1 Asun üng ta khotu ngsiim kdäm bok noh “Ah nih pyene hin aksang mä” tilü ah kthäh. 2 Satei Phan noh “Kah paeo, kah be naeo, ngngaai ua. Nih pu pa Apyaham hin Haran mlüh-a ah ngpyong hlaana Meso Potamih pea ah ve k'um üng jou taai mah ktia Pangsiim sun Apyahama veeia ngshing ngte lok kti. 3 Asun üng Pangsiim noh ‘Tuh-a nah ve naak, nah tui khyong phi, nah hnuun püi kphyaai be jah nah püi poe naküt phi jah hoih lü keia kah ning mhnüh naak vaia teng pea sita’ tilü Apyaham üng ah mtheh. 4 Asun üng Apyaham sun Kale Tang (Meso Potamih) pea kkhyüh sit lü Haran mlüh-a vevaai kti. Apyahama pa ah thih kona tuh nah nih ve naak teng pe hia Pangsiim noh ah ngpyong lo shak ni. 5 Apyaham üng ah ka vai kho mdek khap mat sa phi am pe ham. Asuna thoon lü phi ahina teng pe hin Apyaham üng ah peet vaia ah pyen ni. Apyaham jah ah mshuuie noh kho mdek yah kkhaie ni tilü kkhyü ah taam ni. Pangsiim noh Apyaham ahin kba ah ng'aan ei üng ah sa kpa mat phi am ve ham. 6 Pangsiim noh Apyaham üng ‘Nah mjü mshuuie hin kkhyaang kse-ea teng pea vek kkhaie ni. Asua kho kum phya kphyü mpya-a thoon ulü khui kha kshe suun ei kkhaie ni. 7 Asuna thoon lü phi ah nih-e jah mpya nak kti kkhyaang mjü kse üng mtaam kah jah pek kkhai ni’ tilü ah pyen ni. 8 Pangsiim noh Apyaham üng be khüt ah poh-a ngte naak vaia vun moih ah poh shak ni. Apyaham noh ah sa Isak sun mhnüüp kkhyet üng aksüka mhnüüp üng vun moih ah poh peet. Isak noh phi ah sa Jakop ah poh peet ni. Jakop noh phi ah sa xalei nghngih ah jah poh peet. Asune hin nih mjüe nih pu pae ni. 9 Asuna nih pu pae noh ah nih na Joshep kkeei ei ulü Ekip pea mpya-a ah nih joih ei u. Asuna thoon lü phi ah nih da Pangsiim ngtung kyet kti ni. 10 Khui kha mpyeen sheet ah suun ei naküt üng Pangsiim noh ah mhlät mhlang ni. Pangsiim noh Joshep üng mün sam kshe kshing hmat naak pelü Ekip pe shang phuhlang Pharoh-a ah mküüi mkhyah eia ah thoon shak ni. Pharoh noh Ekip pe phi, ah ime phi, ah khoh van naküt phi jah up kkhaia ah msoon ni. 11 Khanaan pe jah Ekip pe abäng üng ei kho jo lolü kkhyaang naküta khui kha mpyeen sheet naak thoon lok kti. Nih pu pae noh phi ah nih ei ook vai am hmuh thei ei u. 12 Jakop noh Ekip pea kkhyääi ave ngja-lüta ah sae aksüka ah jah tüih. (Ah sae sun tuh-a ta nih pu paea thoon lok ktie ni) 13 Anghngih naak ah nih seh u üng ta ah be nae noh Joshep atia ah nih kshing vaia ah jah mdan. 14 Joshep noh ah be nae jah tüüi be lü ‘Kah pa Jakopo, Ekip pea nah kkyoonga jah ngkon lo püi bä’ tilü ah sük. Asun üng Joshepa hnuun püie abänga kkhyüh kip mhma lok ktie. 15 Asuna thoon lü Jakop Ekip pea ngpyong lok kti. Asua Jakop jah nih pu pae thipäih ktie. 16 Ah nih yuh-e Shei Khem mlüh-a jah kpyong ulü ah nih jah mkhyüh u. Ah nih jah mkhyüh naak msüm hnün sun Apyaham noh Hamo mjüea veei ah kkhyäih hüt ni. 17 Pangsiim noh Apyaham üng kkhyü ah taam sun apha lo hnüh vai üng Ekip pea vek kti nih mjü mjoonge pung lopyei ktie ni. 18 Asu kba pung lopyei ulü Joshepa mong am hmat kti shang phuhlang noh Ekip pe jah up lok kti. 19 Asuna shang phuhlang noh nih mjüe sun jah tuui ten lü ah jah mkhui mkha. Hnashene phi thi-kyu ei kkhaiea moa ah jah xot kpyaai-in shak. 20 Asun k'um üng Moshei ah nih sa naak ni. Asuna hnashen sun ngtou sa kti ni. Ah nu pa noh ah nih ima khya kthum süm lü ah nih büh ten u. 21 Am thup khoh ti ulü moa ah nih tha vaai u. Pharoh-a sa nghnu noh hmuvaai lüta hooi ei lü ah sa vaia ah msah ei. 