Johan 6 (CNT)

Bawipa Jesuh naw Chang Phia-hma-kip Ei M'Bei ci

(Matthe 14:13-21; Makuh 6:30-44; Luka 9:10-17)

1 Cun kawn ah Bawipa Jesuh cu Kalile tuili (Tiperih tuili) hei ga lam ah vang kat ci. 2 Gawpai ci gui a gai sak ba gui cäi aih vai ah hmu tu te ci gui ah chang akda naw a hnu ah läk lawk ci gui. 3 Bawipa Jesuh cu m'htung khan ah hang kai ne, ang düihpüi gui awn atäng ah ngok ci gui. 4 Cun zah ung Jew chang gui ah phiawn nak pawi cu ng'et lawk ci. 5 Bawipa Jesuh naw a pei ah chang akda a law hmu netah, “Chang shikchü naw a ei vai a hawi khleih vai ang?” ci ne Philip cu ng'shik ci. 6 (Cun cu Philip am nüm nak ah ang shi ah kiak ci, a mät naw a i a bi vai avan hmat pyi ci).

7 Philip naw, “Ngui phia-goi phu khleih ung phi, chang shikchü naw api ciah phi käng küh khai gui nei” ci ne pyein ci.

8 Ang düihpüi tumat Siomn Peter ah anau Antaru naw, 9 “shi ah akhmaw tumat naw m'hut pum hma la nga pahnih sho ci nei. Cun ung phi chang shikchü-am ng'büh khai ah käm bei hlawt vai nei” cik ci.

10 Bawipa Jesuh naw, “Chang gui cu ngoh sak gui vä” cik ci. (Cun zah ah ngoh nak vai nep ci). Cun ah kia sei phia-hma-kip ah däm ciah chang gui cu ngok ci gui. 11 Bawipa Jesuh naw m'htut cu la ne Khanpughi ah taigü netah, chang gui-am tei gui ci. Nga phi la ne tei gui ci. 12 Chang avan naw ami phü ci ah ei ci gui. Chang avan naw ei ne ami phü kawn ah Bawipa Jesuh naw ang düihpüi gui-am, “Ami ei pawih gui käng theh-en khai ah m'dawn ne gim ba vä” ci ne kiak na gui ci. 13 M'htut pum hma la nga pahnih Bawipa Jesuh naw a tei, chang gui naw ami ei pawih avan m'dawn ba u sei, them-dawn gha-lei-goi ung be lawk ci.

14 Cun ah Bawipa Jesuh naw cäi aih vai abi gui hmu tuk ciah chang gui naw, “Shin ah chang cu khomdek khan ah gawk lawk khai ami ciah, profet akcang ah kiak ci nei” cik ci gui.

15 Cun ah chang gui naw Bawipa Jesuh cu, ghangpughang ah ling ne k'hmoh lawk khai gui ah hmat netah, amät bäng khomhtung khan ah kai ne om ci.

Bawipa Jesuh Tui Khan ah Hteit Ci

(Matthe 14:22-23; Makuh 6:45-52)

16 Mühun lam ah Bawipa Jesuh ah ang düihpüi gui cu, Kalile tuili ah zu kyum ba u ne, 17 hleiko ng'cum ne Kapenium gawnu gaa ah vang kat vü ba ci gui. Khomü law güt sei Bawipa Jesuh cu ang düihpüi gui ah om nak ah kä gawk law ba ci. 18 Cun zah ung kho ng'pheet ne khi law sei, tuili ung tui ng'hnawk lawk ci. 19 Ang düihpüi gui cu, maing thum phli vai ung hleiko awn ami hteh kawn ah Bawipa Jesuh cu tui khan ah ng'düi ne ana a vü sei hmu u netah, cäicat ne kyikyawk ci gui.

20 Bawipa Jesuh naw, “Kä kyikyawk vä, kei nei” cik ci. 21 Cun kawn ah ang düihpüi gui cu zeikiai u ne, Bawipa Jesuh cu ng'hleiko khan ah ana dou ba ci gui. A cun vai-am vang gaa tui- kam ah gawk ne va kai ci gui.

Chang Gui Naw Bawipa Jesuh Shui Ci Gui

22 A ngawi ung vang gaa ah om shüt ciah chang gui naw, hleiko tumat om te ci, ci ne shui ba ci gui. A cun ah hleiko ung Bawipa Jesuh kä om tu sei, ang düihpüi gui bäng ami hteh ba cu hmuk ci gui. 23 Cun ung phi Tiperia ah kaa lawk ciah hleiko gui cu Bawipa Jesuh naw taigü ne chang akda-am ei am bei nak gui te ah pei ah gawk lawk ci gui.

24 Chang gui naw a cun ung Bawipa Jesuh la ang düihpüi gui cu kä hmu u netah, hleiko ung kai ba ne Bawipa Jesuh shui ba khai gui ah Kapenium kho gaa ah vang kat vü ba ci gui.

Bawipa Jesuh cu Ghin nak m'Htut ah Kiak ci.

