1-2 ထိုကြောင့်ငါဦးစွာနှိုးဆော်သည်မှာ ငါတို့သည်ဘုရားတရားကိုလုံးလုံးကြည်ညိုလျက် ငြိမ်ဝပ်ချမ်းသာစွာနေခွင့်ရစေရန် ဘုရင်မင်းများ၊ အစိုးရမင်းများမှစ၍ ခပ်သိမ်းတို့အဖို့မေတ္တာပို့ခြင်း၊ တောင်းလျှောက်ခြင်း၊ အသနားတော်ခံခြင်း၊ ကျေးဇူးတော်ချီးမွမ်းခြင်းများကိုပြုကြလော့။ 3-4 ထိုသို့ပြုခြင်းကား ကောင်းမြတ်၍ လူခပ်သိမ်းတို့သည်ကယ်တင်ရာရောက်လျက် သမ္မာတရားတော်ကို သိကျွမ်းစေလိုတော်မူသောငါတို့ကယ်တင်ရှင် ဘုရားသခင့်ရှေ့လက်ခံဖွယ်ဖြစ်၏။ 5-6 ဘုရားသခင်တစ်ဆူ၊ အလုံးစုံတို့အတွက်ရွေးနုတ်ရာအဖြစ် ကိုယ်ကိုစွန့်တော်မူသည့်လူ၊ ခရစ်တော်ယေရှုတည်းဟူသော ဘုရားသခင်နှင့်လူတို့ကြားတွင်စေ့စပ်သော အရှင်တစ်ပါးတည်းရှိ၏။ ထိုသို့ဖြစ်ကြောင်းကို အချိန်တန်သည့်ကာလ သက်သေခံရမည်ဖြစ်၍၊ 7 ငါသည်ကြားပြောသူအဖြစ်၊ တမန်တော်အဖြစ်၊ လူမျိုးခြားတို့အားယုံကြည်ခြင်းတရားနှင့် သမ္မာတရားကိုသင်ပြသောဆရာအဖြစ် ခန့်ထားတော်မူခြင်းခံရသည်ဟု မုသာမသုံးဘဲဟုတ်မှန်စွာငါဆို၏။

8 သို့နှင့်အညီ အရပ်ရပ်နေယောက်ျားတို့သည် အမျက်ထွက်ခြင်း၊ ငြင်းဆန်ခြင်းကင်း၍ သန့်ရှင်းစွာလက်အုပ်ချီလျက် ပဌနာပြုကြစေရန်ငါအလိုရှိ၏။ 9 ထိုနည်းတူမိန်းမတို့သည် ဆံစု၊ ရွှေ၊ ပုလဲ၊ အဘိုးထိုက်တန်ဆာများကိုမဟုတ်။ တင့်တယ်ရုံအဝတ်များကိုလည်းေကာင်း၊ ရှက်ကြောက်ခြင်း၊ ဣန္ဒြေစောင့်ခြင်းများကိုလည်းေကာင်း၊ ဝတ်ဆင်လျက်၊ 10 ဘုရားကြည်ညိုသည်ဟုဝန်ခံသော မိန်းမတို့ဆင်သင့်သည့်ကောင်းမှုများကို ဆင်ယင်ကြစေရန် ငါအလိုရှိ၏။ 11 မိန်းမသည် အနော်အတာကိုအစုံအလင်ခံလျက် ငြိမ်ဝပ်စွာအသင်အကြားခံနေ​ေစ။ 12 သင်ကြားခြင်းငှါသော်လည်းေကာင်း၊ ယောက်ျားကိုအစိုးတရပြုခြင်းငှါသော်လည်းေကာင်း၊ ငါအခွင့်မပြု။ ငြိမ်ဝပ်စွာနေစေ။ 13 ဖန်ဆင်းတော်မူခြင်းကို ဦးစွာအာဒံ၊ နောက်ဧဝခံရ၏။ 14 ၎င်းပြင် အာဒံသည်လှည့်စားခြင်းကိုခံရသည်မဟုတ်။ မိန်းမခံရသဖြင့် လွန်ကျူးရာရောက်၏။ 15 သို့ရာတွင်ယုံကြည်ခြင်း၊ ချစ်ခြင်း၊ သန့်ရှင်းခြင်း၊ ဣန္ဒြေစောင့်ခြင်းများ၌တည်နေကြလျှင်၊ သားဖွားမှုဖြင့် ကယ်တင်ရာရောက်လိမ့်မည်။