1 Peta jah Johaan kkhyaange üng ah nih ngsi ngjaang k'um üng khotu ngsiime, hjok khah im nu mtät kti ngtuk kpoh-ea khong jah Satüke-e ah nih veeia lok ktie. 2 Asune sun ah nih mlung shou ktie. A i ani ti ta “Booi Jeishüh sun thih naak üng Pangsiim noh ah mthoh be ni. Asuna thoon lü akthie ah nih üng xüng be kkhaie ni” tilü ngshä xooi noh kkhyaange ah nih jah msuh mtheh. 3 Peta jah Johaan sun ah nih jah man u. Asun üng kho mü lüta akho ngooi lam säpa khup üng ah nih jah pheh u. 4 Nikyo lüphi Peta jah Johaana pyen sun ngja-ulü kho hah pa noh ah nih jum ei lo u. Jum ei lok ktie sun thoong mhma bang lok ktie. 5 Akho ngooi üng ta Jüdah-ea khong mange, akdäme jah Sangsiim ktheeme Jeirüh Shalema ngkhääm ktie. 6 Khotu ngsiim kdäm bok Anah jah ah kkyoong üng kae Khaai Pa, Johaan jah Alek Santa phi asua ngpüi ktie. 7 Ngshä xooi sun ah nih ma-a jah ngdüih shak ma ulü “Akho kthi i hok kba nah nih mdo be ni. U a hiit üng, u a ngming üng nah nih poh ni” tilü ah nih jah kthäh u. 8-10 Peta noh Mkhyangsiim üng be lü “Khong mange jah akdämeo, tuh ngooi nang nih-e noh ah kho kthia kkhaana akdo kah nih poh peet u jah ah kho kthi kah nih mdo bea phäh-a nah nih jah kshü kset ktie. Tuh-a nah nih ma-a ngdüüi ktia kkhyaang hin Nasaret mlüh-a ka Booi Jeishüh-a hiit jah Booi Jeishüh-a ngming üng ting hüt lü do be kti ni. Ahin nang nih-e abäng noh phi kshing u kti lü Isare-e abäng noh phi kshing u she. Nang nih-e noh baan lam ktunga Booi Jeishüh sun hnim u kti lü Pangsiim noh ta thih naak üng ah thoh shak be ni. 11 Jeishüh-a mong sun Sangsiim noh ‘Ut im kshae noh am hlü ei ulü ah nih hoih ma ua lung, akpäih naaka ta im sun ngkhääng na-bok ktia lunga thoon lobe kti ni’ tilü ah yuk hüt. 12 Jeishüh däk noh ni ah jah kuum kyan khoh. Kho mdek naküt üng Booi Jeishüh-a ngming khü kti däk noh va thoong khyah naak ah yah vaia Pangsiim noh ah mkhyah.” 13 Peta jah Johaan am ah nih ngke ei, am ah nih kyüh ei sun jah kshü kset ktie noh ah nih jah hmuh. Sa ktheem xooi am ni, kkhyaang la la xooi ni tilü ah nih ngngaih u. Asun üng jah kshü kset ktie sun mün ktie. Peta jah Johaan sun Jeishüh üng ngpüi ei kti xooi ni tilü phi ah nih jah kshin lo be u. 14 Mya lobe ktia kkhyaang sun Peta jah Johaana hlonga ngdüüi kti ah nih hmuh u. Asuna thoon lü ah nih pyen hlü kyo phi am pyen dat u. 15 Asun üng Peta jah Johaan sun kong si ngkhääm naaka kkhyüh jah mkhyum loma ulü ah nih päte ngthäh ngkhyah ktie. 16 “Ahi xooi i a nih jah poh vai u ni. Ahin xooi üng thoon lok kti mün sam kshe sun Jeirüh Shalem mlüh üng vek kti abänge noh ah nih kshing päih u ni. Asun sun am nih jah kpet mjak khoh u. 17 Kkhyaange noh ahina mün sam kshe käh ah nih ngjaak hü ti vai ua Jeishüh-a ngming üng käh ah nih pyen hü ti bing bing vaia nih jah msääi msing vai u ni” tilü ngthäh ngkhyah ktie. 18 Asun üng ah nih ngkhääm naak su jah khü be ma ulü “Jeishüh-a ngming üng käh pyen ti laang nih bä, käh jah mthei ti ngtu nih bä” tilü ah nih jah ngya kyet u. 19 Peta jah Johaan noh ta “Pangsiima ma-a nang nih-e ning jah ksang naak vai mä ado kom. Pangsiim ksang naak vai mä ado kom. Nah nih päte noh ngngaai ei ma ua. 20 Kah nih hmuh u jah kah nih ngjaak u sun am si jaang lü am ve khoh u ngü” tilü ah nih pyen. 21 Peta jah Johaan sun jah him ma thip thip be tü ulü ah nih jah hläh. Mtaam ah nih jah peet naak vaia mkot am ve. A i ani ti ta asuna mün sam kshea phäh üng kkhyaang abäng noh Pangsiim ah nih mküüi mtou u. 22 Ah kho kthi khoi mün sam kshea do be kti hin ah shak kphyü kip am tan ti.

