1 ဒုက္ခိတကိုထောက်ထားသောသူသည် မင်္ဂလာရှိ၏။ ဒုက္ခရောက်သောနေ့ရက်၌၊ ထိုသူ့ကိုထာဝရဘုရားကယ်လွှတ်လျက်၊ 2 အသက်ရှင်နေစေရန်ထိန်းသိမ်းလျက်၊ နေပြည်၌ကောင်းကြီးမင်္ဂလာခံစားစေတော်မူမည်။ ရန်သူတို့အလိုသို့လွှဲအပ်တော်မမူပါနှင့်။ 3 သာလွန်ပေါ်တွင် နုန်းခွေသောအခါ၊ ထာဝရဘုရားထောက်မ၍၊ နာဖျားမကျန်းအိပ်ရာကိုပြုစုတော်မူလိမ့်မည်။ 4 ငါမူကား၊ အိုထာဝရဘုရား၊ ကရုဏာတော်သက်၍၊ ကိုယ်တော်အားပြစ်မှားမိခဲ့သောအကျွန်ုပ်ကိုသက်သာစေတော်မူပါဟု၊ လျှောက်ထားပါ၏။ 5 ငါ့ကိုရည်၍ ရန်သူတို့က၊ မည်သည့်အခါသူသေလျက်၊ အမည်ပပျောက်ရပါမည်နည်းဟုမကောင်းပြောဆိုတတ်ကြပါ၏။ 6 အကြည့်အရှုလာသော်၊ အချည်းနှီးစကားကိုပြောဆိုလျက်၊ ဒုက္ခအဖြစ်အပျက်ကိုမှတ်သားပြီးလျှင်၊ ထွက်သွား၍ထုတ်ဖော်ပြန်ကြားရာ၊ 7 မုန်းထားသူရှိသမျှသည်၊ ငါ့ကိုကုန်းချောလျက်၊ ဘေးအန္တရာယ်ကြံစည်လျက်၊ 8 သူ၌အနာဆိုးစွဲကပ်သဖြင့်၊ ယခုတုံးလုံးနေရာမှထရတော့မည်မဟုတ်ဟုဆိုကြပါ၏။ 9 ငါကိုးစားခဲ့သော၊ ငါ့ထမင်းကိုစားသောမိတ်ဆွေရင်းပင်၊ ငါ့ကိုခြေနှင့်ကျောက်ကန်ပါပြီ။ 10 ကိုယ်တော်မူကား၊ အိုထာဝရဘုရား၊ သူတို့ကိုလက်စားချေနိုင်ရန်၊ အကျွန်ုပ်အပေါ်၌ကရုဏာသက်လျက်ထူမတော်မူပါ။ 11 အကျွန်ုပ်အပေါ်၌၊ ရန်သူသည် အောင်သံပြုခွင့်မရှိသောကြောင့်၊ အကျွန်ုပ်ကိုနှစ်သက်တော်မူကြောင်းသိရပါ၏။ 12 ကိုယ်တော်သည်၊ စုံလင်စွာအမြဲရောက်စေလျက်၊ ကာလအစဉ်ရှေ့တော်၌ နေရာချတော်မူပါ၏။ 13 ဣသရေလလူမျိုး၏ ဘုရားသခင်ထာဝရဘုရားသည်၊ အနန္တကာလပတ်လုံးမင်္ဂလာရှိတော်မူပါစေသော။ အာမင်။ အာမင်။ s