1 Hjok khah ksüün, mülam im kngam shoon ei ksüün (naji kthum) üng Peta jah Johaan sun hjok khah im nua jäng sit kti xooi. 2 “Asing linga kshoh-a” ah nih shuia peia ah nu puka kkhyüh ah kho kthi mat vek kti. Hjok khah im nua sit kti kkhyaange noh ngui ah nih peet vaia tong ei kkhaia ah püie noh amhnüüp tä lü kkot lolü ah nih taak lo u. 3 Peta jah Johaan lok kti xooi jah hmulü “Nah yet nih-a” tilü ah jah tong ei. 4 Bük tüp tüp nih lü “Jah bük ma-a” tilü Peta noh ah pyen. 5 Asun üng ta ah jah büh. Pe-lo hlü kti xooia ah shui. 6 Peta noh ta “Ngui xüi kah veeia am ve. Kah veeia akve ta kah ning pek kkhai ni. Nang üng kah ning mtheh ma kkhai ni. Nasaret mlüh pa Jeishüh Khritoa hiit üng ngdüüi lolü sit hüa” tilü ah pyen. 7 Asun üng ta Peta noh ah kho kthia kut man lü ah kaih. Ah kaih jah ta asuna kkhyaang sun ah kho ktha mah lobe kti. 8 Ngtoop lok kti. Ngdüüi kti. Sut ei lü sit hü kti. Peta jah Johaana hlong su hjok khah im nua lut kti. Sit lü ngtoop lü Pangsiim mküüi mtou kti. 9 Sit hü lü Pangsiim ah mküüi mtou sun kkhyaang päe noh ah nih hmuh u. 10 Hjok khah im nu asing linga kshoh ma-a ngshut lü asuna kkhyaang noh ngui ah tong ei khoi sun kkhyaange noh shim ulü tuh-a athoon ve lo sun hmu-ulü mün sam tong ktie.

11 Asuna kkhyaang sun Peta jah Johaana hlonga vekyet kti. Kkhyaang abäng noh mün sam ulü shang phuhlang Sholoh Monga lam shüa ah nih shuia hnüna dong lolü ngkhääm lok kti. 12 Asun üng ta Peta noh kkhyaang päe jah hmulü “Kah püi Isare-eo! Ahin i vai nah nih mün nak ktie ni. I vai mün nalü nah nih jah bük kyet ktie ni. Kah nih ngpyuuna phäh üng kah nih päta hiit üng ahina kkhyaang kah nih seh hü shak be am ni. 13 Nih mah püi mah pookea Pangsiim, Apyaham, Isak, Jakopea Pangsiim noh ah xüh shoh Jeishüh sun ah jou taai mah shak ni. Nang nih-e noh ta asuna Jeishüh sun ah nih hnim vaia nah nih ap u. Pilat Booi noh Jeishüh ah hläh vaia ah mkhyah kon hngoh-a phi Pilat Booia ma-a Jeishüh nah nih not u ni. 14 Jeishüh hin ngpyuun lü ngsiim ngsaih kti kyo. Nang nih-e noh ta Jeishüh not u kti lü Pilat Booi noh Jeishüh käh hlät lü kkhyaang hnim kti ah hläh vaia nah nih tong u ni. 15 Asuna thoon lü nang nih-e noh shak ngshääia thoon kti Booi Jeishüh hin nah nih hnim u ni. Pangsiim noh ta thih naak üng ah thoh shak be ni. Asun kei nih-e noh phi kah nih shak shi nak ktie. 16 Nah nih hmuh khoi, nah nih kshing khoi ah kho kthia kho, Booi Jeishüh-a hiit üng ngsun ngkhääng be kti ni. Booi Jeishüh ah jum eia phäh üng nang nih abängea ma-a ahina kkhyaang do-in be kti ni. 17 Kah püieo, nang nih-e jah nah nih khonge hin noh Pangsiim noh Jeishüh ah tüih lo ati sun am kshing u kti lü mkhui mkha lü nah nih hnim u ni. 18 Asun kba Khrito noh khui kha kshe nu khaam ei kkhai ni tilü Pangsiim noh ah shahma ngsiime naküt üng ahlaan nua kkhyüh ah jah napyen shak pääng ni. Asun kba kuunga Pangsiim noh athoon lo shak ni. 19 Vuuk be deih deih u kti lü nah nih mkhye Pangsiim noh ah nih ning mthih peet be vai ua Pangsiim da mang be hnüh ua. 20 Asun üng ta Booi Pa noh nang nih-e üng mlung diim deih naak jah ngthu nghlai naak ning pek kkhaie ni. Nang nih-ea phäh-a Pangsiim noh Jeishüh hin Khritoa ah msoon pääng nah nih veeia tüih lok kkhai ni. 21 Pangsiim noh ah shahma ngsiim üng ahlaan üng ah namtheh-a kba abäng naküt akthaaia ah pyaan ei vei säpa Booi Jeishüh kkhaan khoa veyah kkhai ni. 22 Shahma ngsiim Moshei noh ta ‘Keia kba nah nih mjü üng Pangsiim noh shahma ngsiim mat pou loshak kkhai. Ah nih noh ah nih ning mtheh naküt nah nih ngngaai yah kkhaie ni. 23 Asuna shahma ngsiima kkhyü am ngngaai kti mat mat Pangsiim noh ah kkhyaang mjü üng mkhyalü sim pyak shak kkhai ni’ tilü ah pyen hüt ni. 24 Pangsiima kkhyü pyen kti shahma ngsiim abänge hin noh tuh-a ksüüna mong ah nih napyen u. Asune üng Shamui Lah jah ah nih-a hnua velok ktie phi ngpüi ktie ni. 25 Pangsiim noh ah shahma ngsiime üng ah ng'aan ei hin nih nih-ea phäh phi thoon kti ni. Nih mah pooke jah Pangsiima be khüt üng nih nih-e phi nih ngpüi ktie ni. Pangsiim noh Apyaham üng ‘Nah tu kpa sa kpa velok kti üng kho mdeka kkhyaang mjü naküt noh do kya naak yah kkhaie ni’ tilü ah pyen. 26 Pangsiim noh ah Sa kpa pou lo shak lü nah nih veeia aksüka ah tüih lo hin nah nih mkhye-ea kkhyüh nglat lobe u kti lü Pangsiim noh do kya naak ah nih ning peet vaia phäh ni.”