1 သင်းအုပ်ရာထူးကိုရှာကြံသူသည် ကောင်းရာကိုအလိုရှိသည်ဟူသောစကားမှာ သစ္စာတည်ရာစကားဖြစ်၏။ 2 သို့ဖြစ်၍ သင်းအုပ်သည်အပြစ်တင်ခွင့်မဲ့သူ၊ မယားတစ်ယောက်နှင့်သာအိမ်ထောင်ပြုသူ၊ သတိရှိသူ၊ ဣန္ဒြေစောင့်သူ၊ သင့်လျော်စွာပြုသူ၊ ဧည့်ဝတ်ကြေသူ၊ သင်ကြားတတ်သူ၊ 3 သောက်ကြူးခြင်း၊ ကြမ်းတမ်းခြင်းကင်းလျက်၊ နူးညံ့သူ၊ ရန်မလိုသူ၊ လောဘမဲ့သူ၊ 4 စုံလင်စွာရိုသေသမှုပြုသောသားသမီးတို့ရှိလျက် ကိုယ့်အိမ်ကိုကောင်းစွာအုပ်စိုးသူဖြစ်ရမည်။ 5 ကိုယ့်အိမ်ကိုမအုပ်စိုးတတ်သူသည် ဘုရားသခင့်အသင်းတော်ကို မည်သို့ကြည့်ရှုနိုင်အံ့နည်း။ 6 ၎င်းပြင် မာနကြီးသဖြင့် မာရ်နတ်ခံရသောပြစ်ဒဏ်ကိုခံရမည်စိုး၍ ခရစ်ယာန်သစ်မဟုတ်စေရ။ 7 အပြစ်တင်ခံရသဖြင့် မာရ်နတ်ကျော့ကွင်းမိမည်စိုး၍ သာသနာပတို့ရှေ့အသရေရှိသူဖြစ်ရမည်။ 8 ထိုနည်းတူသင်းထောက်တို့လည်း ရိုသေဖွယ်သူ၊ နှစ်ခွမပြောသူ၊ မသောက်ကြူးသူ၊ အမြတ်အစွန်းမလိုလားသူ၊ 9 ကြည်လင်သော သြတ္တပ္ပစိတ်ရှိလျက် ယုံကြည်ခြင်းတရား၏နက်နဲခြင်းကို စွဲမြဲသူဖြစ်ရမည်။ 10 ထိုသူတို့သည်စစ်ဆေးခံ၍ အပြစ်ကင်းမှ ဆောင်ရွက်ကြစေ။ 11 ထိုနည်းတူမိန်းမတို့လည်း ရိုသေဖွယ်သူ၊ ကုန်းမချောသူ၊ သတိရှိသူ၊ အရာရာတွင်သစ္စာစောင့်သူဖြစ်ရမည်။ 12 သင်းထောက်တို့သည် မယားတစ်ယောက်နှင့်သာအိမ်ထောင်ပြုသူ၊ သားသမီးတို့မှစ၍ အိမ်ကိုကောင်းစွာအုပ်စိုးသူဖြစ်ရမည်။ 13 ကောင်းမွန်စွာဆောင်ရွက်သောထိုသူတို့သည် ကောင်းသောအခြေအနေကိုရသည့်ပြင် ခရစ်တော်ယေရှုအားယုံကြည်ခြင်းအမှုကို အလွန်ရဲရင့်စွာပြုတတ်၏။ 14-15 ငါသည် သင့်ထံမကြာမီရောက်လာမည်ဟုအောက်မေ့သော်လည်း နှောင့်နှေးခဲ့လျှင် သမ္မာတရား၏ထောက်ခံရာကွန်းတိုင်တည်းဟူသော အသက်ရှင်တော်မူသောဘုရားသခင့်အသင်းတော်၊ ဘုရားသခင့်အိမ်တော်တွင် မည်သို့ကျင့်ကြံရမည်ကိုသင်သိစေရန် ဤသို့ရေးလိုက်၏။ 16 ဘုရားတရားကြည်ညိုခြင်းဖြစ်စေသောနက်နဲရာကား၊ ကြီးမြတ်ကြောင်းဝန်ခံထိုက်သည့်ပြင် ရုပ်ခန္ဓာ၌ဖော်ပြခြင်း၊ နံခန္ဓာ၌ဖြောင့်မတ်ကြောင်းထင်ရှားခြင်း၊ စေတမန်တော်တို့ရှေ့ထင်ပေါ်ခြင်း၊ လူအမျိုးမျိုးတို့တွင်ကြေငြာခြင်း၊ ဤလောက၌ယုံကြည်ကြခြင်း၊ ဘုန်းတော်နှင့်တကွချီဆောင်ခြင်းများကို ခံတော်မူသောအရှင်တည်း။