22 Ekip pea pum ngyam naküt Moshei noh ngthei päih lü nglou ngthang lok kti. Ah hmüüi mpyong phi theem lok kti. 23 Moshei sun kho kum kphyü kip ah lo üng ah püi Isare mjüe jah bük vaai kkhaia ah ngngaih lo. 24 Ekip pa mat noh ah püi Isare pa anghnge naak sun Moshei noh hmulüta ah püi ku ei kkhaia sit kti. Thung ei be lü ah hnim. 25 Pangsiim noh Moshei shum ei lü ah mjü jah mhlät mhlang kkhai ati sun kshing kkhaie mä tilü ngngaai kyo lüphi ah püie noh am dang yah u. 26 Angooi üng Isare amat xooi ngtuun nih lü ah jah hmuh. ‘Kah püi xooio, nang nih ngbe ngna xooi ni. A i nah nih ngtuun kti ni’ tilü ah jah mkhya vaai. 27 Ah püi nghnge nak kti noh Moshei buh kpyaai-in lü ‘Kei nih-a kkhaana khong mang poh lü jah si jaang kkhaia u noh ah ning msoon ni. 28 Mü ta üng Ekip pa nah hnima kba nah nah hnim hlü kkhe ve mä’ tilü ah kthäh. 29 Asun sun Moshei noh ngja-lüta Ekip pea kkhyüh Mih Tang pea sen kti. Asua vevaai lü nghngih jah sa nak kti. 30 Kho kum kphyü kip ahjou lo kona Shih Naai msuung kho kkhe anghi naaka Moshei vek kti. Asua meia dääi kti kpyüüm üng kkhaan kho ngshä Mosheia ma-a pou lok kti. 31 Asuna mün sam kshe sun Moshei noh hmulü angtea bük vaai kkhaia theih vaai kti. Asun üng ta Booi Pa-a kthai ah ngjaak. 32 ‘Kei hin nah pu paea nah Pangsiim ni. Apyahama nah Pangsiim ni. Isak jah Jakopa nah Pangsiim ni’ tilü ah pyen. Moshei ngak ngak täh lü kyüh ei lü am hei tou dat. 33 Asun üng Booi Pa noh ‘Nah kho dok hin shuuta, nah ngleh ei naak hin ngsiim ngsaih ktia mdek ni. 34 Kah kkhyaange Ekip pea ah nih jah mkhuh mhlih kah jah hmuh shiik ni. Kah kkhyaangea mboih kyah kthai kah ngjaak ni. Ah nih nih-e jah mhlät kkhaia kah kyum lok kti ni. Asuna thoon lü Mosheio, ngpyaih xata. Ekip pea kah ning tüih vai ni’ tilü ah mtheh. 35 Moshei sun Isare-e noh ah nih hai, ah nih kpet mjak khoi u ni. Pangsiim noh ta kkhaan kho ngshä üng meia dääi kti kpyüüma kkhyüh Moshei sun ah mtheh shak. Isare-ea khonga thoon lü jah thoong khyah kkhaia ah tüih lo. 36 Moshei noh kkhyaange sun Ekip pea kkhyüh jah khü lü Ekip pea phi mpang lai tui shena phi kho kum kphyü kip moa ah nih ve naaka phi ngshing ngte naak jah mün sam kshe poh mshah kti. 37 Moshei noh Isare-e üng ‘Pangsiim noh keia kba shahma ngsiim nah nih veeia tüüi lok kkhai ni. Asuna shahma ngsiim sun nah nih mjü mjoonga kkhyüh pou lok kkhai ni. Ah nih-a pyen kshak nah nih ksang nah yah kkhaie ni’ tilü ah mtheh. 38 Isare shaang moa ah nih ve üng Moshei phi ah nih hlonga vek kti. Nih pu paea dä ve yüm ktie. Shih Naai msuunga ngsi ngjaang püi kti kkhaan kho ngshä phi ah hmuh. Ah nih noh nih nih-ea phäh Pangsiima kkhyü ah dou daan ni. 39 Asuna thoon lüphi nih pu pae noh ah nih-a pyen sun käh suh lih ei ulü ah nih not u. ‘Ekip pea nih seh be khoh ua ta bäk hüt kkhai shü’ tilü asun kking ngngaai ktie. 40 Aron üng ‘Nih nih-e hin Ekip pea kkhyüh jah khü lok kti Moshei i a ave phi am nih kshing yah u ta Ekip pe da lam jah mshüüm kkhaia mhnama lup jah msom peeta’ tilü ah nih pyen u. 41 She sa-a lup ah nih msom u. Mhnama ah nih ngngaih she sa-a lup sun kkhyüng kshei üng ah nih khah u. Ah nih kut üng ah nih msom mhnama lupa phäh je kyai tong ulü pooi kdäm nu poh ktie. 42-43 Asun üng ta Pangsiim noh akse da ah jah man ei taak ni. Nghngi, khya, aai shie jah hjok khah kkhaiea ah jah ton ni. Asuna thoon lü Pangsiima kkhyü shahma ngsiime noh sa up üng ah nih yuk ta ‘Isare-eo, kho kum kphyü kip moa