 6 Asuna thoon lü nih mkhüh üp lü hin kba nih pyen khoh kti ni. “Booi Pa noh kei nah kpüi kpak kti ni. Asuna thoon lü kei ta am kyüh ei ngü. Kkhyaange noh i hok kba phi am nah poh khoh u” 7 Nah nih khong mange jah Pangsiima kkhyü ning jah msuuk mtheh ktie jah shüüm ua. I hok kba ve soh lü i hok kba thi kyuk ktie atia su ngngaai lü ah nih jum eia kba jum ei ua. 8 Booi Jeishüh Khrito hin mü ta, tuh ngooi, ngooi kho veia phi am ngthu nghlai laang. 9 Khye ktia msuh mtheh naak amjü mjü üng lam käh nah nih hmü vaia mseei ei ua. Nah nih mlung kkyoong hin Pangsiima bä naak üng angkhääng ngpaang lo vaia do kti. Ei ook üng shääng ei ktia thuume jah läka phäh üng mlung kkyoong ngkhääng ngpaang lok kkhai am ni. 10 Pangsiima jih shung müüpa khuut poh ktie noh am ah nih ei khoh-a khah naak lung päm nih nih-ea veei vek kti. 11 Jüdah khotu ngsiim kdäm bok noh khah naak kkhyüng ksheia thi sun angsiim ngsaih naak boka seh püi lü mkhye naaka phäh Pangsiim khah nak kti. Asuna kkhyüng ksheia ah yooke ngnama thea seh lü mei üng ah nih mkhih ni. 12 Asun kba Booi Jeishüh Khrito noh ah päta thi üng kkhyaangea mkhye naak mthi kkhaia mlüh-a thea khui kha khaam lü thik kti. 13 Asun kba ani ta ngnam daai kyonga thea ah veeia sit hnga lü Khritoa lu thuui hmaai sheet naak üng nih ngpüi hnga vai u. 14 I lüni ti ta nih nih-ea phäh-a kho mdeka anghläia nih pi ngnam vai am ve. Nih nih-e noh ta kkhaan khoa vek kti angshääia pi ngnam ni nih ääp ei u. 15 Asun kba ani ta Booi Jeishüh Khrito üng Pangsiim ngshääi ei ktia nih mküüi mtou vai u. Kkhyaange üng ah nih-a ngminga hlüng taai naak nih jah mtheh kom u. Asun sun nih nih-ea khah naak ni. 16 Do ktia khuut poh vai käh mhnih ubä. Nah khoh kkhyam üng kkhyaange jah ku ei bä. Asun hin Pangsiima mlung hlü khah naaka thoon kti. 17 Nah nih khong mang jah ksang na-ubä. Ah nih mkhyah mtaang läk lam ubä. Nah nih mlung kkyoong ngnei shak do kkhaia ning jah mtät mshou ktie ni. Ah nih nih-e noh Pangsiima veei nah nih mong phye phyam vaai yah kkhaie ni. Ah nih nih-e noh puk shelü käh nik ktia je kyai lü ah nih süi seng vaai vaia, ve soh ubä. Am ani ta nah nih do naaka i am thoon. 18 Kei nih-ea phäh jah tä sham peet lä ubä. Kah nih mlung kko noh am jah kbäü ei atia kah nih mkhüh üp kti. I lüni ti ta kei nih-e noh abäng naküt anghläia akdo boka kah nih poh hlü ktie ni. 19 Pangsiim noh kei hin nah nih veeia i vei käh nghjook ktia ah nah tüih lo vaia nah nih nah tä sham peet vaia aktunga kah ning jah nghui na-hlük kti.

20 To kshääm kdäma thoon kti nih Booi Jeishüh Khrito sun diim deih naak jah pek kti Pangsiim noh thih naaka kkhyüh ah mphyün be ni. Ah nih-a thi üng Pangsiim noh ah poh-a be khüta phäh asun kba Booi Jeishüh Khrito sun ah mhlün mtaai ni. 21 Nang nih-e noh ah mlung hlü nah nih poh khoh vaia nang nih-e üng hlü lü do kti akve naküt Pangsiim noh ning jah pek kti. Ah mkhüh-a hnip naak vaia Pangsiim noh Booi Jeishüh Khrito üng nah nih mlung kkyoonga khuut poh kti ni. Ah hlüng taai naak anghläia kkhyaange noh mküüi mtou u-she. Amen.

22 Kah be naeo, ktha kah ning jah peet naak hlüa kkhyü sun nah nih mlung mshaaü lü ngngaai ua. Kei noh nah nih veeia sa akshaaü nu kah yuk lok kti am ni. 23 Nih na u Timotih khupa kkhyüh ah läh lo be kah ning jah kshing hlü shak kti ni. Ah nih sun ah pha lo lan ta ah nih mah mah-a kah nih ning hmulok kkhaie. 24 Nah nih khong mange jah Pangsiima ngsiim ngsaih kti kkhyaang abäng kah ning jah shüüm kti atia jah mtheh ubä. Italih pea be na abäng noh ning jah shüüm ktiea pyen ktie. 25 Pangsiima bä naak nah nih bäng üng veshe. Amen.