23 Peta jah Johaan sun ah nih läh lo jah ta ah nih püiea veeia sit nih lü khotu ngsiim kdäm jah khong mange noh i hok kba ah nih ti pyen u sun ah nih jah mtheh mkhyah vaai be. 24 Asun ah nih ngjaak u jah ta Pangsiima veei tä sham yüm ktie. “Ak'hlüng taai bok Booi Pao, kkhaan kho, kho mdek, mpang lai tui jah asun üng vek ktie abäng naküt nah hiit üng nah jah mhnün mseng ni. 25 O Pangsiimo, nah xüh ei kah nih mah pook Davit Mkhyangsiim üng nah pyen shak ni. Shang phuhlang Davit noh ‘Pangsiim am kshing kti kkhyaang mjü kse-e ah nih mlung shou pyei kyo ktie. Isare-e noh phi i a am kyah ktia seng kyam kyo ktie. 26 Kho mdek üng ka shang phuhlange noh Pangsiim jah Khrito sun jah kpet mjak kkhaia ngpyaih xat ve-u. Khong mange phi ngkhääm love u’ tilü ah napyen ni. 27 Asun kba kuunga shang phuhlang Herot jah Pilat booi sun asuna mlüh su kkhyaang mjü kse-e jah Isare-e mah mah Booi Jeishüh kpet mjak kkhaia ngkhääm lok ksang ktie ni. O Pangsiimo, Booi Jeishüh hin nah khuut poh kti angsiim ni. Khritoa phi nah msoon ni. 28 O Pangsiimo, nah hiit üng nah mlung hlü nah namkhyah-a kba thoon lok kkhai sun poh kkhaia ngkhääm love u. 29 Booi Pao! Tuh-a ah nih jah mkyüh mkyook u hin jah büka. Nah xüh shoh kei nih-e noh käh ngke ei, käh kyüh ei laang lü nah kkhyü anghläia kah nih kpyaü naak hü vaia ngjung ktha phi jah pea. 30 Nah kut shäng lü am mya ktie jah mdo bea. Nah xüh shoh angsiim Jeishüh-a ngming üng ngshing ngte naak jah mün sam kshe kah nih poh naak vai ua mkot jah mboon peeta” tilü tä sham ktie. 31 Ah nih tä sham pääng u jah ta ah nih ngsu ngkhääm naak sun ngshüün lok kti. Abäng sun Mkhyangsiim üng be bang ulü käh kyüh ei laang lü Pangsiima kkhyü sut ei lü kpyaü hü ktie.

32 Jum ei ktiea pä sun ah nih mlung mat kti ni. “Kah päta ka ni” tilü u noh phi am pyen ti. Ah nih taak ei naküt sun phi ayüma ah nih jah shum ei u. 33 Booi Jeishüh-a thoh bea mong sun ngshäe ahiit mah-a shak shi hü ktie. Pangsiim noh jum ei ktie abäng üng do kya naak kho hah ah jah peet. 34-35 Jum ei ktiea pä üng u phi am mpyeen she loti u. A i ani ti ta kho mdek ta-ei kti noh kho mdek jooi lü im ta-ei kti noh im jooi lü ah nih yah ua ngui sun ngshäe üng ah nih jah peet lo u. Hlü ksang kti üng ngui sun ngshäe noh ah nih jah yet u. 36-37 Asun kba ni Joshep noh phi ah poh. Joshep sun Levih-a mjü, Khipyüh hnea hmi kti. Ngshäe noh ta Joshep sun Pana Pa-a ah nih shui u. (Ti hlü ta, ktha jah pek kti ni.) Joshep sun noh ah kho mdek jooi lü ah yah-a ngui sun lolü ngshäe üng ah jah mhjuum.