25 Chang gui naw Bawipa Jesuh cu tui vang gaa täng ah hmu ba u netah, “Sazapa, a i zah ung shin gaa ah na gawk law ba ci-ang?” ci ne ng'shik ci gui.

26 Bawipa Jesuh naw, “Kei naw akcang ka pyein cu, nangmi naw kei nami na shui cu, cäi aih vai kabi nami hmuhmat su ah kä kiak ci, m'htut nami phü ah nami ei tu ah hmawk ah kiak ci. 27 Shekaa thei ciah ah ei awk cu käk tha nah ne, kä shekaa thei ciah, ang täi ghin nak ah ei awk cu tha na vä. Khanpughi naw hlüngtai nak a ap pyi ah kia sei, chang ah Htapa naw cun ah ei awk cu nangmi-am ning pe gui khai nei” ci ne m'cäi gui ci.

28 Chang gui naw, “Keimi cu Khanpughi ah ng'zak hlü ah kami hnünthawh hning vai ah a i ang kami bi kaw?” ci ne ng'shik ci gui.

29 Bawipa Jesuh naw, “Khanpughi ah ang zak hlü cu amät naw a tüih law ah akchang cu nami zum vai ah kiak ci nei” ci ne kiak na gui ci.

30 Cun ah chang gui naw, “Keimi naw hmu u netah, kami ning zum nak hning vai ah, a i cäi aih vai gui ang nam dang kaw? 31 A i gui ang nabi kaw? Cacim theing ung, “Ani naw khankho ah kaa m'htut cha lawk ci” ciah a om ah mäih ah kami pughi gui naw, bungpuk khong-gau ah Mannah m'htut cu ei ci gui nei” cik ci gui.

32 Bawipa Jesuh naw, “Kei naw akcang ka pyein cu Mose ah ning peit gui ah m'htut cu, khankho ah kaa ei awk ah kä kiak ci, Kapa Khanpughi naw aning peit gui cu, khankho ah kaa m'htut akcang ah kiak ci. 33 Khanpughi ah na peit gui ah m'htut cu, khankho ah kaa kyum law ne, khomdek chang gui-am ghin nak pe gui ciah kiak ci,” ci ne m'thein gui ci.

34 Cun ah chang gui naw, “Bawipa, cun ah m'htut cu keimi am angtäi sei na pe gui ä” ci ne ng'zoi ci gui.

35 Bawipa Jesuh naw, “Kei cu ghin nak m'htut ah ka kiak ci, kei ah lawk ci cu a i sangung phi ei kä cawi ba khai;kei na zum ci cu a i zah ung phi tui kä gha ba khai. 36 Cun ung phi nangmi naw, kei cu, na hmu lang u ne, kä nami na zum ci, ka ci pyi ci nei. 37 Kapa naw a na ap ah chang phung cu kei ah lawk khai gui. Kei ah lawk ciah chang phung cu a u phi kä ka m'hlat ba khai. 38 A i ah kia sei ci ung, kei cu kamät ah ng'zak hlü ka bik khai ah khankho ah kaa ka kyum lawk ciah kä kiak ci, na tüi lawk ciah ng'zak hlü ka bik khai ah ka kyum lawk ciah kiak ci. 39 Na tüi lawk ciah ang zak hlü cu, amät ah na ap ah chang gui di maih nak ung kä gawk khai gui ah, akhnu hnüüp ung sihnak ung kaa ka thawh ba sak gui vai ah kiak ci. 40 Kapa Khanpughi naw Ahtapa hmu ne zum ciah chang phung cu, angtäi ghin nak a gah vai ah ng'za hlük ci. Kei naw phi, ngami cu, akhnu hnüüp ung sihnak ung kaa, ka thawh ba sak gui khai” ci ne m'thein gui ci.

41 Bawipa Jesuh naw, “Kei cu khankho ah kaa kia lawk ciah m'htut ah ka kiak ci” cik ci. Cun a ci cu chang gui naw ngai khit u netah, 42 “Shin ah chang cu Josep ah hta, Jesuh ah kä kia ne ang? Ani ah anu la apa phi mi hmat zawp ci maw, a i ah kia sei tuhbäi, ‘Kei cu khankho ah kaa ka kyum lawk ci’ a ci ang?” cik ci gui.

43 Bawipa Jesuh naw, “Nami mät naw kä ngaih tüh khit vä, na tüi lawk ciah Kapa naw kä a law püi ung, 44 a u phi kei ah kä law hlawt khai, kei ah lawk ci cu akhnu hnüüp ung sih nak ung kaa ka thawh sak ba khai. 45 Profet gui ah ca guk ung, “Chang avan cu Khanpughi naw m'theithang gui khai, Kapa ah ng'thu ng'za ne akni ah ng'thei ci gui phung cu kei ah law ci gui. 46 Kei naw ka pyein hlü cu, chang naw Khanpughi hmu man ci, ka ci ah kä kiak ci, Khanpughi ung kaa lawk ciah chang bäng naw, Khanpughi cu hmu man ci.

