7
Bawipa Jesuh La Anau Gui
1 Cun kawn ah Bawipa Jesuh cu Kalile kho ah pawng ne hteit ba ci. Jew chang gui naw ngawn vai ah ami ng'ge cu hmat netah, Judea kho
ah kä hteit ba hlük ci.
2 Jew chang gui ah geit ah shawk nak ah pawi cu ng'et lawk ci;
3 Cun ah kia sei Bawipa Jesuh ah anau gui naw, “Nang ah bilawh gui cu ning läk lawk ciah chang gui naw, ami hmuhmat tu vai ah shin
ung kaa pawng ne, Judea kho ah hteit baä,
4 Ming thang hlük ciah chang naw a u naw phi abilawh cu käm zih man ci nei. Nang
naw cäi aih gui vai na bi ba ung, khomdek ah khan ung chang avan
naw a hmat vai ah na bi vai nei” ci ne pyein ci gui.
5 (A nau gui naw phi Bawipa Jesuh cu kä zum ci gui).
6 Bawipa Jesuh naw, “Kei ah akhin kä gawk law phak ci, nangmi ah a khin läi cu angtäi sei gawk lawk ci.
7 Khomdek chang naw nangmi kä ning thüi na gui ci, cun ung phi ngami ah shetkat nak cu, kei naw m'dang ne pyein ngä sei, kei cu
na thüi nak ci gui.
8 Cun ah pawi ung nangmi hteit vä, kei cu ka khin kä gawk law phak ci ah kia sei kä ka hteit khai” ci ne kiak na gui ci.
9 Cun ci netah Bawipa Jesuh cu Kalile kho ah om lä ci.
Geit Shawk Khophung Pawi ung Bawipa Jesuh Hteit ci.
10 Cun ah pawi ung anau gui ami hteh kawn ah Bawipa Jesuh cu adüm ah hteit tuk ci.
11 Jew chang vai gui naw cun ah pawi ung Bawipa Jesuh cu shui u netah “Cun ah chang a hawi ang” ci ne k'tä ci gui.
12 Chang akda naw ani ah mawng cu adüm düm ah pyeinsak ci gui. Am shah naw, “shin ah chang cu chang ni nei” cik ci. Am shah naw,
“chang ni ah kä kiak ci, chang m'hleehlak ciah chang nei” cik
ci gui.
13 Cun ung phi Jew chang vai gui cu kyi u netah, a u naw phi ang dang ah kä pyeinsak ci.
14 Pawi ami bi nak kho hnüüp cawih cawih law khätah, Bawipa Jesuh cu taigü im ah hteit ne m'theithang gui ci.
15 Jew chang ng'vai gui cu ang htei ah cäicat u netah, “a hawi ah phi kä ng'theithang man ci naw, a i hawk chaa ah shin gui a hmat
ang” cik ci gui.
16 Bawipa Jesuh naw, “Shin gui cu ka mät ah m'theithang ah kä kiak ci, na tüi lawk ciah Khanpughi ung kaa lawk ciah kiak ci.
17 Khanpughi ah ang zak hlü ah om hlük ciah chang phung naw, kei ah ng'thu pyein gui cu ang ngaih ung, Khanpughi ah ng'thu la kei
ka mät ah ng'thu ah a kiak ah, m'khoicha ne hmat khai nei.
18 Amät ah ng'zak hlü pyeinsak ci cu, amät ah ming thang nak vai ah kiak ci. Cun ung phi tüi lawk ciah ming thang vai ng'za hlük
ci naw, düng nak awn ng'thu pyein ci, ani ung hleeihlak nak kä
om ci.
19 Mose naw thukhän ning pe gui ciah kä kia ne ang? Nangmi tumat naw phi thukhän kä nami läk ci. A i ah kia sei kei nami na
ngawn khai ah nami pawng püi ang?” ci ne kiak na gui ci.
20 Cun ah chang gui naw, “Nang ung khoshe om ci nei, a u naw nang ning ngawn khai ah pawng püi sei ang?” ci ne kiak na tu ba ci
gui.
21 Bawipa Jesuh naw, “Kei naw cäi aih vai tumat ka bi ung nami van nami cäi cat ci.
22 Mose naw ‘nami hta gui cu vun-aat ne nami kyon gui vai’ ci sei, kyin hnüüp ung phi ak hmaw cu vun-aat ne nami kyon ci. (Cun cu
Mose ah tün law ah kä kiak ci, nami pupa gui ah bi man ah kiak
ci.
23 Akhmaw tumat kyin hnüüp ung vun-aat ne kyon ah hmawk ah Mose ah thukhän kaan ah kä ah kiak ung; a i ah kia sei kyin hnüüp
ung akgaw ka gai sak ah hmawk ah nami m'lungshe ang?
24 Khan shai awn dang ci düt teng ne käm khoichaa u ne, düng nak awn m'khoichaa nak nami bi vai nei” ci ne kiak na gui ci.
Ani Cu Messiah Ang?
25 Jerusalem ah chang am shah gui naw, “Shin ah chang cu ang vai gui naw ngawn vai ah shui ci gui ah kä kia sei ang?
26 Teng vä, ani naw, chang khli naw a hmuhmat vai ah m'theithang ci nei. Cun ung phi a u naw phi kä maa nak ci nei. Ani cu Messiah
ah kiak ci, ciah ang vai gui naw phi akcang ah hmat u ne ang?
27 Messiah cu a law ung a hawi ah kaa lawk ciah a u naw kä hmat khai, cun ung phi shin ah chang ah a law nak cu a u naw phi mi
hmat ci nei” cik ci.
