1 Ah nih üng-phou ngim lolüta Polüh noh akläke jah khü lü ah nih ktha phya naak vai pyen ma lü ah jah üm hlaam. Ngpyaih xat lü Make Tonih hne da sit kti. 2 Asuna khyong su ngleng hü lü jum ei ktie üng jum ei naak angkhääng vaia kkhyü kho hah pyen lü Kärih hnea phavaai kti. 3 Asua khya kthum om kti. Shürih hne da sit kkhaia Polüh ah ngpyaih xat k'um üng Jüdah-e noh ah nih seng kyam u sun ah kshing ei lo. Asun üng ta Make Tonih lam da seh be vaia ah mkhyah lo. 4 Polüh-a hlonga Timotih, Peria mlüh-a ka Püruh-a sa Sho Pa sit kti. Teshah Lonih pa xooi Arih Taküh jah Sekung Tüh, Debea ka Kajüh, Asha hnea ka Tiki Küh jah Tophi Müh phi ngpüi ktie ni. 5 Asue sun anasit ulü Taroah mlüh-a kei nih-e sun jah namtät ktie. 6 Kkhaai phoom kka kkhaai kpeh ei Pooi angpääng üng Philipi mlüh-a kkhyüh mhlüüi kdäm üng kah nih sit ktie. Mhnüüp mhma alo üng Taroah mlüh-a pha u ngüshe ah nih nih-e üng kah nih nghmu be ktie. Asua ngkhyün suum kah nih om ktie.

7 Pangsiima ngam püi mhnüüpa mthan üng Pooi ngsiim ei kkhaia kah nih ngkhääm ktie. Polüh noh kkhyü pyen kti. Akho ngooi üng joong hlü lüta mthan nglung vei säpa ngsi ngjaang kti ni. 8 Ngkhääm naaka im akkhaan thapa mei päih kho hah pa vek ktie. 9 Utih Kuh ngming nak kti athoi kpa mi sa sun mkota ngshut kti. Polüh-a pyen hjou hjou lolüta ngshut ip lok kti. Ah ngshut naaka ip lo hniing lüta thap kthuma kkhyüh msea jukyak kti. Jubük ulüta ah nathi-ei lü ah nih juhmuh u. 10 Polüh noh jukyum lü ah kkhaana ngbok lü ah kbo. “Käh ng'äh ngkhyah ua. Ah shak veham kti ni” tilü Polüh noh ah pyen. 11 Polüh kaai be lü Pooi ngsiim ei ktie. Polüh sun kho athaih lo vei säpa ah nih hlonga kho hah pa ngsi ngjaang ma lü ah jah seh taak. 12 Asuna athoi sun ah shak mah-a ah ima kpha be ulü jum ei ktie je kyai pi pi ktie ni.

13 Kei nih-e ta mhlüüi kdäm üng Asoh mlüh-a kah nih nahma ktie. Asoh mlüh-a mhlüüi kdäma kkhaana kah nih nghmube kkhaia Polüh noh mkhüh nak kti. Ah nih sun kkong lam üng sit hlü lüta kei nih-e sun asun kba ah jah sük. 14 Asoh mlüh-a nghmu-u ngüshe ta ah nih mah mah mhlüüi kdäm üng Mitüh Leen mlüh-a kah nih phak ktie. 15 Asua kkhyüh mhlüüi kdäm üng sit be tü u ngüshe akho ngooi üng Khioh tui shonga peia kah nih sit ktie. Angooi üng Samoh-a mlüh kah nih phak ktie. Mhläi be tü lü angooi üng Milet mlüh kah nih phak ktie. 16 Polüh noh Asha hnea käh hjou vai Ephet mlüh-a käh vaang pah xa lü mhläi vaia ah mkhyah ni. Athoon khoh ta Jeirüh Shalem mlüh-a Pentekot mhnüüp man phalü ve vaia ah mkhüh naak. Asuna thoon lü angshenga sit hlü kti.