47 Kei naw akcang ka pyein cu, “Kei na zum ciah chang cu angtäi ghin nak gah ci. 48 Kei cu ghin nak m'htut ah ka kiak ci. Nami pughi pa gui cu, 49 bungpuk khonggau ah, mannah m'htut cu ei u ne phi, si zawp ci gui. 50 Cun ung phi khankho ah kaa kia lawk ciah m'htut ei ci cu, sih nak kä hmuk khai. 51 Kei cu khankho ah kaa kia lawk ciah ghing ciah m'htut ah ka kiak ci. Cun ah m'htut ei ciah chang phung cu, angtäi ah ghing khai. Kei naw ka ning peit gui ah m'htut cu, khomdek chang gui naw ghin nak ami gah nak vai ah, ka sa ah kiak ci,” ci ne m'thein gui ci.

52 Cun ci khätah chang gui naw, “A i hawkchaa ah ani naw mi ei vai ah asa na pe gui khai ang?” ci ne m'lungshe ne ng'cuh ci gui.

53 Bawipa Jesuh naw, “Kei naw akcang ka ning m'thein gui cu, chang ah Htapa ah asa kä ei ne, asi kä nami awk ung, nangmi naw ghin nak kä nami gah khai. 54 Kei ah sa ei ne kei ah si awk ci cu, ang täi ghin nak gah ci, akhnu hnüüp ung ani cu kei naw sih nak ung kaa ka thawh ba sak khai. 55 Kei ah sa cu ei akcang ah kiak ci, kei ah si cu awk akcang ah kiak ci. 56 Ka sa ei ne ka si awk ci cu kei ung om ci, kei phi ani ung ka om ci. 57 Ghing ci ah Kapa naw ana tüih law ah kia ne, kei cun phi Kapa awn ka ghing ci. A cun ah mäih ah kei na ei ciah chang cu, kei awn ghing khai. 58 Shin ah m'htut cu khankho ah kaa kia lawk ciah kia ne, ei kawn ah sik nak ah kiak ciah, nami pupa gui ah ei ah m'htut awn kä täng ci. Shin ah m'htut ei ciah chang phung cu angtäi ah ghing khai” ci ne m'thein gui ci.

59 Shin gui cu Kapenaum gawnu ah pum im ung Bawipa Jesuh naw am theithang gui ah kiak ci.

A ngtäi Ghin nak ah ng'Thu Gui

60 A hnu ah läk ci gui ah chang akda naw, shin ah ng'thu gui cu ng'za u netah, “Shin ah am theithang gui cu ghaat aih ci, a u naw läk m'khüt khai ang?” cik ci gui.

61 Cun ah ami ngaih khit cu a u naw kä am thein ah, Bawipa Jesuh naw hmat netah, “Shin ah ng'thu ah hmawk ah nami m'lungk'si ne ma? 62 Chang ah Htapa cu a om nak htük ah kho ah a hang kai vü ba nami hmuh law ung mä, a i ah nami ngai khai ang? 63 Khanpughi ah Mumcha Theing naw hnun gui cu ghin sak ci, chang ah hlüngtai nak naw a i käm khüt ci. Kei naw tuhbäi ka ning m'thein gui ah ng'thu cu, Khanpughi ah ghin nak Mumcha ah kiak ci. 64 Cun ung phi nangmi ung kaa am shah naw kä zum ci” ci ne kiak na gui ci. (Kä zum tuk ciah chang gui la ga ah kut ung ap khai ah chang cu Bawipa Jesuh naw akhtük ge ung hmat ci). 65 Cun ah kia sei Bawipa Jesuh naw, “Kei naw tuhbäi ka pyein hlü cu, Kapa Khanpughi naw kä am gein ung a u phi, kei ah kä law hning ci” ci ne kiak na gui ci.

66 Cun ung tün ne Bawipa Jesuh ah angkhah püi gui akda cu kängläk tu ba ne ng'hlat ba shüt ci gui. 67 Cun ah kia sei Bawipa Jesuh naw, angdüihpüi chang gha-li-goi am, “Nangmi mä, kei ah hnu ah nami na läk nak ung kaa nami ng'hlat ba hlük ci ang?” ci ne ng'shi gui ci.

68 Simon Peter naw, “Bawipa, a u ah om nak ah keimi kami hteh vai ang? Nang Bawipa bäng naw vah angtäi ghin nak ah ng'thu cu na pyein ci. 69 Nang cu Khanpughi ung kaa kyum lawk ciah, khan chang theing ah na kiak cu, tuhbäi hmat ne kami ning zum ci nei” ci ne pyein ci.

70 Bawipa Jesuh naw, “Kei naw chang gha-lei-goi ka ning ghü gui ciah kä kia ne ang? Cun ung phi nangmi ung kaa chang tumat cu, khoshe ah kiak ci nei” ci ne kiak na gui ci.

71 Simon Iskariot ah hta Judas cu, angdüihpüi gha-lei-goi ung kaa ah kia tu pang ne phi, Bawipa Jesuh cu gaa ah kut ung ap khai ah chang ah kia khätah, cun ah a pyein ah kiak ci.