5
1 Nih puum sha-a thoon kti hina kho mdeka im hin ah sim pyak ta Pangsiima jah peet im vek kti atia nih kshing ktie. Asuna im ta kut üng käh poh-a kkhaan khoa angshääia ve naak vaia im ni.
2 Kkhaan kho ima vehlü u ngüshe kah nih ngkou nghleei ktie ni.
3 I lüni ti ta kkhaan kho puum sha nih yah ei u üng ta shui shak kka-a kba am nih ve ti u.
4 Nih puum sha-a thoon kti hina kho mdek ima nih ve k'um u üng boong kha ngkou nghleei lü nih veyah ktie ni. Nih puum sha kphyüm sun shui shaka kba shuh-in hlü ta am ni kyo. Lüphi puum sha kthaai sun ta akthaaia shui ngvaih ei mshapa kah nih yü ktie. Asun üng thi-khoh ktia puum sha hin khyük leih lü angshääia ve kkhaia puum sha üng xüng hnüh kkhai ni.
5 Pangsiim kuung noh ni ahina ngthu nghlai naak vai nih nih-e üng ah jah mshääm peet. Pangsiim noh ah jah mshääm peeta mshing mte naaka ah Mkhyangsiim ah jah peet ni.
6 Asuna thoon lü anghläia kah nih xe xok nak ktie. Ahina puum sha üng ve k'um hin üng Booi Pa üng nih thuuk ktie atia nih kshing ktie.
7 Nih xün naak u hin mik üng nghmuh kti üng ngphun ei kti am ni. Jum ei naak üng ngphun ei kti ni.
8 Nih xe xok na-ulü kho mdek üng shääng ktia puum sha üng ngkya lü Booi Pa üng ayüma ve vai nih yü na-bok kkhaie ni.
9 Lüphi Booi Pa-a dä ayüma ve üng phi nishe, ahina kho mdeka ve ham üng phi nishe ah mlung hlü poh vaia kah nih mtun ei ktie ni.
10 I lüni ti ta nih bänge hin Khritoa si jaang naak ngoh naaka ma-a nih ngdüüi yah kkhaie ni. Asua kkhyaang naküt hin kho mdeka ah ve k'um üng akdo akshe ah poh-a kba kheen yah ei kkhai.
11 Booi Pa kyüh vai hlü kti ati sun nih kshing ua phäh Pangsiima kkhyü ah nih ksang naak vaia kkhyaange nih jah hlo ktie. Kah nih ve soh poh mshah phi Pangsiim noh ah kshing ni. Nang nih-ea mlung kkyoong phi ahin kba kuunga shak shi kkhai tia kah ngngaih.
12 Nah nih jah mküüi ei vai ua kah yuk lo am ni. Lüphi kei nih-ea phäh nah nih hmaai mah naak vai kah pyen ni. Asun üng kkhyaanga hmuh naak khoh üng pa kkhyap ulü mlung ngnei ta i a am mshui ei ktie sän nah nah jah mshak be khoh ktie ni.
13 Kei nih-e hin kah nih ng'yo ktieo. Asun kba ani üng phi Pangsiima phäh ni. Am ani üng kah nih ngthiim ktieo. Asun ani üng phi nang nih-ea phäh ni.
14 Khritoa kphya naak noh kei nih-e jah up kti. I lüni ti ta kkhyaang abänga ksah-a kkhyaang mat ah thih-a phäh ah nih-a thih naak üng kkhyaang abäng ngpüi kti atia kah nih kshing lok ktie.
15 Kkhyaang abänga phäh Khrito i lü thi-yah kti ni ti ta kkhyaange hin päta do naak vai däka käh xüng shei ti lü ah shak jah pelü jah mthou be kti Khritoa phäh-a ah nih xün shei be vaia phäh ni.
16 Tuh-a kkhyüh lü a u phi kkhyaanga mik üng hmuh-a kba am si jaang ti u ngü. Ahlaan üng ta Khritoa mong phi kkhyaanga mik üng hmuh-a kba kah nih su ngngaih u. Tuh hi ta asun kba am ngngaai ti u ngü.
17 Kkhyaang mat hin Khrito üng ah nglooi ei ta akthaaia mhnün msenga kba vek kti. Ah su ngngaih ngnei shak kphyüm naküt phi khyük leih päih kti. Abäng akthaai kkinga thoon lok kti.
18 Ahin abäng naküt hin Pangsiim kuunga poh ni. Ah nih noh ah pät sun Khrito üng nih nih-e jah ng'ye shak be kti. Kkhyaange phi Pangsiim üng ah nih ng'ye be vai ua nih nih-e üng khuut mta ah jah peet ni.
19 Kei nih-e pyena thang ta Khrito üng kkhyaang abäng ah nih üng ah jah ng'ye hlü shak bea mong ni. Pangsiim noh kkhyaangea mkhye sun am jah säp ei ti. Kkhyaang abäng ah nih üng ah jah nglooi ei hlü shaka mong sun ni ah jah kpyaü shak.
20 Asuna thoon lü kei nih-e hin Khritoa ngshäe ni. Pangsiim hin kei nih-ea kkhyüh ngthu ei kti. “Pangsiim üng ng'ye be ua” tilü Khritoa ksah-a kah ning jah nghui nak ktie.
21 Khrito ah mkhye am velaang kyo. Lüphi Pangsiim noh nih nih-ea mkhye naküt ah nih-a kkhaana ah mtaih ni. Asuna thoon lü Khrito üng nih nglooi ei ua phäh Pangsiim noh ngpyuun ktia ah jah thoon shak ni.