3
1 Akpäih naaka ta kah be naeo, kah nih phäh jah tä sham peet ubä. Pangsiima kkhyü anghläia nglou ngthang ei lä vaia ni, nang nih-ea veeia kba ah jou taai ah ngshing ngte hü vaia ni tä sham ubä.
2 Ngtuui ngten kti kkhyaang ngnei kshe-e noh käh jah ngya kkhaiea Pangsiim noh ah jah kpüi vaia jah tä sham peet ubä. I lüni ti ta kkhyaang akhäk noh thang kdo kkya hin am jum ei hlü u.
3 Lüphi Booi Pa üm naak vaia ngkäih ktia thoon lü ngjung ktha ning jah pek kkhai ni. Shatan yaai pa-a hlo hleep naak üng phi ning jah yung mhlät kkhai ni.
4 Booi Pa-a phäh üng nang nih-e kah ning jah k'üp ei kti ni. Kah ning jah msuh mtheh sun tuh-a phi ngooi veia phi nah nih poh kkhaia kah ning jah üm nak kti ni.
5 Pangsiim nah nih kphya naak khoh vaia Booi Pa noh nah nih mlung ning jah piit pyaang she. Khrito ah ngkhääng ngpaanga kba nah nih ngkhääng ngpaang khoh vaia phi Booi Pa noh ning jah kpüi she.
6 Kah be naeo, akkea ka hin kba Booi Jeishüh Khritoa ksah-a nah nih phäh-a kah mkhyah vai vek kti ni. Khuut am poh xa lü kah nih msuh mtheh am ngngaai hlü kti Khritjaan be nae käh jah püi na-ubä.
7 Kei nih-e hin nah nih jah hju tuih vai hlü kuung kuung kti atia nah nih pät noh nah nih kshing ei ktie ni. Nah nih veeia kah nih ve k'um üng khuut käh poh lü am ve u ngü.
8 Kah nih ei kheen pelü ni buh kah nih ei u. Käh kah ning jah pyang ma ei vaia amhnüüp mthana ngnü ngsheng lü kah nih khüüi ktie ni.
9 Angshaaia ta nah nih jah msah vaia ngkäih kyo kti ni. Lüphi kah nih ve soh ngnei shak nah nih jah hju tuih vaia ahin kba kah nih poh u ni.
10 Nah nih veeia kah nih ve um üng “Am khüüi hlük kti ta käh mbei xa ubä” tilü kah ning jah mtheh khoi ni.
11 I lüni ti ta nah nih veeia akhäk noh dam ulü khuut käh poh xa lü kkhyaange jah kpüi kpak hlü ktia hana ah mpyong üng vaang ei hü kti vek ktie atia kah nih jah ngjaak u ni.
12 Asun kba vek ktie sun Jeishüh Khritoa ksah-a “Nang nih-e nah nih ei ook vaia phäh khüüi khoom lü lit lita ve ua” tilü kah ning jah mtheh ktie ni.
13 Kah be naeo, nang nih-e ta khuut kdo poh vaia käh mhmaan ei laang ubä.
14 Aana sa üng kah ning jah msuh mtheh am ksang nak kti ta mseei ubä. Ah ngke ei vaia käh nglooi ei püi ubä.
15 Lüphi yea ta käh ngngaai ubä. Khritjaan be na-a kba msuuk msääi ubä.
16 Diim deih naaka Booi Pa noh a i a nah nih ve üng phi anghläia diim deih naak ning jah peshe. Booi Pa nang nih abänga hlonga ve she.
17 Kei Polüh noh ahina shüüm naak kkhyü nglung hin kah päta kut üng kah yuk ni. Ahin hin kah sa yuk naküta ngshing ngte naak ni. Ahin kba kuunga kah yuk lo ni.
18 Nih Booi Jeishüh Khritoa bä naak nang nih abäng üng veshe.