1 Ah nih-e jah üm hlaam u ngüshe mhlüüi kdäm üng Koh tui shong kbü lü sit lü kah nih phavaai ktie. Angooi üng Rote tui shong kbü lü kah nih lai ktie. Asuna kkhyüh Patara mlüh kbü lü kah nih mhläi be tü ktie. 2 Pho Nishi hnea sit kkhai mhlüüi kdäm kah nih hmuh u. Asuna mhlüüi üng ngsum lü kah nih mhläi vaai ktie. 3 Khipyüh tui shong hmuh naak pha-u ngüshe asum da mhmang lü Shürih hne da kah nih mhläi ktie. Türah mlüh-a mhlüüi kdäm üng külak jah kkhya ulüta kei nih-e phi kah nih kyum lok ktie. 4 Asua akläke akhäk jah hmu-u ngüshe ngkhyün suum kah nih om ktie. Ah nih nih-e sun noh Mkhyangsiim üng Polüh Jeirüh Shalema käh ah seh vaia ah nih msääi u. 5 Lüphi om mhnüüp ngküüm lolüta ah nih üng ngkhyalü kah nih ngpyaih xat ktie. Jum ei ktie noh mlüh the säpa ah nih nghnu mi hnashen mah mah jah va-mdüih lok ktie ni. Kei nih-e kah nih bänga mpang lai tui peia mkhuuk üng ngdääng lü kah nih tä sham ktie. 6 Üm hlaam ei ma u ngüshe kei nih-e mhlüüi kdäma kkhaana kah nih kaai ktie. Ah nih nih-e phi im da sit be ktie. 7 Kei nih-e mhläi u ngüshe Türah mlüh-a kkhyüh Potoh Lemaih mlüh-a kah nih sit ktie. Asua be nae jah üm hlaam lü ah nih nih-e mah mah mhnüüp mat kah nih vek ktie. 8 Angooi üng joong u ngüshe Kesha Reh mlüh-a kah nih phak ktie. Asua thang kdo kkya kpyaü kti Philipa ima sit lü kah nih kaai ktie. Philip sun Jeirüh Shalem mlüh shaang ngsiim noh kkhyaang kkhyüh ah nih jah xüa kshuunga phi ngpüi kti ni. 9 Ah nih üng shahma kti ah sa ngla kphyü vek ktie ni. 10 Asua ngkhyün suum bang kah nih om k'um üng Akapuh ah nih shui shahma ngsiim mat Jüdah hnea kkhyüh lai lok kti. 11 Ah nih sun kah nih veeia lolü Polüh-a ksooi ksüüp hut lü ah päta kut kho jah khun yai ma lü “Mkhyangsiim noh ‘Aana ksooi ksüüp ka nak kti hin Jüdah mjüe noh Jeirüh Shalem mlüh-a man lü ahin kba hi khun yai lü Pangsiim am kshing kti kkhyaangea veei ap kkhaie ni’ ah ti ni” tilü malam ah pyen. 12 Asuna pyen kshak ngja-ngüshe ta kei nih-e jah be na kse-e noh phi Polüh Jeirüh Shalema käh sit kkhaia kah nih nghui naak u. 13 Polüh noh ta “I a nah nih thoon ktie ni. Ahin kba onga ta nah nih kyap ktie ni. Nah ve dam shak kkhüt ve u kti. Kei hin Jeirüh Shalema ah nih nah khun vai däk am nilü Booi Jeishüh-a phäh-a thih vai hngoh phi kah ngpyaih xat pääng kti ni” ah ti. 14 Ah nih sun kei nih-e noh pyen lü am yah u ngüshe koong u ngüshe ta Pangsiima hlü eia thoon khom she tilü kah nih hjaüh u. 15 Kona noong vei vema lü khoh hat jah mkhäh msih lü Jeirüh Shalem da kah nih sit ktie. 16 Kesha Reh mlüh-a ka jum ei ktie akhäk noh jah läk lo-ulü kah nih kaai naak vaia ima ah nih jah seh püi. Im mah pa ta Khipyüh tui shonga ka ahlaana kkhyüh jum ei kti Mna Shoon ni.