nah nih ve u üng keia phäh-a kkhyüng kshei üng khah naak nah nih poh ktie am ni. Moloka nah nih shui mhnama tai phi nah nih hlonga nah nih seh püi u ni. Rei Phan ngming nah kti mhnama lup aai shi phi nah nih hlonga nah nih seh püi u ni. Ahin mhnama lupe hin nah nih hjok khah vai ua nah nih msom ei u ni. Asuna thoon lü Papu Lung teng pea kah ning jah tüüi-in kkhaie ni’ tilü vek kti. 44 Nih pu pae moa ah nih ve k'um üng ah nih hlonga Pangsiim ave ngshing ngte kkhaia hjok khah naak vai ah nih hlonga jih shung müüp ah nih seh püi u. Ahina jih shung müüp hin Pangsiim noh Moshei üng ah nüt yaan peeta kba ah mtheh-a kba ah nih shak u ni. 45 Nih pu pae noh ah nih pu paea kkhyüh ah nih shääm lo lääi lääi u ni. Joshüh-a dä ah nih seh u üng phi ah nih seh püi u. Pangsiim noh kkhyaang mjü kse-e ah jah kshät peeta teng pe sun Isare-e noh khoh yam nak kkhaia ah nih vaan lo vai u üng phi jih shung müüp ah nih seh püi u. Davit säpa asuna jih shung müüp vek kti. 46 Pangsiima ma-a Davit hmaai mah kti ni. Jakopa Pangsiim ah ve naak vai hjok khah im nu shak peet kkhaia ah tä sham kyo. 47 Nikyo lüphi ah sa kpa Sholoh Mong noh hjok khah im sun ah shak peet yah ni. 48 Asuna thoon lüphi hlüng taai bok ktia Pangsiim hin kkhyaanga shaka ima am um khoh. Pangsiima kkhyü shahma ngsiime noh ah nih yuk ta 49 ‘Kkhaan kho hin kah ngshut naak ni. Kho mdek hin kah kho kah mtaan naaka khum khäh ni. Nang nih-e hin noh keia phäh-a i a mäi im nah nih nah shak peet khoh kkhaie ja. Kah ngxü ngkou naak vai hoa i vek kkhai ni. 50 Kah kut üng ve naküt kti abäng hin kah jah mhnün msenge va am ni bä’ tilü Pangsiim noh ah jah mtheh. 51 Mlung kka ngngaih kka kti kkhyaangeo, Pangsiim am kshing ham ktie üng nah nih täng ktie ni. Pangsiima kkhyü nah nih nghnga üng am va-lut laang kti ni. Nang nih-e hin nah nih pu pae üng nah nih lang lang ktie ni. Nang nih-e hin Mkhyangsiim aläa nah nih kpet mjak ktie ni. 52 Nah nih pu pae noh shahma ngsiim naküt jah mkhuh mhlih ktie am ni bä. Ahlaan üng Pangsiima kkhyaang ngpyuun kti ah lo naak vai ah napyen ktia shahma ngsiim phi ah nih hnim u ni. Asun kba ngpyuun kti sun nang nih-e noh ta tuh hi ktuun ei lü nah nih hnim ktoih u ni. 53 Pangsiim noh kkhaan kho ngshä üng ah ning jah peeta thuum sun nah nih pu paea kkhyüh-a nah nih yah ei ktie ni. Asuna thuum sun nang nih-e noh ta am nah nih läk laang ngtu u ni” tilü Satei Phan noh ah pyen.

54 Asun kba ah ti sun kong sia ngkhääm ktie noh ngja-ulü ah nih mti sha phi phyüt shek-in hlü täh thüi lok ktie. 55 Satei Phan ta Mkhyangsiim üng be lü kkhaan kho da mang lü mdei kyet kti. Pangsiima jou taai ni, Booi Jeishüh sun Pangsiima kkheet lama ngdüüi kti ni ah hmuh. 56 “Bük ua, kkhaan kho nghmong kti ni. Kkhyaang Sa Pangsiima kkheet lama ngdüüi kti kah hmuh ni” tilü ah pyen. 57 Asun üng ta ngpyaang ngpyet-in ulü ah nih nghnga ah nih jah kbom kyet u. Ahunata Satei Phana veei dong ulü ah nih hloop-in vaai u. 58 Mlüh the da mshot ulü ah nih hnim vaia lung üng ah nih khoong u. “Satei Phan hnim vaia ngkäih kti ni” tilü shak shi ktia kkhyaange noh Sholüh-a ah nih shuia kkhyaanga kho kuunga ah nih shui shak ah nih jah taak u. 59 Lung üng ah nih khoong k'um üng Satei Phan noh “Booi Jeishüh-o, kah ngmüi mkhya nah dou daanga” tilü Booi Pa-a veei tä sham kti. 60 Asun üng ah mkhuuk lu üng ngdääng lü “Booi Pao, ahinea mkhye mshoh hin i a phi käh jah su ngngaai bä” tilü ngpyaang lü thik kti ni.