17 Milet mlüh-a kkhyüh Ephet mlüh-a kkhyaang jah tüüi lü shaang ngsiim sange Polüh-a veeia ah nih lo vaia ah jah sük. 18 Asange sun phalo ulüta Polüh noh “Kei hin aksüka Asha hnea kah pha loa kkhyüh kah ve k'um naküt üng i hok kba kah ve soh sun nah nih kshing ktie ni. 19 Kah mlung mhneem dik dik lü kah kphyü tui bo-onga Booi Pa-a xüh shoh-a thoon lü khuut kah poh kti ni. Jüdah kkhyaangea nah seng kyama phäh üng kah khui kha ngnü ngsheng kti ni. 20 Kei noh kkhyaangea ma-a phi nang nih-ea ima phi thang kdo kkya kpyaü lü Pangsiima kkhyü kah ning jah mtheh kti ni. Nah nih jum ei naak üng ning kpüi kpak kkhai naküt i phi am thuh khi laang ngü. 21 Pangsiima ma-a ah nih mkhye ah nih vuuk naak be vaia ni, Booi Jeishüh Khrito ah nih jum ei lo vaia ni, Jüdah-e phi kkhyaang mjü kse-e phi alang langa kah jah msuh mtheh ni. 22 Tuh-a ta Mkhyangsiim noh ah nah mtheh ksang nah ngüshe Jeirüh Shalem mlüh-a kah sit kkhai ni. I kah shoong toh ei vai am hmat ngü. 23 Lüphi Mkhyangsiim noh mlüh naküta vek kti jum ei ktie jah shum ei lü kkhyaange noh khup üng nah phep ulü ah nih nah mkhuh mhlih vaia mong nah kshing ei shak ktie. 24 Lüphi kah shak ta am mseh na-ngü. Booi Jeishüh noh Pangsiima bä naaka mong thang kdo kkya kpyaü kkhaia ah nah xüh-a khuut pääng ngüshe kah seh naak vaia lam je kyai lü akhüt naak säpa pha vai aktung bok bok ni. 25 Kei noh nah nih ve naaka sit hü lü Pangsiima pea mong kah pyen kti ni. Nang nih-e noh kah mik hmaai am nah hmuti u kti atia tuh hi kah kshing ei ni. 26 Asuna thoon lü kkhyaang mat mata sim pyak vaia phäh üng kei ta kah ngsiim kti ni tilü kei noh tuh ngooia kah ning mtheh hlü ktie ni. 27 Pangsiima mkhüh sun käh mphen ei lü abänga kah ning jah mtheh päih pääng ni. 28 Asuna thoon lü nah nih pät jah Mkhyangsiim noh nah nih jah shääm shuui vaia ah ning jah ap jum ei kti to pä sun khäh sih lü jah mseei mshang u bä. Pangsiima ah sa kpa-a thih-a phäh üng ah jah van naaka shang ngsiima to kshääm kdoa thoon u bä. 29 Kei kah seh kona ta mhnge kshou sun to päe jum ei ktiea kshuunga vaang lo-ulü am jah mhleem kkhaie am ni. 30 Nah nih kshuunga phi jah msuuk mtheh mkhye kti pou lo-ulü jum ei ktie akhäk ah nih-e da ngtung kkhaiea jah hlo hleep kkhaie ni. 31 Asuna thoon lü mseei kyet lü mtät mshou u bä. Kei noh kum kthum amhnüüp mthan nghläia kah kphyü tui üng hmaai ei lü mat siim mat siim üng kah ning jah msuh mtheh hin shüüm lä u bä. 32 Kah be naeo, tuh-a kei noh Pangsiima bä naak üng kah ning jah ap ni. Ah nih-a sa abängea phäh ah jah mshääm peet do kya naak ah jah peet vai jah nah nih jum eia ngkhääng naak vai sun Pangsiim noh khyaih khoh kti ni. 33 Kkhyaangea ah nih ngui, xüi, shui shak, hlü ko ei naaka mlung kei üng am ve. 34 Hina kah kut hin üng kah pät jah kah püiea hlü ko ei yah ong kei noh kah poh kti atia nah nih hmat ktie ni. 35 Asun kba ngnü lü khüüi khoom lü ah nih ktha ngseek ktie sun nah nih jah yet mshem kkhai atia kei hin noh kah ning mhnüh ktie ni. Booi Jeishüh ah pät kuung noh phi ‘Jah yet kti kkhyaang hin ah nih yeta kkhyaanga kthaka do kya naak yah ei kti ni’ ati sun shüüm kyet u bä” tilü ah pyen. 36 Polüh noh ngsi ngjaang lopääng lüta ah nih nih-e mah mah ah nih mkhuuk üng ngdääng lü tä sham ktie. 37 Asun üng abäng kyap pyei ulü Polüh sun lü ah nih uut u. 38 Ah nih nih-e sun Polüh noh hnua ta am nah hmuti u kti atia kkhyü mkha-a phäh üng sha lü puk shek ktie. Asun kba mhlüüi kdäma kkhaana ah nih tha vaai u.