4
1 Nang nih amah pae noh phi nah nih mpyae sun alooi ngkäih-a jah shube ua. Ah nih yah ngkäih phi jah pe-ubä. Nang nih-e phi kkhaan khoa nah nih mah pa vek kti atia shüüm ubä.
2 Anghläia tä sham ua. Ngthiim ng'yääi lü Pangsiim je nalü tä sham ubä.
3 Kei nih-a phäh phi jah tä sham peet ubä. Pangsiim noh kei nih-e hin thang kdo kkya kpyaü kkhaia ni, ngthuh kti Khritoa be ngshing ngte shak kkhaia mkot ah jah nghmon peet vai jah tä sham peet ubä. Asunea phäh-a kei khup üng kah veyah kti ni.
4 Pangsiim noh ah nah xüh-a kba Khritoa thang angshing ngtea kah kpyaü hü khoh vaia nah tä sham peet ubä.
5 Khrito am jum ei ktiea kshuunga nah nih ve soh mseei ei ua. Nah nih ksüün akdoa shum ei ubä.
6 Nah nih pyen mkhiin mkhäk ubä. Kkhyaang naküt i hok kba jah mshak be vai ati sun kshing vai hlü kti.
7 Kah nih kphya naak kah nih na, Tiki Küh noh keia thang küm seei ktia ning jah mtheh lok kkhai ni. Ah nih hin kkhyü shing üng nah ku ei lü kah hlonga Pangsiima khuut poh mshah kti ni.
8 Kah nih bängea ve soh kshing u kti lü nah nih xe naak vaia nah nih veeia kah tüih lo ni.
9 Ah nih-a hlonga Ong Simüh phi lok kkhai. Ong Simüh hin kah nih kphya naak kah nih na-a thoon lü kkhyü shing üng ngkhääng lü kah nih pä üng phi ngpüi kti ni. Ah nih nih noh hia thoon hlok abäng ning jah mtheh kkhaie ni.
10 Keia hlonga khup üng vek kti Arih Taküh noh phi ning jah shüüm kti. Pana Pa-a na Marküh noh phi ning jah shüüm kti ni. Ah nih hin nah nih veeia ah lo üng ta nah nih dou daan vaia kah ning jah sük lo pääng ni.
11 Jotüh-a ngshui kti Joshüh noh phi ning jah shüüm kti. Ah nih nih kthume däk hin ni Jüdah-e üng ka Khrito jum lo ulü keia hlonga Pangsiima pea phäh khuut poh ktie. Ah nih nih-e noh kei nah kpüi kpak ktie ni.
12 Nah nih veeia kkhyüh lok kti Epa Pyah noh phi ning jah shüüm kti ni. Ah nih hin Khritoa xüh shoh-a thoon lü mtun ei kuung lü anghläia ning jah tä sham peet kti ni. Nah nih jum ei naaka ngkhääng lo vaia ni, asääng taai lo däm däm vaia, Pangsiima hlü ei i ni atia küm seei ktia nah nih kshing lo vaia, Pangsiima veeia tä sham kti.
13 Ah nih sun noh nah nih phäh-a phi Lotih Ke mlüh jah Hira Polih mlüh-a jum ei ktiea phäh-a phi mtun ei kkhüt lü khuut poh kti atia kei hin kah shak shi kti ni.
14 Kah nih kphya naak shei shala Lükah jah Temah noh phi ning shüüm kti xooi ni.
15 Lotih Ke mlüh-a vek kti jum ei ktie phi Nün Pa jah ah ima ngkhääm kti shaang ngsiim üng kae phi kah nih jah shüüm ktie atia jah mtheh ubä.
16 Aana sa hin nah nih büh kon ua Lotih Ke mlüh-a shaange noh phi ah nih büh vaia jah kbi ubä. Nang nih-e noh phi kei noh Lotih Ke mlüh-a jum ei ktiea phäh kah jah kbia sa sän bük ubä.
17 Akhi Pu üng “Pangsiim noh nah poh vai ah ning xüh khuut nah msän vaia mtun ei bä” tilü mtheh ua.
18 Ahina shüüm naak sa nglunge hin kei Polüh noh kah päta kut kuung üng kah yuk ni. Khup üng vek ktia kba kuunga ah nih nah taak u hin shüüm ubä. Pangsiima bä naak nah nih veeia veshe. Amen.