1 Asun kona akläke phi nung lo-ulü Kärih läk pyen kti Jüdah-e jah Isare teng pea hmi kti Jüdah-e ah nih kkeh-a mlup msik naak velok kti. Amü ngooi tä lü ei ook ah nih jah yet lo üng Kärih läk pyen kti Jüdah hmeei nue noh angteh-a am yah ei u tilü ah nih mjü püie am jah je ei lo-u. 2 Asun üng ta ngshä xalei nghngih noh jum ei kti abäng jah ngkhääm shak ma ulü “Kei nih-e hin noh Pangsiima kkhyü kah ning jah msuh mtheh vai hoih lü ei ook kah nih si jaang vai u ta am nglooi ngkäih kti ni. 3 Asuna thoon lü kah nih be naeo, nang nih-e üng kkhyaang kkhyüh jah xü ua. Asuna kkhyaange sun Mkhyangsiim üng be yah kkhaie ni. Kshing hmat thei yah kkhaie ni, ah nih ngnei shak do yah kkhaie ni. Ei ook si jaang kkhaia kah nih jah msoon vai u ni. 4 Kei nih-e ta anghläia tä sham lü Pangsiima kkhyü kah nih jah msuuk mtheh kkhaie ni” tilü ah nih pyen u. 5 Asun kba ngshäea mkhüh sun ngkhääm lok kti abäng noh ah nih yü naak u. Asun üng Satei Phan ah nih xü u. Asuna kkhyaang sun jum ei naak ngkhääng lü Mkhyangsiim üng be kti ni. Philip, Pyokoh, Nikhano, Thimon, Pa Menah, Nikhoe phi ah nih jah xü u. Nikhoe ta Jüdah mjü am ni. Anti Ook mlüh pa, Jüdah-ea Pangsiim jum ei lok kti ni. 6 Jum ei ktie noh ah nih jah xüe sun ngshäea ma-a ah nih jah taak u. Asunea phäh ngshäe noh jah tä sham peet ulü ah nih lu kkhaana ah nih kut ah nih mtaan u. 7 Pangsiima kkhyü be nglou ngthang lo hü däm däm lü Jeirüh Shalem mlüh-a akläke phi nung lo nak nak ktie. Khotu ngsiime phi kho hah noh jum ei lok ktie ni.

8 Satei Phan ta Pangsiima bä naak üng phi, ahiit üng phi, be bang lü ngshing ngte naake jah mün sam kshe-e kkhyaangea hmaai ma-a poh mshah kti. 9 Akhäke noh ta Satei Phan kpet mjak ulü thoon ktie. Asue üng “Lät ktiea Sangsiim ngthei naak kyong” ah nih shui kyonga ka lo hü ktie. Shüreneh, Alek Santa päa kae ni, Shili Shia, Asha üng ka lo hü kti Jüdah-e noh Satei Phan sun ngthäh ngkhyah püi ktie. 10 Asuna thoon lü phi Mkhyangsiim noh Satei Phan üng mün sam kshea pum ngyam ah peeta thoon lü ah nih nih-e noh Satei Phana pyen sun am hai khoh u. 11 Asun üng ta “Moshei jah Pangsiim jah thang msheet ei lü ah pyen kah nih ngjaak ni” tilü ah nih hleei msom kkhai kkhyaange ah nih jah khü u. 12 Asun kba ni kkhyaang päe phi, khong mange phi, Sangsiim ktheeme phi ah nih jah mhläk u. Ah nih nih-e sun Satei Phana veei lo-ulü man lü kong sia ah nih seh püi u. 13-14 Asun kona ahleei pyen lü shak shi kkhaie ah nih jah khü u. Asue noh “Nih nih-ea ngsiim ngsaih kti hjok khah im nu phi, Mosheia thuum phi aläa msheet ei lü ah pyen ni. Asuna Nasaret mlüh-a ka Jeishüh noh hjok khah im nu phyeh-in kkhaia phi, Mosheia kkhyüh ah nih shääm lo nih thuum seen abäng hlai päih kkhaia phi Satei Phan noh ah ti kah nih ngjaak u ni” tilü ah nih pyen u. 15 Asun üng ta kong sia ngkhääm kti abäng noh Satei Phana mik hmaai sun bük kyet ulü kkhaan kho ngshäa mik hmaaia mäi ah nih hmuh u.