21
Hmeinu ah Peitnak
(Makuh 12:41-44)
1 Bawipa Jesuh naw mang shüi netah, pum im ah peit nak ung bühmang ci gui naw, ami khawh ami peit cu hmuk ci.
2 Ghawipyam ciah hmeinu tumat naw, kyei tangka hnih hta apeit tu cun phi hmuk ci.
3 Bawipa Jesuh naw, “Kei naw akcang ka pyein cu, shin ah ghawipyam ciah hmeinu naw avan ah däm pi sei pek ci nei.
4 Chang a hei gui cu ami khawh akpawih law ung vah Khanpughi-am pek ci gui. Shin ah heminu läi cu a ghawipyam pang ung phi ani ung
om ciah a khawh avan pe pyi ci nei” ci ne pyein ci.
Pum Im A Shet Vai ah Mawng Bawipa Jesuh ah Ng'thu Pyein.
(Matthe 24:1-2; Makuh 13:1-2)
5 Ang düihpüi gui am shah naw, Taigü im ami cawh nak ah lung gui a kiom ah mawng la Khanpughi ami peit tah khawhchaam gui
abäkhäk ah mawng cu pyein ne ng'thu ci gui.
6 Bawipa Jesuh naw, “Shin ah nami hmuh gui cu avan she ne maih khai nei. Lung k'pei tumat phi a hnün ung kä ng'taih ba shüt
sei she ne a maih nak ah a khin gawk lawk khai nei,” cik ci.
Zaica nak La Dukdeiu Nak
(Matthe 24:3-14; Makuh 13:3-13)
7 Ngami naw, “Sazapa, a i a khin ung cun gui cu kia lawk khai ang? Acun ah a kiak law gui vai hmat nak vai ah a i gui dang law ma
khai ang?” ci ne ng'shik ci gui.
8 Bawipa Jesuh naw, “Chang naw kä a ning m'hleei-en gui vai ah geing na ne om vä. Chang akda cu kei ah mäih ah ng'hlawk ne
‘Kei cu Messiah nei’ cik ci om lawk khai nei, acun ah khin cu
gawk law pyi ci nei, ci ne ning m'hleei gui ci phi om lawk khai
nei.
9 A cun gui ah hnu ah kä nami läk-en vai nei. Ng'tuk-ah ah mawng la ng'küükneet nak ah mawng nami ng'zak ung kä nami kyihkyawk-
en vai. Acun gui cu akhtük ung gawk law ma khai, cun ung phi kho
ang pyi nak vai ah a khin kä gawk law phak ci nei” cik ci.
10 Cun kawn ah Bawipa Jesuh naw, “Chang pakhui tumat la tumat, kho ahei la ahei ng'tuk nak om khai.
11 A kho päng ung ak nuipai ah shihpi ah thüng nak, ei awk ah maih nak, gawpyam ah ng'peeih nak gawk lawk khai. Kyihkyawk cäicat
gui vai khankho ah dang lawk khai.
12 Cun gui kä a gawk law pha ung chang gui naw ning pha gui ne, ning dukdeiu na gui khai gui. Pum im ah m'khoichaa vai ah ning ap
gui u ne, thawng ung ning chum gui khai gui. Nangmi cu kei ah
hmawk ah ghangpughang ah ma, bawi ah ma ah nami gawk khai.
13 Cun gui cu nangmi naw Thu Ni nami pyein nak vai ah akhin k'ni ah kiak khai.
14 Cun ah kia sei a i ah nami thu tuba vai kä ng'ä-en u ne, nami m'lung ung nami k'üüp vai.
15 A i ah kia sei ci ung nami gaa naw kä a ning m'khüt gui vai ah hmuhmat nak la ng'thu m'gawng thei nak cu ka ning pe gui khai.
