TESHAH LONIH-EA SA AKSÜK
Polüh noh Teshah Lonih mlüh shaang üng ah kbia sa aksük
1
1 Kei Polüh, Shi Vanuh jah Timotih noh Teshah Lonih mlüh-a vek kti Pa Pangsiim jah Booi Jeishüh Khrito üng shääng ei ktia shaang üng sa kah nih ning kbi lok kti ni. Nih nih-ea Pa Pangsiim jah Booi Jeishüh Khrito noh bä naak jah diim deih naak ning jah peshe.
2 Kei nih-e noh nah nih phäh-a Pangsiim anghläia kah nih je ei ktie ni. Nah nih phäh-a phi anghläia kah nih ning jah tä sham peet ktie.
3 Nang nih-e noh nih Booi Pa Jeishüh Khrito üng i hok kba onga jum ei naak üng khuut poh lü mhlä kphya naak üng ngnoi ngsai lü ääp ei naak üng ngkhääng ngpaang lü nah nih vek ktie atia nih Pa Pangsiima ma-a kah nih shüüm lä ktie ni.
4 Kah be naeo, Pangsiim noh ning jah kphya nalü ah ning jah ka naak vaia ning jah xü kti ati sun kah nih kshing ktie.
5 I a thoon lüni ti ta kei nih-e noh nang nih-ea veeia thang kdo kkya kah ning jah kpyaü lo üng kah nih mpyong däk üng käh nik ktia, hiit jah Mkhyangsiima kpüi kpak naak üng aana thang kdo kkya hin sang kti atia mlung üp lü kah ning jah msuuk mtheh ktie ni. Nah nih hlonga kah nih ve üng i hok kba kah nih ve soh ngnei shak nak kti atia nah nih kshing ktie. Nah nih phäh-a phi do naaka thoon kti ni.
6 Nang nih-e noh kei nih-e jah Booi Pa nah nih jah hju mtääm ktie ni. I a thoon lüni ti ta khui kha naak mjü kküm khaam ei kyo u kti lüphi Mkhyangsiima ning jah peet je kyai naak üng Pangsiima kkhyü nah nih dou daang ktie.
7 Asun kba ni Make Tonih hne jah Kärih hnea jum ei kti nakütea phäh-a akdo jah mtuih mhnüh mtheh ktia nah nih thoon ktie ni.
8 I a thoon lüni ti ta nang nih-a kkhyüh lü Pangsiima kkhyü Make Tonih jah Kärih hnea nglou ngthang hü kti ni. Asun däk am ni. Pe naküta nang nih-e noh Pangsiim i hok kba onga nah nih üm nak ktie atia hmat hü päih ktie ni. Asuna thoon lü kei nih-e noh nah nih jum ei naaka mong kah nih pyen hü vai phi am hlü ti.
9 Nah nih veeia kah nih lo üng akdoa nah nih jah nah dou daan lü mhnama lup hoih lü Pangsiim da nglat be lü xüng kti Pangsiim ksanga khuut nah nih poh ktie atia kkhyaang naküt noh pyen hü ktie ni.
10 Asun däk am nilü Pangsiim noh thih naaka kkhyüh ah mphyün be ah sa kpa Booi Jeishüh sun kkhaan khoa kkhyüh ah kyum lo be vai ääp lü nah nih mtät ei ktie ni. Asuna Booi Jeishüh noh nih nih-e Pangsiima mtaam jah peet naak vai üng jah yung kti ni.