1 ထာဝရဘုရားထံသီချင်းသစ်ကိုဆိုကြလော့။ ကိုယ်တော်သည်အံ့ဖွယ်ရာ အမှုတော်များကိုပြုလျက်၊ ညာလက်တော်၊ သန့်ရှင်းသောလက်ရုံးတော်ဖြင့်၊ ကယ်တင် တော်မူခြင်းကိုစီရင်တော်မူလေပြီ။ 2 ထာဝရဘုရားသည်၊ ကယ်တင်တော်မူခြင်းကိုထင်ရှားစေ၍၊ လူမျိုးခြားတို့မျက်မှောက်၊ ဖြောင့်မတ်တော်မူခြင်းကိုဖော်ပြတော်မူပြီ။ 3 ဣသရေလအမျိုးသားတို့၌၊ ကရုဏာတော်နှင့်သစ္စာတော်ကိုသတိရတော်မူသည့်အလျောက်၊ ငါတို့ဘုရားသခင်၏ကယ်တင်ခြင်းကို၊ မြေကြီးအစွန်းအဖျားရှိသမျှပင် မြင်ရကြလေပြီ။ 4 အချင်းမြေတစ်ပြင်လုံး၊ ထာဝရဘုရားအားရွှင်လန်းသံလွှင့်လျက်၊ ကြွေးကြော်ကြလော့။ အသံထုတ်၍ကျူးဧကြလော့။ 5 စောင်းတီး၍ထာဝရဘုရားအားကျူးဧကြလော့။ စောင်းတီး၍ကျူးဧသောအသံနှင့် ဆိုကြလော့။ 6 ဘုရင်မင်းမြတ်တည်းဟူသောထာဝရဘုရားရှေ့တော်၌၊ တံပိုးခရာမှုတ်၍၊ ရွှင်လန်းသံလွှင့်ကြလော့။ 7 သမုဒ္ဒရာနှင့်ကြွယ်ဝပြည့်စုံသမျှ၊ လောကနှင့်နေထိုင်သမျှတို့သည် ဟုန်းခြင်း၊ မြစ်များသည်၊ လက်ခုပ်တီးခြင်း၊ 8 တောင်များသည် တစ်ပြိုင်နက်၊ ကြွေးကြော်ခြင်းကိုပြုကြစေ။ 9 မြေကြီးသားတို့အား စီရင်ဆုံးဖြတ်ရန်ကြွလာတော်မူမည့်ထာဝရဘုရားရှေ့တော်တွင် ပြုကြစေ။ ကိုယ်တော်သည် လောကကိုဖြောင့်မတ်ခြင်းနှင့်လည်းေကာင်း၊ လူအမျိုးမျိုးကိုမျှတခြင်းနှင့်လည်းေကာင်း၊ စီရင်ဆုံးဖြတ်တော်မူလိမ့်မည်။