17 Jeirüh Shalem mlüh-a pha u ngüshe ta be nae noh jah bäh sih nalü jah nah dou daang ktie. 18 Angooi üng Polüh noh kei nih-e phi jah seh püi lü Jakop üng kah nih ngkhyum vaai ktie. Asua shaang ngsiim sange abäng phi vek ktie ni. 19 Polüh noh ah nih-e jah üm hlaam ma lü Pangsiim noh ah nih-a khuut poh-a phäh üng kkhyaang mjü kse-ea veeia ah poh mshah sun abäng küm seei ktia phyeh phyang lü jah mtheh kti. 20 Asun ngja-ulü abäng noh Pangsiim mküüi mtou ktie. Kona Polüh üng “Kah nih nao, ahin kba vek kti ni. Jum ei lok kti Jüdah kkhyaang thoong kho hah vek ktie ni. Ah nih nih-e sun abäng noh Mosheia thuum lei shong lü ktha nak ktie ni. 21 Kkhyaang mjü kse-ea kshuunga vek kti Jüdah kkhyaange üng Mosheia thuum non vaia nah jah msuh mtheh ngjak ktie ni. Ah nih sa nae vun moih käh ah nih jah poh peet vai jah Jüdah thuum seen käh läk vaia nah pyen atia ah nih ngjaak u ni. 22 Asuna thoon lü i hok kba vai ni. Nang nah phalok kti atia angseeia kshing kkhaie ni. 23 Kei nih-ea pyena kba poh-a. Shaang üng ka Pangsiim üng kkhyü taam lü ng'aan ei kti kkhyaang kphyü vek ktie 24 Ah nih nih-e jah seh püi lü ngsiim ngsaih vaia aning sho ngküüm ngkhook ktia poh ei ua. Pangsiim hjok khah naak kkhyüng kshei phu vai jah pea. Asun üng ah nih nih-e noh ah nih lu kteih lü kkhyü taam ng'aan ei ngsäng onga poh ei khoh kkhaie ni. Asun kba nah nih poh ta ah nih nih-e noh ah nih ning thang mseh phi hleeia ngläü lü nang noh phi Mosheia thuuma kba nah ve soh kti atia kkhyaang naküt noh kshing lok kkhaie ni. 25 Kkhyaang mjü kse-ea kkhyüh jum ei lok ktiea phäh sa yuk lü kah nih jah kbi pääng ni. Ah nih-e noh mhnama lup khah naaka meh käh ah nih ei vai, meh thi phi käh ah nih ei ook vai. Ah nghngü kbüh lü ah nih hnima sha käh ah nih ei vai, ngla shuia ngkho, kkhyaangea kkhyu bäü hma naaka ngkho käh ah nih poh vaia kah nih jah mtheh pääng ni” tilü ah nih pyen. 26 Asun üng ta Polüh noh kkhyaang kphyü sun jah khü lü ngsiim ngsaih vaia aning sho ngküüm ngkhook ktia poh ei vaai kti. Hjok khah im nua sit lü ngsiim ngsaih vaia ksüün i tüh-a ngpääng ei lü ah nih mkhih vai, i tüh-a poh kkhaie atia ah jah mtheh.

27 Mhnüüp kkhyüh suum lo hlü hnüh lüta Asha hnea ka Jüdah akhäke noh Polüh sun hjok khah im nua k'uma ah nih hmuh u. Asue noh kkhyaang päe jah mhlon msook lü Polüh ah nih man u. 28 Ah nih-e noh “Isare-eo, jah ku ei ua. Aana kkhyaang hin noh Isare kkhyaange jah thuum seene phi, ahina hjok khah im nu phi i a phi am nghmaai tilü teng pe naküta vek kti kkhyaang abäng üng jah msuuk mtheh hü kti ni. Tuh-a ah nih noh kkhyaang mjü kse akhäk hjok khah im nu hngoh-a jah vaan püi lü hjok khah im nu mtuih mleh shak kti ni” tilü ngpyaang pyei ktie. 29 I a thoon lüni ti ta Polüh sun Tophi Müh-a ah nih shui Ephet pa mah mah mlüh k'uma ah nih seh hü jah hmu-ulü ah nih sun hjok khah im nu k'uma ah seh püia ah nih ngngaih u. 30 Ah nih üng-phou sun mlüh abäng üng pha hü lüta kkhyaang abäng dong lo-ulü Polüh sun man ulü hjok khah im nua kkhyüh kho kpunga ah nih kaih lo yuut yuut u. Hjok khah im nu kshoh sun angshenga ah nih jah khaih khüp-in u. 31 Kkhyaang päe noh Polüh hnim vaia ah nih büün u. Jeirüh Shalem mlüh abäng üng ah nih üng-phoua thang sun Romah ngtuk kpoh jah up kti noh ah ngjaak. 32 Ah pät noh ah kkea ka ah upe jah ngtuk kpoh jah khü lü kkhyaang päea ve naak da dong kti. Kkhyaang päe noh ngtuk kpoh-e jah ah nih khong sun hmu-ulüta Polüh ah nih te sun ah nih hjaüh u. 33 Romah ngtuk kpoh jah up kti noh Polüh-a hlonga va-theih lü jah man shak ma lü mthi yüüi nghngih üng ah jah khih shak. Kona “Aana kkhyaang u ni. I a poh kpyak kti ni” tilü ah jah kthäh. 34 Kkhyaang päe sun angha ngha-a su viik kya vääk ngpyaang ktie. Ngso ngsik-in lü i a athoon ve phi am dang yah ngtu u. Asuna thoon lü lung im ngkhääng nua ngtuk kpoh-e üng ah jah seh shak. 35 Kkhyaak ah nih pha üng kkhyaange sun shou shat lü kyang ei lo kshe ulüta ngtuk kpoh-e noh Polüh sun ah kkoh-a kkot lü ah nih seh püi yah u ni. 36 Kkhyaang pä noh ah nih hnua jah läk lo-ulü “Aana kkhyaang hin nih mkhyüh mhleih vai u” tilü ngpyaang ktie.

37 Polüh sun lung im ngkhäänga ah nih mhluh hlü hnüh üng ta Romah ngtuk kpoh jah up ktia ma-a “Kei kah ngsi ngjaang khoh kkhai mä” tilü ah kthäh. Ah nih noh ta “Hai, nang hin noh ta Kärih läk nah pyen thei ktoih kti mä. 38 Asun kba ta ahlaan sa üng aso-yah jah thot kkhaia li ksim akküma jah mkhäp lü kkhyaang thoong kphyü moa jah va-kyaak püi kti Ekip kkhyaang säna am nah thoon ktio na” tilü ah kthäh. 39 Polüh noh ta “Kei hin Jüdah kkhyaang ni. Shili Shia hne Tashüh mlüh-a kah hmi kti ni. Kah mlüh ta nglou ngthang ktia mlüh ni. Kkhyaangea ma hia nah ngsi ngjaang shak ma tua” tilü ah nghui naak.

40 Ngtuk kpoh jah up kti noh ä lüta Polüh noh kkhyaaka ngdüüi lü kkhyaange ah kut mdan lü ah jah him. Ngim lo-ulüta Hepye läk üng kkhyü pyen kti.