28 Taigü im ung m'theithang gui ne a om zah ung Bawipa Jesuh naw, “Nangmi naw kei cu nami na hmat ci, a hawi ah kaa ka law phi
nami hmat ci. Cun ung phi kei cu ka mät ah ngaih ah ka lawk ciah
kä kiak ci, kei na tüi lawk ci cu düng nak awn kümbe ci, ani
cu nangmi naw kä nami hmat ci.
29 Cun ung phi kei cu ani naw na tüi law sei, ani ung kaa ka lawk ciah kia ne, kei naw ani cu ka hmat ci,” ci ne m'lau ne pyein
ci.
30 Chang gui naw Bawipa Jesuh cu phak khai gui ah tha na tu pang u ne phi, amät ah khin kä gawk phak ci kia sei, a u naw phi kä
phak ci gui.
31 Chang khli ung kaa akda naw Bawipa Jesuh cu, zum law u netah, “Messiah a kyum law ung, shin ah chang ah bilawh ah mä, däm pi
ciah cäi aih gui vai cu m'dang lawk khai ang? ci ne ng'shik ci
gui.
Bawipa Jesuh Phak Khai ah Gakap Gui Tüi ci Gui
32 Cun ah chang gui naw, Bawipa Jesuh ah mawng ami pyein cu ng'za u netah, pharise gui la taigüpa gui naw, gakap gui cu tüi ne
Bawipa Jesuh cu phaa sak gui ci gui.
33 Bawipa Jesuh naw cun ah chang gui-am,” Kei cu nangmi awn atäng ah ashäng hta bäng om ba netah, na tüi lawk ciah om nak ah ka
hteit ba khai nei.
34 Nangmi naw kei cu nami na shui ung phi kä nami na hmuk khai, a i ah kia sei ci ung, kei ah gawk nak vai ah nangmi kä nami law tu
hlawt khai” ci ne kiak na gui ci.
35 Jew chang vai gui naw, “Mik mi naw shui ne kä mi hmuh vai ah, a hawi lam ah hteit khai ang? Mi chang gui ah om nak Karik mang gaw
gui ah hteit ne m'theithang gui khai ang?
36 Ani naw nami na shui ung phi kä nami na hmuk khai, ka gawk nak ah phi kä nami law tu hlawt khai, cik ci;cun cu a i a pyein hlü
ang?” ci ne ami mät ng'thu ci gui.
Ghinnak ah Tuilawng
37 Ami pawi ah ang hning nak pi la ang pyi nak ah hnüüp ung, Bawipa Jesuh cu ng'düi law netah, “Tui gha ci naw kei ah law ne
tui aw law sä;
38 Cacim ung om ciah mäih ah, kei na zum ciah chang ah m'lung kyong ung ghin nak tui cu, tui-ci lawng ah mäih ah khawng ne long khai
nei” ci ne m'lau ne pyein ci.
39 Cun zah ung Bawipa Jesuh cu ahlüngtai nak kä dang phak ciah kia sei, zum ciah chang gui-am Mumcha theing phi kä ap gui hning
phak ciah kiak ci. Cun ah kia sei zum ci gui ah gha law vai ah
Mumcha Theing cu pyein ne ang shäu ah kiak ci.
Chang Gui ah Ngaih Ng'Pai Ci
40 Chang khli ung kaa chang akda naw Bawipa Jesuh ah ng'shäu cu ng'za u netah, “Shin ah chang cu profet akcang ah kiak ci nei”
cik ci gui.
41 Chang am shah naw, “Messiah cu Kalile kho ung kaa law hning khai ma?
42 Messiah cu David Ghangpughang ah htang'shon, David Ghangpughang ah gawnu Bethlehem ung ng'tüi lawk khai ciah, cacim ung om ciah kä
kia sei ang?” cik ci gui.
43 Cun ah kia sei Bawipa Jesuh ah mawng pyein ne chang gui ami ngaih ng'pai zawp ci.
44 Chang am shah naw ani cu pha hlü u ne phi a u naw kä phak ci.
Jew Chang Vai Gui Naw Kä Ami Zumnak
45 Gakap gui cu pharise gui la taigüpa gui ah om nak ah law ba u khätah, a i ah kia sei pha ne kä nami law püi ang?” ci ne
ng'shi gui ci gui.
46 Gakap gui naw, “A u chang naw phi shin ah chang ah mäih ah ng'thu kä pyein man ci nei” cik ci gui.
47 Pharise gui naw, “Nangmi mah mah ah ning m'hleei law gui ne ma?
48 Mi ng'vai gui la Pharise gui ung kaa, ani zum ciah chang om ne ang?
49 Shin ah chang gui cu ng'thukhän kä hmat ci gui ah kia ne, Khanpughi ah taam nak gah pyi ci gui nei” cik ci gui.
50 Cun ah pharise gui ung Nikodemus phi ng'khap tuk ci. Ani cu azan Bawipa Jesuh ah law man ciah chang ah kiak ci.
51 Nikodemus naw, “Mik mi ah thukhän awn pyein ah a kiak ung; a u chang phi akat nak dang khai ah käng shi-en ah, a pyein nak tuba
hning vai kä peit-en ah, mi m'kat hning khai ma? ci ne pyein ci.
52 Cun ah chang gui naw, “Nangmi Kalile kho ah kaa ma? Cacim cu teng ba shüm ä, Kalile kho ung a u profet phi kä om man ci,
cun cu na hmat khai nei” ci ne kiak nak ci gui.