JOHAN
AH CAGUK AKTHUM NAK
The Third Letter of John
Johan ah Caguk Akthum Nak cu, “Ang vaihta naw,” Khrithabum ung ami k'tahnga gui am a guk ah kiak ci nei. Ca guk ci naw a hei khritha gui, am'theithang gui ah phäh ah Kaius cu m'hlüngtai ne, Diotrephes ming nak ciah chang cu ami geing nak vai ah m'cäi ci.
1
1 Ang vaihta kei naw akcang ah kam hni ah Kaius-am ca ka guk lawk ci nei. Ref 1:1 Lamktu 19:29; Rom 16:23; 1Kor 1:14
2 Kam hni ah ka püi, apäng avan ung na bämang vai la na gaigawng vai ah ka ning taigü pek ci nei. Nang cu Mumcha ung na k'thamah ciah ka ning hmat ci nei.
3 Am shah khritha gui ami law päng ung, nang cu thu thuuk ung na bekhüt ah mawng pyein law u sei, ang htei ah ka zei ci, nang cu thudüng ung akcang ah na ghing ciah kiak ci nei.
4 Ka hta gui thudüng ung nami ghin ah mawng cu ng'za ne ka zei ah kawn ah, kei na zei sak ci a i kä om ba ci nei.
Kaius Am Hlüngtai Nak
5 Kam hni ah ka püi, nang naw kä ng'hmuhmat pang man ah Khritha gui ah khan ah bekhüt ne bi na bi cu bä ci nei.
6 Ngahmi naw nang ah m'hni nak ah mawng cu khrithabum ung pyein lawk ci gui nei. Ngahmi naw Khanpughi naw a zei nak ah, a khuut cu ma lam ah ami bi lä thei vai ah, nam theithang gui vai nei.
7 Ngahmi cu kä zum ci gui ah m'theithang nak kä dou u ne, Bawi Khrit ah khuut bi vai ah ng'düi lawk ci gui ah kiak ci nei.
8 Mik mi khritha gui naw cun ah mäih chang gui cu mi m'htei gui vai ah kiak ci nei. Cun ung vah ngahmi ah thudüng ah mawng bilawh nak cu mi hunshawih gui ciah kiak khai.
Diotrephes La Demetrius
9 Kei naw khrithabum-am ca gu ne ka pek ci, cun ung phi ami ng'vaihta Diotrephes naw kei ah thu cu kä ngai ci nei.
10 Kei ka law ung ani ah bilawh gui phung cu ka ning m'thein gui khai nei. Ani naw mik mi cu kä na zei nah gui ne, nam hleei gui ne thu pyein ci nei. Cun bäng ah kä kiak ciah, Khritha phäi nau gui ami law ung kä dou gui ci, dou gui hlük ciah chang gui phi maa nah gui ne, khrithabum ung kaa k'täm gui vai ah phi k'tha nak ci nei.
11 Ka püi gui aw, akshe cu kä nami thei tu vai, akni cu nami thei tu vai nei. Akni bilo ciah chang ung Khanpughi om ci, akshe bilo ciah chang naw Khanpughi kä hmuk ci.
12 Chang nüng naw Demetrius ah ni nak cu pyein ci nei, thudüng mät naw phi ani ah ni nak cu dang sak ci nei. Keimi naw ani ah ni nak cu kami be sak hlük ci, Keimi ah thu ang düng ah mawng cu, nangmi naw nami hmat ci nei.
Khüm Nak ah Zavaih Nak
13 Kei naw ka ning m'thein gui vai akda om pang sei phi, ca awn kä ka gu ba hlük ci nei.
14 Kei cu kä shou pha sei gawk law ngäh sei, nangmi awn ng'hmuh ne mi ng'thu khai ah ka ngai ci nei.
15 Nangmi ung dimdeeih nak om sä, na teih püi gui ami van naw ning zavaih nak ci gui nei. Na teihpüi gui ami van m'thein tu ba gui ä.