1 Kah be naeo, Booi Jeishüh-a lo be vaia mong, ah hlonga nih ve vai ua mong kah ning jah mtheh hlü ham kti ni. 2 Booi Pa-a lo be vai üng shääng ei ktia akhäk noh “Kho mhnüüp phalo hnüh kti ni” ti-ulü akhäk noh “Mhnüh mdan kah hmuk kti ni” ti-ulü akhäk noh “Polüh-a veei sa kah nih yah kti ni” tituhan lü thoon hü kkhaie ni. Asun kba athoon lo üng akjäa nah nih mlung up lat lü käh lu sing ubä. 3 Nang nih-e u noh phi käh ah ning jah mhleei mhlak yah laang vaia mseei ei ubä. I lüni ti ta Booi Jeishüh-a lo be vaia mhnüüp ah pha lo hlaana aksüka kkhyaange noh su ngi lü Pangsiim akshe hleena kpet mjak lok kkhaie ni. Akpäih naaka Mulai pea sim pyak be kkhaia Khritoa Ye Kdäm lo ma yah kkhai ni. 4 Ah nih sun noh kkhyaangea hjok khah ei naküt jah kpet mjak lü asuea kthaka ah pät noh ah pät mhlün mtaai kkhai. Pangsiima hjok khah im nua ngshut lü “Nah nih Pangsiim ta kei hin kuung ni” tilü kkhyaangea ma-a kpyaü kkhai.

5 Nah nih hlonga kah ve ham üng asuna ngkho abäng kah ning jah mtheh khoi sän am nah nih shüüm ti ktie mä. 6 Khritoa Ye Kdäm tuh-a ksüün üng käh pou lo khoh ham kkhaia shük khyak ei kti ve ham kti ni. Asun kba shük khyak ei kti ta i ni atia nah nih kshing ktie ni. Pangsiima mkhyah-a ksüün üng ta pou lok kkhai ni. 7 Pangsiima thuume jah lüüm kkaan kti Khritoa Ye Kdäm tuh-a ngthup ham lüphi ah khuut poh ei lok kti ni. Lüphi shük khyak ei kti sun Pangsiim noh am ah loh laaka kpi shük kkhyak ei ham kkhai ni. 8 Shük kkhyak ei kti sun ah nih loh üng ta Khritoa Ye Kdäm sun angshing ngtea pou lok kkhai. Lüphi Booi Jeishüh ah lo be üng ta ah ngxü kshot üng Ye Kdäm sun hnim kkhai ni. Ah jou taai naak üng sim pyak shak kkhai. 9 Khritoa Ye Kdäm sun Shatan yaai pa-a phun kam üng pou lolü mün sam kshe jah ngshing ngte naak amjü kküm poh lo tuhan kkhai. 10 Sim pyak kkhaia kkhyaange sun ngtuui ngten naak mjü kküm üng jah mhleei mhlak kkhai. I lüni ti ta asuna kkhyaange sun Pangsiima kkhyü ksang am kphya na-ulü am dou daang u. Asuna thoon lü kuum kyan naak am yah khoh u. 11 Asuna thoon lü Pangsiim noh mhleei mhlak sun jum ei kkhaia ah jah mü moong shak. 12 Asun kba Pangsiima kkhyü ksang käh jum ei lü mkhye mhlim mtui ktie abäng sun Pangsiim noh mtaam jah pek kkhai ni.

13 Kah be naeo, Booi Pa noh ning jah kphya nak kti ni. Nah nih phäh-a Pangsiim anghläia kah nih je ei yah kkhaie ni. I lüni ti ta Mkhyangsiim noh Pangsiima ngsiim ngsaih kti kkhyaangea ah nih ning jah piit pyaang vaia phäh, kkhyü ksang nah nih jum ei vai ua phäh ah jah kuum kyan naak nah nih yah vai ua Pangsiim noh aksüka kkhyüh ah nih ning xü ni. 14 Kuum kyan naak nah nih yah vai ua kah nih ning jah mtheh-a thang kdo kkya üng Pangsiim noh ah ning jah khü ni. Booi Jeishüh Khritoa jou taai üng nah nih ngpüi naak khoh vaia phi thoon kti. 15 Kah be naeo, asuna thoon lü ngkhääng ngpaang ktia jum ei ua. Kei nih-e noh hmüüi mpyong üng ni, sa üng ni kah ning jah msuh mtheh naak ksüng ei kyet ubä.

16 Nih Booi Pa Jeishüh Khrito kuung jah jah kphya nak kti nih Pa Pangsiim noh ah bä naak üng angshääia ktha phya naak jah pelü do kya ktia ääp ei naak ah jah peet ni. 17 Ah nih noh ktha ning jah pelü do ktia kkhyü nah nih pyen vaia ni, do ktia khuut nah nih poh vaia phi ning jah kpüi she.