4
1 Pangsiim noh ah jah mpyeen msheei naak üng ahina khuut poh kkhaia ah jah msoon ni. Asuna kyalü am jah mhjai ei.
2 Ampyu kkhi jah ngkei ei kshe poh mshah ve soh sun kah nih mphen ei u ni. Kkhyaange sun am jah mhleei mhlak ei u ngü. Pangsiima kkhyü be phi ngtuui ngten lü am pyen u ngü. Pangsiima hmuh-a phi aksanga küm seei kti akvaaia k'uma phi kah nih xüng shei ktie. Kei nih-e hin kah nih sang, am kah nih sang sun kkhyaang naküta mlung kkyoong shak shi she.
3 Kah nih kpyaü thang kdo kkya hin ngkhüm ei-in ktia athoon ta sim pyak kkhaie kkhyaangea phäh ni angkhüm ei kom.
4 Ahin kho mdeka mhnama thoon kti Shatan yaai pa noh ah nih mlung kkyoong pum ngyam sun ah jah nghmüp shak ni. Asuna thoon lü ah nih nih-e noh thang kdo kkya-a kvaai jah Pangsiima joong shaanga thoon kti Khritoa jou taai am hmukhoh u.
5 Kah nih päta mong kah nih pyen ktie am ni. Booi Jeishüh Khrito hin Booi Pa-a thoon kti ati jah kei nih-e hin Booi Jeishüh-a phäh nang nih-ea xüh shoh-a kah nih thoon ktie ati sun kah nih kpyaü ktie ni.
6 Pangsiim noh “Anghmüp naak üng akvaai vaai shaka” ah ti. Ahina Pangsiim noh akvaai sun nih mlung kkyoonga vaai shak kti. Asun üng Khritoa hmaai üng Pangsiima jou taai nih kshing lo ulü akvaai nih yah ei lok ktie.
7 Nih nih-e hin ngboih um naak mdek k'am üng nih täng ktie ni. Däm duh ktia hiit hin kei nih-ea kkhyüh lok kti am ni. Pangsiima kkhyüh lok kti atia kei nih-e üng ngshing ngte lok kti ni.
8 Aläa khui kha mjü kküm khaam ei kyo u ngüshe phi kah nih ääp ei naak am pyak. Kah nih mlung up lat kyo lüphi kah nih ktha shek ktie ta am ni.
9 Mkhuh mhlih khaam ei kyo u ngüshe phi Pangsiim noh am jah hoih. Ye noh jah thäk lü kyu mhlat-in kyo u ngüshe phi am sim pyak u ngü.
10 Sim pyak khoh kti kah nih puum sha üng Booi Jeishüh-a thih naak jah khui kha naak sun anghläia kah nih khaam ei ktie ni. I lüni ti ta Booi Jeishüh-a xün naak phi kei nih-ea puum sha üng angshing ngte lo vaia phäh ni.
11 Kah nih xün k'um naküt üng Booi Jeishüh-a phäh kah nih thih naak vai kking vek kti. I lüni ti ta thi-khoh kti kah nih mti sha üng Booi Jeishüh-a xün naak angshing ngte lo vaia phäh ni.
12 Mkhyangsiim noh ah jah peet xün naak nah nih yah vai ua kei nih-e noh anghläia thih naak kah nih shoong yah ktie ni.
13 Sangsiim üng ng'yuk kti ta “Kah jum eia phäh kah pyen ni” tilü vek kti. Kei nih-e üng phi asuna jum ei naak vek kti. Jum ei u ngüshe kah nih pyen u ni.
14 Booi Jeishüh thoh shak be kti Pangsiim noh kei nih-e phi Booi Jeishüh-a dä ayüma jah thoh shak be lü nang nih-ea dä ah hmaai ma-a jah khü kkhai ati sun kah nih kshing ktie.
15 Ahin abäng hin nang nih-ea phäh kah nih khaam ei u ni. Pangsiima bä naak kkhyaang kho hah-a veei apha lo bok bok ta Pangsiima veei tä sham ulü je nak ktie, Pangsiim mküüi mtou ktie phi nung lobok kkhaie ni.
16 Asuna phäh kah nih ktha am jai. Kah nih mti sha üng ktha ngpam lokyo lüphi kah nih kkhyaang kthaai ta amhnüüp tä lü Pangsiim noh piit pyaang lü ah ktha mah shak bok bok ni.
17 Kah nih khaam eia khui kha hin am pyen hmuh kho noong veia kyak kti. Ahina phäh ahina khui kha üng käh mtu mtäng vaia däm duh lü angshääia jou taai naak nih yah ei kkhaie.
18 I lüni ti ta mik üng hmuh khoh sun käh bük kyet lü mik üng am hmuh yah ni kah nih büh kyet u. Mik üng hmuh yah naküt hin mhnüüp mat üng khyük leih be päih kkhaie ni. Am nghmuh khoh kti naküt ta angshääia ve-ei lä kkhaie.