16 Nami nupa, phäi nau, mätzah gui naw gaa ah kut ung ning ap gui khai gui. Nangmi ung kaa am shah cu ngawn khai gui.
17 Kei ah hmawk ah chang gui naw ning gen gui khai gui.
18 Cun ung phi nami lu ung lusam ng'ma ät phi kä di düt khai.
19 Akhäng htek ah nami ng'düih vai, cun ung hun phiawn nak nami gah khai.
Jerusalem ah Dimaih Vai ah Mawng A Pyein Nak
(Matthe 24:15-21; Makuh 13:14-19)
20 Jerusalem cu gakap gui naw ngäng u sei nami hmuh ung adi law nak vai ng'et lawk ciah nami hmat vai.
21 Cun zah ung Judea kho ung om ci gui khomhtung lam ah dawng u sä, pigaw kyong ah om ci gui, pigaw k'pung ah hteit u sä, pigaw pei
ah om ci gui pigaw kyong ah kä hteit-en u sä.
22 Cun cu “Hmakat m'kyuk nak ah hnüüp” ah kiak ci, ciah cacim ung kaa ang dang law nak ah kiak ci.
23 Cun zah ung käu mah ci la ahta züt ciah hnumi gui cu ang htei ah zaica khai gui. Judea kho cu zaica nak ung gawk khai, chang
gui ah khan ah hma m'kyuk nak om khai.
24 Chang am shah cu chim awn sik khai gui, am shah cu pha ne, khlei- htein nah ne, a kho päng ung hteh püi khai gui. Chang khui hei gui
naw ami uknak kä ang pyi pha ah chuih Jerusalem cu ami kho awn
kai nak khai gui.
Chang ah Htapa Akyum Law Vai ah Mawng
(Matthe 24:29-31; Makuh 13:24-27)
25 “Hni cha aisi gui ung cäicat vai gui dang lawk khai. Khomdek khan ah chang gui cu tuinu ah ng'hnawk ng'za ne cäicat khai gui.
26 Khomdek khan ah kho ah shet nak a gawk law vai hmat ciah chang gui cu, cäi ng'ä aih khai gui. Kho k'häu ung kumkü aisi gui
cu thüng ne zong zawp khai gui.
27 Cun kawn ah küikyang ciah hlüngtai nak la bämang nak awn be ne, ng'mei bawk ung ng'cum ne lawk ciah chang ah Htapa cu nami
hmuk khai.
28 Acun gui tün ne agawk law ung, Khanpughi naw aning hun nak gui vai ng'et lawk ci kia sei, täu law ne, ng'düi law ne nami na
dan vai” ci ne m'cäi gui ci.
K'Thei Ghing awn Amtumtäng Nak
(Matthe 24:32-35; Makuh 13:28-31)
29 Cun kawn ah Bawipa Jesuh naw, m'tumtäng ah am thein gui cu; “Thei ghing la ahei sing ghing gui cä teng vä,
30 Sing gui ami lim law ba ung kho chaa lawk khai ah nami hmat ci.
31 Acun ah mäih ah ka pyein gui cu dang law sei nami hmu ung, ‘Khanpughi ah uknak kho ng'et law ci’ ciah nami hmat vai.
32 “Kei naw akcang ka pyein cu, tuhbäi ghing ciah chang gui kä ami sih phaa zawp ung ka pyein gui cu ng'dang zawp khai nei.
33 Khankho la khomdek ang pyi ung phi, kei ah ng'thu cu kä ng'pyi khai.
Geing Nak Vai Hlü Ci
34 “Nangmi cu ei awk zeikiai nak düt la khomdek pumsa ah phäh düt ah kä mü thai u ne, geing na ne nami om vai nei.
35 m'khoichaa nak ah hnüüp cu thau ah ng'chawi ah mäih ah nami khan ah akten ah gawk lawk khai nei. Cun ah hnüüp cu khomdek
khan chang avan ah khan ah gawk khai nei.
36 Tholet ne nami om vai, gawk lawk khai ah kho ah shet nak cu m'khüt ne, chang ah Htapa ah ma ah ng'düi ne m'khoichaa nak
nami awt hning vai ah angtäi sei taigü ne nami om vai nei” ci
ne m'cäi gui ci.
37 Bawipa Jesuh cu kho hnüüp zah ung pum im ah m'theithang gui ne, khomü lam ah Olive khomhtung ah kai ci ci.
38 Chang gui cu ang thu ngai tuk khai gui ah kho ngawi ah ng'dawt ne pum im ah law ci ci gui.