JOHAN
AH CAGUK AKHNIH NAK
The Second Letter of John
Johan ah Caguk Akhnih nak cu, A ng'vaihta naw am'hni ah hnumi la ahta gui am,” a guk ah kiak ci. Cun cu Khrithabum tumat la khritha gui am a guk gui ah kia khin ci. Cun ah ca k'tawi hta ung zum ci gui tumat la tumat ami ng'zum hni tu vai la thuvi hleeihlak ciah m'theithang ci gui la ami m'theithang gui cu kä ami dou en vai ah Khän ne am cäi nak gui ah kiak ci.
1
1 A ng'vaihta kei naw, akcang ah kam hni ah hnumi nu la ahta gui am ca ka guk lawk ci nei. Kei bäng ah kä kiak ciah thu thuuk ung m'hni nak hmat ci phung naw, nang cu ning m'hni ci nei.
2 A i ah kia sei ci ung thu thuuk cu keimi ung om ne, ngawi zä khäng khai ah a kiak ah hmawk ah kia ci.
3 Pa Khanpughi la ah Ahtapa Bawipa Jesuh Khrit ah m'geinsei nak, chihna nak la dimdeeih nak cu, thu thuuk shing ne m'hni nak om ciah mik mi ah khan ah om sä.
Ng'düng nak La M'Hni Nak
4 Na hta am shah gui cu, Khanpughi ah thukhän ah mäih ah, thudüng ung ami ghin cu hmat ne, ang htei ah ka zei ci nei.
5 Cun ah kia sei kam hni ah hnumi, mik mi cu mi van mi ng'zumhni tuk khai nei. Shin ah ca ka guk law shi thukhän thai ah kä kiak ci, ak htük bäih ge ung nangmi ung om ciah thukhän ah kiak ci. Ref 1:5 Jn 13:34; 15:12,17
6 Kei naw ka pyein ah m'hni nak ah mawng cu, mik mi naw Khanpughi ah thukhän läk ne mi ghin nak vai ah kiak ci nei. Nangmi nami van naw ak htük ge ung nami ng'zak ah thukhän cu, nangmi nami van cu m'hni nak ah kyong ung nami om vai nei, ciah kiak ci.
7 Bawi Jesuh Khrit cu hnicim chang ah zung tüi lawk ci, ci cu kä zum ciah chang thuvi gui akda m'dek khan ah gawk lawk ci gui nei. Cun ah mäih thuvi theileh ciah chang gui cu, Bawi Khrit ah gaa gui ah kiak ci nei.
8 Geing na ne nami om vai nei, cun ung nangmi ah hmawk ah keimi ah bi cu akholä ah kä kiak khai, nangmi phi m'cümhnah nak ak be nami gah khai.
9 Bawi Khrit ah m'theithang nak ah kyong ah kä om ne, ak pung ah om ciah chang ung Khanpughi kä om ci. Bawi Khrit ah m'theithang nak kyong ung om ciah chang cu Apa la Ahtapa ani nik hnih ah om nak ah kiak ci.
10 Shin ah m'theithang ah mäiè ah kä m'theithang ciah chang a gawk law ah a kiak ung, nami im ah kä nami dou en vai, ‘Nang ung dimdeeih nak om sä,’ ci ne phi kä nami pyein en vai.
11 Ani ana dou ciah chang cu ani ah paw ah kia law ne, shetkat nak bi tuk ciah chang ah kiak ci.
Khüm Nak ah Thu
12 Kei naw ka pyein vai akda om pang sei phi, ca awn kä ka gu ba hlük ci nei. Mi van kümbe sei mi zeikiai nak vai ah, nami om nak ah ka mät law ngä sei, ng'hmuh ne mi ng'thu vai ka zum ci nei.
13 Nam hni ah nabe ah hta gui naw ning khaih na u ne, ning zavaih nak ci gui nei.