1 အိုဘုရားသခင်၊ အကျွန်ုပ်အပေါ်၌၊ ကရုဏာသက်တော်မူပါ။ လူတို့သည်အကျွန်ုပ်ကိုစိတ်ဇောနှင့်လိုက်ရှာ၍၊ နေ့ရှိသမျှ တိုက်ခိုက်နှိပ်စက်ကြပါ၏။ 2 ရန်သူတို့သည် နေ့ရှိသမျှ စိတ်ဇောနှင့် လိုက်ရှာ၍၊ မာနစိတ်နှင့်တိုက်ခိုက်သူတို့များလှပါ၏။ 3 အကျွန်ုပ်သည်၊ ကြောက်ရွံ့နေရသောကာလတွင်၊ ကိုယ်တော်၌ကိုးစားပါမည်။ 4 ဘုရားသခင်ကိုအမှီပြု၍၊ ကတိတော်ကိုချီးမွမ်းမည်။ ကြောက်ရွံ့ခြင်းကင်းလျက်၊ ဘုရားသခင်၌ကိုးစားပြီးဖြစ်သူငါ့ကို၊ လူတို့မည်သို့ပြုနိုင်သနည်း။ 5 သူတို့သည်၊ နေ့ရှိသမျှ ငါ့စကားကိုအလွဲကောက်လျက်၊ မကောင်းကိုသာကြံစည်ကြ၏။ 6 ငါ့အသက်အန္တရာယ်ကိုရှာကြံသည့်အတိုင်း၊ စုရုံးချောင်းမြောင်းလျက်၊ ငါ့ခြေရာများကိုခံ၍ လိုက်ကြ၏။ 7 ဒုစရိုက်အားဖြင့်လွတ်မြောက်ကြပါမည်လော။ အိုဘုရားသခင်၊ ထိုလူမျိုးတို့ကိုအမျက်တော်ထား၍ဖြိုလှဲတော်မူပါ။ 8 အကျွန်ုပ်၏လေလွင့်ခြင်းများကို ကိုယ်တော်မှတ်သားလျက်၊ မျက်ရည်များကိုဘူးတော်တွင် ထည့်ထားတော်မူပါ။ စာရင်းတော်၌သွင်းထားပြီမဟုတ်ပါလော။ 9 ဘုရားသခင်သည် ငါ့ဘက်၌ရှိနေတော်မူ၍၊ အော်ဟစ်သောအခါ၊ ရန်သူတို့လန်ကြရမည်ကိုငါသိ၏။ 10 ဘုရားသခင်ကိုအမှီပြု၍၊ ကတိတော်ကိုချီးမွမ်းမည်။ ထာဝရဘုရားကိုအမှီပြု၍၊ ကတိတော်ကိုချီးမွမ်းမည်။ 11 ကြောက်ရွံခြင်းကင်းလျက်၊ ဘုရားသခင်၌ကိုးစားပြီးဖြစ်သူငါ့ကို၊ လူတို့မည်သို့ပြုနိုင်သနည်း။ 12 အိုဘုရားသခင်၊ အကျွန်ုပ်သည် ရှေ့တော်၌ထားသော သစ္စာဝတ်ကိုဖြေလျက်၊ ချီးမွမ်းရာပူဇော်သက္ကာကိုဆက်ကပ်ပါမည်။ 13 ကိုယ်တော်သည်၊ အကျွန်ုပ်အသက်ကိုသေဘေးမှကယ်လွှတ်တော်မူပြီ။ အသက်ရှင်သူတို့၏အလင်းတွင်၊ ဘုရားသခင့်ရှေ့တော်၌သွားလာခွင့်ရရှိစေရန်၊ အကျွန်ုပ်ခြေ ကိုမချော်မလဲအောင်၊ စောင်မတော်မူပြီမဟုတ်ပါလော။